CAB. XXII

1Myr shoh ta’n Chiarn dy ghra, Immee sheese gys thie ree Yudah, as loayr ayns shen ny goan shoh, 2As abbyr, Clasht rish goo yn Chiarn, O ree Yudah, ta dty hoie er stoyl-reeoil Ghavid, uss, as dty harvaantyn, as dty phobble ta goll stiagh er ny giattyn shoh; 3Myr shoh ta’n Chiarn dy ghra, Shirveish-jee briwnys cairagh as jeeragh, as livrey-jee eshyn ta tranlaasit veih laue yn tranlaasagh: as ny jean-jee aggair, ny tranlaase erbee er y joarree, yn lhiannoo gyn ayr, ny’n ven-treoghe, chamoo jean-jee fuill gyn-loght y gheayrtey ’syn ynnyd shoh. 4Son dy firrinagh my nee shiu er yn aght shoh, eisht hed stiagh er giattyn y thie shoh reeaghyn, soie er stoyl-reeoil Ghavid, markiagh ayns fainee as er cabbil, eh-hene, as e harvaantyn, as e phobble. 5Agh mannagh n’eaisht shiu rish ny goan shoh, Ta mee breearrey liorym pene, ta’n Chiarn dy ghra, dy bee’n thie shoh ny hraartys. 6Son myr shoh ta’n Chiarn dy ghra rish thie ree Yudah, T’ou uss Gilead dooys, as mullagh Lebanon: ny-yeih son shickyrys neem’s faasagh y yannoo jeed, as ard-valjyn gyn cummaltee. 7As ver-ym stroideryn dt’oï, dy chooilley unnane lesh e ghreinyn; as giaree ad sheese dty reih biljyn-cedar, as tilgee ad ’syn aile ad. 8As hed ymmodee ashoonyn shaghey yn ard-valley shoh, as jir ad dagh dooinney rish e naboo, Cre’n-fa ta’n Chiarn er n’yannoo myr shoh rish yn ard-valley mooar shoh? 9Eisht nee ad freggyrt, Er-yn-oyr dy vel ad er hreigeil conaant y Chiarn nyn Yee, as dy dug ad ooashley da jeeghyn joarree, as shirveish ad.

10Ny keayn-jee son y varroo, chamoo bee-jee ayns trimshey er e hon; agh jean-jee dobberan sharroo er e hon-syn ta goll ersooyl: son cha jig eh arragh thie, chamoo ver eh my-ner cheer e ghooghys. 11Son shoh myr ta’n Chiarn dy ghra mychione Shallum mac Yosiah, ree Yudah, ren reill lurg Josiah e ayr, as hie magh ass yn ynnyd shoh, Cha jig eh dy bragh gys y voayl shoh arragh: 12Agh yiow eh baase ayns cheer e chappeeys, as y cheer shoh cha jean eh fakin arragh.

13Smerg dasyn ta troggal e hie liorish molteyrys, as e hiamyryn liorish aggair; ta goaill obbyr e naboo fegooish faill, as nagh vel cur da leagh e laboraght; 14Ta gra, Trog-ym dou hene thie mooar, as shamyryn lhean; ta cummey magh da hene uinniagyn; as te ceilit lesh cedar, as paintit lesh vermilion! 15Vel oo smooinaghtyn dy bee dty reill’s foddey beayn er-yn-oyr dy vel oo coodaghey oo hene ayns cedar? Nagh ren dty ayr gee as giu, as nagh ren eh cormal briwnys as cairys, as eisht ve dy mie mârish? 16Ren eh briwnys cooish yn voght, as yn ymmyrchagh; eisht haink eh dy mie lesh: nagh row shoh son dy bione da mish? ta’n Chiarn dy ghra. 17Agh cha vel dty hooillyn’s as dty chree’s agh ooilley son saynt, as son deayrtey fuill gyn-loght, as son dewilys, as son tranlaase, dy yannoo eh. 18Shen-y-fa myr shoh ta’n Chiarn dy ghra mychione Jehoiakim mac Yosiah ree Yudah, Cha jean ad dobberan er e hon, gra, Ah treih my vraar! ny, Ah treih my huyr! cha jean ad dobberan er e hon, gra, Ah treih hiarn! ny, Ah treih e ghloyr! 19Agh hed eh er oanluckey lesh oanluckey assyl, sleaydit as tilgit magh cheu-mooie jeh giattyn Yerusalem.

20Immee seose er Lebanon, as cur eam; trog seose dty choraa ayns Bashan, as yllee veih ny raaidyn taaghit: son ta ooilley dty chaarjyn graihagh er n’gholl naardey. 21Loayr mee rhyt ayns dty vaynrys: agh dooyrt oo, Cha jean-ym geaishtagh: shoh va dty chliaghtey veih dty aegid, nagh dug oo biallys da my choraa. 22Nee’n gheay sheebey ersooyl ooilley dty vochillyn, as hed dty chaarjyn graihagh roue ayns cappeeys: shickyr eisht bee oo coodit lesh nearey as atchim son ooilley dty vee-chraueeaght. 23O chummaltagh Lebanon, ta jannoo dty edd ayns ny biljyn-cedar, kys nee oo gaccan tra hig pianyn ort, angaish myr t’ec ben er-troailt! 24Myr s’bio mee, ta’n Chiarn dy ghra, ga dy beagh Coniah mac Yehoiakim ree Yudah yn cowrey er my laue yesh, foast yinnin oo y raipey veih shen; 25As livrey-ym oo seose gys y laue ocsyn ta shirrey dty vioys, as gys y laue ocsyn ta aggle ort roish yn eddin oc, eer gys laue Nebuchadrezzar ree Vabylon, as gys laue ny Caldeanee. 26As neem’s oo y hilgey magh, as dty voir ren dty ymmyrkey, gys cheer yoarree, raad nagh ruggyr shiu; as ayns shen yiow shiu baase. 27Agh gys y cheer raad va nyn yeearree dy hyndaa, cha jig ad arragh. 28Vel y dooinney shoh Coniah ny yalloo brisht tilgit ry-lhiattee? nee saagh brisht eh nagh vel gys veg yn ymmyd; dy vel ad tilgit magh, eshyn as e luight, as ceaut stiagh ayns cheer quaagh daue? 29O ooir, ooir, ooir, clasht rish goo yn Chiarn: 30Myr shoh ta’n Chiarn dy ghra, scrieu-jee sheese yn dooinney shoh gyn sluight, dooinney nagh jean bishaghey ayns e laghyn: son cha jean fer hene jeh e luight bishaghey, dy hoie er stoyl-reeoil Ghavid, ny dy reill arragh ayns Judah.