CAB. XX

1Nish cheayll Pashur, mac Immer y saggyrt, va myrgeddin yn ard-offishear ayns thie yn Chiarn, dy row Jeremiah er phadeyrys ny reddyn shoh. 2Eisht woaill Pashur er Jeremiah yn adeyr, as hug eh eh ayns ny sthockyn va liorish ard-yiat Venjamin, er-gerrey da thie’n Chiarn. 3As haink eh gy-kione laa-ny-vairagh, dy dug Pashur lesh Jeremiah ass ny sthockyn. Eisht dooyrt Jeremiah rish, Cha vel y Chiarn er n’enmys oo Pashur, agh Magor-missabib. 4Son myr shoh ta’n Chiarn dy ghra, Cur-my-ner, neem’s uss y yannoo dty atchim dhyt hene, as da ooilley dty chaarjyn, as tuittee ad liorish cliwe nyn noidyn, as ver dty hooillyn my-ner eh: as livrey-ym ooilley Judah gys laue ree Vabylon, as ver eh lesh ad ayns cappeeys gys Babylon, as stroie-ee eh ad lesh y chliwe. 5Ny-sodjey, livrey-ym ooilley niart yn ard-valley shoh, as ooilley yn cosney eck, as ooilley ny reddyn costal eck, as ooilley tashtaghyn reeaghyn Yudah livrey-ym gys laue nyn noidyn, nee ad y spooilley, as y ghoaill, as ver lhieu ad gys Babylon. 6As uss, Pashur, as ooilley ta cummal ayns dty hie, hed shiu ersooyl ayns cappeeys: as hig oo gys Babylon, as ayns shen yiow baase, as shen y raad bee oo er dty oanluckey, oo hene as ooilley dty chaarjyn, daue t’ou er n’yannoo phadeyrys foalsey.

7O Hiarn, Ghow dty choyrle’s niart orrym, as va mee fo marranys; t’ou uss ny s’troshey na mish, as ta’n varriaght ayd: ta mee ayns faghid gagh-laa, ta dy chooilley unnane jannoo craid jee’m. 8Son neayr’s loayr mee, dyllee mee, hrog mee my choraa noi tranlaase as spooilley; son dy row goo yn Chiarn ny oltooan dou, as faghid gagh-laa. 9Eisht dooyrt mee, Cha jean-yms genmys eh, chamoo loayr-ym arragh ’syn ennym echey: agh va e ghoo ayns my chree myr aile lossey jeight seose ayns my chraueyn; ve pian dou dy phlooghey eh, as cha row niart aym dy reayll eh fo.

10Son cheayll mee ymmodee dy my oltooan, lesh Magor-missabib: Cur magh yn goo, as adsyn, as ver mayd mygeayrt eh. Va ooilley my chaarjyn foalsey as sooill oc er my raaidyn, gra, Hoiggal dy jig miolagh ny raad, as dy vow mayd yn varriaght er, as slane cooilleeney nyn aigney. 11Agh ta’n Chiarn mârym’s myr fer-caggee niartal as atchimagh; shen-y-fa nee my hranlaasee tuittym, as cha vow ad yn varriaght; bee ad coodit lesh nearey; son cha jig eh lhieu; cha bee yn slane toyrt-mow oc dy bragh er ny yarrood. 12Agh, O Hiarn ny sheshaghtyn flaunyssagh, ta prowal yn vooinjer chairal, as cur-my-ner ny meeghyn as y cree, lhig dou fakin dty cherraghey trome orroo: son hood’s ta mee er n’osley my chooish. 13Gow-jee arrane gys y Chiarn, jean-jee yn Chiarn y voylley; son t’eh er livrey annym yn voght veih laue ny drogh-yantee.

14Dy doogh dy row yn laa ruggyr mee: ny lhig da’n laa ve bannit er hug my voir mee son y theihll. 15Dy doogh dy row da’n dooinney hug lesh y naight da my ayr, gra, Ta lhiannoo-mac er ny ruggey dhyt; cur-volley da. 16As lhig da’n dooinney cheddin ve myr ny ard-valjyn ren y Chiarn y stroie, as nagh ghow chymmey jeu; as lhig da yn eam caggee y chlashtyn ’sy voghrey, as yn yllaghey ec y vun-laa; 17Son nagh varr eh mee my daink mee er y theihll; as dy voddagh my voir er ve my oaie, as yn vreïn eck dy kinjagh trome jee’m. 18Cre’n-fa haink mee ass y vreïn dy akin deinys as trimshey, my laghyn dy ve ceaut ayns seaghyn?