CAB. XIX

1Myr shoh ta’n Chiarn dy ghra, Immee, as fow boteil craie yn phasheyder, as gow mayrt paart jeh shenndeeaght y phobble, as jeh shanstyr ny saggyrtyn, 2As gow magh gys coan mac Hinnom, ta er-gerrey da’n raad myr t’ou goll stiagh er y yiat har, as jean fockley-magh ayns shen ny goan ver-yms royd; 3As abbyr, Clasht-jee goo yn Chiarn, O reeaghyn Yudah, as shiuish chummaltee Yerusalem; myr shoh ta Chiarn ny sheshaghtyn flaunyssagh, Jee Israel, dy ghra, Cur-my-ner, ver-ym lhiam olk er y voayl shoh, quoi-erbee chlinnys eh, nee e chleayshyn feiyral. 4Er-yn-oyr dy vel ad er my hreigeil, as er an-chasherickey yn voayl shoh, as er lostey incense ayn da jeeghyn joarree, nagh row enney oc hene orroo, ny ec nyn ayraghyn, ny ec reeaghyn Yudah, as dy vel ad er lhieeney yn voayl shoh lesh fuill gyn-loght. 5T’ad er hroggal myrgeddin altaryn Vaal, dy lostey nyn mec lesh aile son chebballyn-losht da Baal, red nagh doardee mee daue, chamoo loayr mee jeh, chamoo haink eh ayns my smooinaghtyn. 6Shen-y-fa, cur-my-ner, ta ny laghyn cheet, ta’n Chiarn dy ghra, nagh bee yn ynnyd shoh ny-sodjey enmyssit Tophet, ny, Coan mac Hinnom, agh, Coan y dunverys. 7As ver-ym shaghrynys er coyrle Yudah as Yerusalem ’sy voayl shoh; as ver-ym orroo tuittym liorish y chliwe roish nyn noidyn, as liorish ny laueyn ocsyn ta shirrey nyn mioys; as ver-ym ny kirp oc son beaghey da eeanlee’n aer, as da beishtyn y thallooin. 8As nee’m yn ard-valley shoh ny hraartys, as ny chraid: bee yindys mooar er dy chooilley unnane hed shaghey; as nee ad gannidys, kyndagh rish ooilley’n kerraghey trome hig urree. 9As ver-ym orroo gee feill nyn mec, as feill ny inneenyn oc hene, as dy n’ee ad dagh unnane feill e charrey, ’sy chaggey as ’sy chennid lesh nee nyn noidyn, as adsyn ta shirrey nyn mioys, ad y chruinnaghey stiagh. 10Eisht nee oo yn voteil y vrishey ayns shilley ny deiney hed mayrt, 11As nee oo gra roo, Myr shoh ta Chiarn ny sheshaghtyn flaunyssagh dy ghra, Eer myr shoh brish-yms y pobble shoh, as yn ard-valley shoh, myr ta fer brishey saagh craie yn phasheyder, nagh vod reesht ve jeant slane; as nee ad goanluckey ad ayns Tophet, derrey nagh bee boayl-oanluckee ayn. 12Shoh myr nee’m jannoo rish yn ynnyd shoh, ta’n Chiarn dy ghra, as rish ny cummaltee t’ayn, as nee’m eer yn ard-valley shoh y yannoo myr Tophet. 13As bee thieyn Yerusalem, as thieyn reeaghyn Yudah, feohdoil myr yn ynnyd Tophet, kyndagh rish ooilley ny thieyn er y vullagh oc t’ad er lostey oural-incense da slane armee yn aer, as er gheayrtey magh chebballyn-feeyney da jeeghyn joarree. 14Eisht haink Jeremiah veih Tophet, raad va’n Chiarn er choyrt eh dy yannoo phadeyrys, as hass eh ayns cooyrt thie yn Chiarn, as dooyrt eh rish ooilley yn pobble. 15Myr shoh ta Chiarn ny sheshaghtyn flaunyssagh, Jee Israel, dy ghra, Cur-my-ner, ver-ym lhiam er yn ard-valley shoh, as er ooilley e baljyn, ooilley yn olk ta mee er n’ockley magh noi eck; er-yn-oyr dy vel ad er chreoghey nyn mwannal noi geaishtagh rish my ghoan’s.