CAB. II

1Ny-sodjey haink goo yn Chiarn hym, gra, 2Immee, cur eam ayns cleayshyn Yerusalem, gra, Myr shoh ta’n Chiarn dy ghra, Ta cooinaghtyn aym’s ort’s, er kenjallys dty aegid, er dty ghraih tra v’ou nasht rhym, tra deiyr oo orrym ’syn aasagh, ayns cheer nagh row rieau fo. 3Va Israel casherickys gys y Chiarn, as yn chied-vess jeh e vishaghey: adsyn ooilley ta dy stroie eh, bee ad foiljagh; hig olk orroo shen, ta’n Chiarn dy ghra. 4Clasht-jee goo’n Chiarn, O shiuish hie Yacob, as ooilley kynneeyn thie Israel: 5Myr shoh ta’n Chiarn dy ghra, Cre’n aggair ta nyn ayraghyn er gheddyn aynym’s, dy vel ad er n’immeeaght foddey voym, as er n’eiyrt er fardail, as moyrn giare-cheeayllagh? 6Chamoo t’ad er ghra, Cre vel y Chiarn hug lesh shin seose ass cheer Egypt, ren leeideil shin trooid yn aasagh; trooid cheer reeastaneagh, as ooiganagh; trooid cheer fowan-loshtee, as scadoo yn vaaish; cheer nagh jagh dooinney rieau ny hrooid, as raad nagh row dooinney erbee cummal? 7As hug mee lhiam shiu stiagh gys cheer messoil, dy ee yn mess as y foays echey: agh tra hie shiu stiagh, ren shiu my heer neu-ghlen, as my eiraght ren shiu dwoaiagh. 8Cha dooyrt ny fir-ynsee, Cre vel y Chiarn? as adsyn va’n leigh er nyn gurrym, cha bione daue mee: ny fir-reill myrgeddin ren ad olk m’oï, as ren ny phadeyryn phadeyrys liorish Baal, as hie ad geiyrt er fardail gyn-ymmyd.

9Shen-y-fa neem’s foast pleadeil riu, ta’n Chiarn dy ghra, as rish cloan dty chlienney neem’s yn chooish y ghoaill seose. 10Son gow-jee trooid ellanyn Chittim, as jeeagh-jee; cur-jee chaghteryn gys Kedar, as gow-jee tastey vie, as jeeagh-jee my ta lheid y red: 11Vel ashoon er chaghlaa ny jeeghyn oc, nagh nee foast jeeghyn ad? agh ta my phobble’s er chaghlaa nyn ghloyr son shen nagh vel foays ayn. 12Bee-jee atchimagh, O shiuish niaughyn, son shoh, as lhig da aggle dewil ve erriu, as y traartys trome, ta’n Chiarn dy ghra. 13Son ta my phobble er n’yannoo daa olk; t’ad er hreigeil mish, farrane ny ushtaghyn bio, as er chleiy daue hene cisternyn, cisternyn brisht, nagh gum veg yn ushtey.

14Vel Israel my harvaant? nee slave sthie-ruggit eh? cre’n-fa eisht t’eh er ny roostey? 15Ren ny lionyn aegey garveigagh n’oï as gullyrnee, as hug ad yn cheer echey naardey: ta ny ard-valjyn echey losht, as gyn cummaltagh. 16Myrgeddin ta cloan Noph as Tahapanes er vrishey aalid dty chione. 17Nagh vel oo er dayrn shoh ort hene, liorish dy vel oo er hreigeil yn Chiarn dty Yee, va dty leeideilagh raaidey? 18As nish, cre t’ayd’s dy yannoo rish raad Egypt, dy iu ushtaghyn Sihor? ny cre t’ayd’s dy yannoo rish raad Assyria, dy iu ushtaghyn yn awin? 19Nee dty vee-chraueeaght hene uss y smaghtaghey, as nee dty chooyl-skyrraghtyn hene oo y gheyrey: toig er-y-fa shen, as gow tastey vie, dy vel eh ny red olk as sharroo dy vel oo er hreigeil yn Chiarn dty Yee, as nagh vel yn aggle aym’s aynyd, ta Chiarn ny sheshaghtyn flaunyssagh dy ghra.

20Son ’sy chenn earish ren mish dty whing y vrishey, as scoltey dty gheulaghyn; as dooyrt oo, Cha jean-ym olk y yannoo arragh; ec y traa cheddin er dy chooilley chronk ard, as fo dy chooilley villey glass, v’ou rouail mygeayrt, geiyrt er maarderys. 21Ga dy row mee er hoiaghey oo dty villey-feeyney ooasle, jeh keint slane dooie: kys te eisht dy vel oo ceaghlit gys billey-feeyney neu-ghooghyssagh dooys? 22Son ga dy jean oo niee oo hene lesh y nitre, as goaill mooarane sheeabyn dy dty ghlenney, foast ta dty vee-chraueeaght er ny chronnaghey kiongoyrt rhym’s, ta’n Chiarn Jee dy ghra. 23Kys oddys oo gra, Cha vel mee neu-ghlen, cha vel mee er n’eiyrt er Baalim? Jeeagh reesht gys dty raad ’sy choan, cooinee er shen t’ou er n’yannoo: t’ou myr dromedaree bieau joltagh er y raad; 24Assyl feïe ayns oayll yn aasagh, ta dy rouanagh stronnal seose yn gheay; tra t’ee er-aaghree quoi oddys ee y lhiettal? nee adsyn ooilley ta geiyrt urree coayl nyn obbyr; tra t’ee trome sharree yiow ad magh ee. 25Ny lhig da dty chass ve rooisht, ny dty scoarnagh ve paagh: agh dooyrt oo, Cha vel veg y hreishteil er-mayrn: cha vel; son joarreeyn bynney lhiam, as geiyrt orroosyn nee’m goll. 26Myr ta nearey er y vaarliagh tra t’eh goit, myr shen ta nearey er thie Israel; orroo hene, nyn reeaghyn, nyn brinceyn, as nyn saggyrtyn, as nyn adeyryn, 27Gra rish bun billey, She uss my ayr; as rish clagh, T’ou uss er my ymmyrkey: son t’ad er hyndaa nyn gooyl rhym’s, as cha nee nyn eddin; agh ayns earish nyn seaghyn jir ad, Trog seose, as saue shin. 28Agh cre vel ny jeeghyn ayd’s ren oo dhyt hene? lhig dauesyn girree seose, my oddys ad oo y hauail ayns earish dty heaghyn: son corrym rish earroo dty ard-valjyn ta ny jeeghyn ayd’s, O Yudah. 29Cre’n-fa eisht nee shiu pleadeil m’oï? son ta shiu ooilley er vrishey magh m’oï’s, ta’n Chiarn dy ghra. 30Ayns fardail ta mee er smaghtaghey nyn gloan, nagh beagh er nyn gerraghey: ta’n cliwe eu hene, myr lion stroialtagh, er varroo nyn adeyryn.

31O heeloghe, gow-jee tastey jeh goo yn Chiarn: Vel mee er ve ny aasagh da Israel? cheer dy ghorraghys? Cre’n-fa ta my phobble gra, Ta shin nyn mainshtyryn hene; cha jig mayd ny-sodjey hood’s? 32Vod moidyn jarrood e coamraghyn aalin? ny ben y phoosee e stoamid? ny-yeih ta my phobble er yarrood mish laghyn erskyn-earroo. 33Cre’n-fa t’ou kiartaghey dty raad dy eiyrt er rouanys? shen-y-fa t’ou myrgeddin er n’ynsaghey dty aghtyn da’n vooinjer vee-chrauee. 34Ayns ny ardjyn ayd’s myrgeddin t’er ny gheddyn fuill oikanyn ôney: cha nee ayns ny jeeigyn hooar mee eh, agh raad gheayrt oo eh. 35Foast t’ou uss gra, Er-y-fa dy vel mee gyn foill, shickyr nee e chorree chyndaa voym: cur-my-ner, prow-ym ort eh, son dy vel oo gra, Cha vel mee er n’yannoo peccah. 36Cre’n-fa t’ou goaill wheesh dy rouail ort dy chaghlaa dty raad? bee nearey ort myrgeddin son Egypt, myr va nearey ort son Assyria. 37Dy jarroo, hed oo magh voish [dobberan], lesh dty laueyn er dty chione: son ta’n Chiarn er choyrt sheese dy varrantee, as cha bee ayd foays erbee lioroo.