CAB. XXIII

1Smerg da ny bochillyn ta cur naardey as skeayley kirree my hioltane! ta’n Chiarn dy ghra, 2Shen-y-fa myr shoh ta’n Chiarn, Jee Israel, dy ghra noi ny bochillyn ta harrish my phobble, Ta shiu er skeayley my hioltane, as er n’eiyrt ad ersooyl, as cha vel shiu er yeeaghyn daue: cur-my-ner, neem’s cooilleeney y ghoaill erriu son y drogh-yannoo eu, ta’n Chiarn dy ghra. 3As nee’m fooilliagh my hioltane y haglym ass dy chooilley heer raad ta mee er n’eiyrt ad, as ver-ym lhiam ad reesht gys nyn mwoailtchyn hene; as bee ad messoil as nee ad bishaghey. 4As soie-yms harrystoo bochillyn yeeaghys daue; as cha bee ad agglit arragh, ny atchimit, ny veg jeu caillit, ta’n Chiarn dy ghra.

5Cur-my-ner, ta ny laghyn cheet, ta’n Chiarn dy ghra, dy drog-yms seose gys David Banglane cairal, as nee Ree reill as bishaghey, as briwnys as ynrickys y chooilleeney er y thalloo. 6Rish y lhing echeysyn vees Judah er ny hauail, as nee Israel cummal ayns sauchys; as shoh yn ennym vees cowrit er, YN CHIARN YN YNRICKYS AINYN. 7Shen-y-fa, cur-my-ner, ta ny laghyn cheet, ta’n Chiarn dy ghra, nagh jir ad arragh, Ta’n Chiarn bio, hug lesh seose cloan Israel veih cheer Egypt; 8Agh, Ta’n Chiarn bio, hug lesh seose, as ren leeideil, rass thie Israel veih’n cheer twoaie, as veih dy chooilley heer raad ren mee ad y imman; as nee ad cummal ayns y cheer oc hene.

9Ta my chree brisht cheu-sthie jee’m kyndagh rish ny phadeyryn foalsey; ta ooilley my chraueyn er-creau: ta mee myr dooinney er-meshtey, as myr dooinney ta feeyn er ghoaill niart er, ayns my ghraih jeean gys y Chiarn, as gys goan e chasherickys. 10Son ta’n cheer lane maarderee; son kyndagh rish gweeaghyn as loo oaiagh, ta’n cheer dobberan, ta aberyn aalin yn aasagh chyrmit seose, as ta nyn gliaghtaghyn olk, as nyn booar gys drogh ymmyd. 11Son ta chammah yn phadeyr as y saggyrt mee-chrauee; eer ayns my hie hene ta mee er gheddyn yn vee-chraueeaght oc, ta’n Chiarn dy ghra. 12Shen-y-fa bee’n immeeaght oc myr raaidyn shliawney ’sy dorraghys; bee ad immanit er nyn doshiaght, as tuittee ad ayn: son ver-ym lhiam yn olk orroo, eer bleïn nyn gerraghey, ta’n Chiarn dy ghra. 13As ta mee er vakin ommijys ayns phadeyryn Samaria; t’ad er phadeyrys ayns Baal, as er chur my phobble Israel er-shaghryn. 14Ta mee er vakin myrgeddin ayns phadeyryn Yerusalem red feer atchimagh: t’ad brishey poosey, as gimmeeaght ayns breagyn; t’ad myrgeddin niartaghey laueyn ny drogh-yantee, nagh vel unnane erbee chyndaa veih e vee-chraueeaght: t’ad ooilley dooys myr Sodom, as ny cummaltee eck myr Gomorrah. 15Shen-y-fa shoh myr ta Chiarn ny sheshaghtyn flaunyssagh dy ghra mychione ny phadeyryn, Cur-my-ner, ver-ym daue ullymar dy ee, as ver-ym ushtey galley daue dy iu: son veih phadeyryn Yerusalem ta mee-chraueeaght er n’gholl magh fud ooilley’n cheer. 16Myr shoh ta Chiarn ny sheshaghtyn flaunyssagh dy ghra, Ny eaisht-jee rish goan ny phadeyryn ta phadeyrys diu; cha vel ad agh jannoo molteyrys erriu; t’ad loayrt ashlish ass nyn gree hene, as cha nee veih beeal y Chiarn. 17T’ad dy kinjagh gra roosyn ta soiaghey beg jeem’s, Ta’n Chiarn dy ghra, Bee shee eu; as rish dy chooilley unnane ta gimmeeaght lurg smooinaghtyn e chree hene t’ad gra, Cha jig olk erbee erriu. 18Son quoi t’er ve kionfenish ec coonceil y Chiarn, as ta er hoiggal, as er n’eaishtagh rish e ghoo? quoi ta dy gyere er choyrt tastey tra v’eh loayrt, as er chlashtyn eh? 19Cur-my-ner ta geay-chassee yn Chiarn er n’gholl magh ayns eulys, eer geay-chassee dewil; tuittee eh dy trome er kione ny mee-chrauee. 20Cha jean jymmoose yn Chiarn chyndaa, derrey t’eh jeant magh, as derrey t’eh er chooilleeney smooinaghtyn e chree: ayns ny laghyn jerrinagh bee slane toiggal eu jeh shoh. 21Cha vel mish er choyrt ny phadeyryn shoh er chaghteraght, ny-yeih t’ad er roie; cha vel mee er loayrt roo, ny-yeih t’ad er n’yannoo phadeyrys. 22Agh dy beagh ad er hassoo gys my choyrle, as v’er choyrt da my phobble toiggal jeh my ghoo, eisht veagh ad er hyndaa ad veih nyn raaidyn mee-chrauee, as veih nyn ghrogh-yannoo. 23Vel mee my Yee er-gerrey, ta’n Chiarn dy ghra, as nagh vel mee my Yee foddey jeh? 24Vod fer erbee eh-hene y cheiltyn ayns ynnydyn follit nagh vaik-yms eh? ta’n Chiarn dy ghra. Nagh vel mish lhieeney niau as thalloo? ta’n Chiarn dy ghra. 25Ta mee er chlashtyn cre dooyrt ny phadeyryn ren phadeyrys breagyn ayns my ennym’s, gra, Ta dreamal er ve aym, ta dreamal er ve aym. 26Caïd vees shoh ayns cree ny phadeyryn ta jannoo phadeyrys breagagh? dy jarroo, t’ad phadeyryn dy volteyrys ass y chree oc hene; 27Ta smooinaghtyn dy chur er my phobble dy yarrood my ennym’s lesh nyn ghreamallyn, t’ad ginsh dagh dooinney da e naboo, myr ren ny ayraghyn oc my ennym’s y yarrood son Baal. 28Yn phadeyr ta dreamal echey, lhig da e ghreamal y insh; as eshyn ta my ghoo’s echey, lhig da my ghoo y loayrt dy firrinagh. Cre ta’n coau ayns soylaghey da’n churnaght, ta’n Chiarn dy ghra. 29Nagh vel my ghoo’s myr aile? ta’n Chiarn dy ghra; as myr oayrd ta brishey yn chreg ayns peeshyn? 30Shen-y-fa, cur-my-ner, ta mish noi ny phadeyryn, ta’n Chiarn dy ghra, ta keiltyn my ghoan’s dy chooilley ghooinney veih e naboo. 31Cur-my-ner ta mish noi phadeyryn y chengey shliawn, ta’n Chiarn dy ghra, ta lhiasagh, as gra, T’eshyn gra. 32Cur-my-ner, ta mish noi adsyn ta branlaadee dreamallyn foalsey, ta’n Chiarn dy ghra, as ta dy insh ad, as cur my phobble er-shaghryn lesh nyn mreagyn, as nyn molteyrys; ga nagh dug mee ad er chaghteraght, chamoo hug mee currym erbee orroo: shen-y-fa cha bee ad jeh foaynoo erbee da’n pobble shoh, ta’n Chiarn dy ghra.

33As tra nee’n pobble shoh, ny yn phadeyr, ny saggyrt, fênaght jeed, gra, Cre ta errey yn Chiarn? eisht jir uss roo, Cre’n errey? Neem’s eer shiu y hreigeil, ta’n Chiarn dy ghra. 34As er son y phadeyr, as y saggyrt, as y pobble, nee gra, Errey’n Chiarn, goym’s son shickyrys kerraghey er y dooinney shen as e hie. 35Myr shoh jirrys shiu dagh dooinney rish e naboo, as dagh fer rish e vraar, Cre’n ansoor ta’n Chiarn er choyrt? as cre ta’n Chiarn er loayrt? 36As errey yn Chiarn cha jean shiu genmys arragh; son bee goan dagh dooinney yn errey echey hene: son ta shiu er chaghlaa goan y Jee bio, Chiarn ny sheshaghtyn flaunyssagh, yn Jee ainyn. 37Myr shoh jirrys oo rish y phadeyr, Cre’n ansoor ta’n Chiarn er choyrt dhyt? as, Cre ta’n Chiarn er ghra? 38Nish er son wheesh as dy vel shiu gra, Errey yn Chiarn; shen-y-fa myr shoh ta’n Chiarn dy ghra, Son dy vel shiu jannoo raa cadjin jeh’n ockle shoh, Errey yn Chiarn, as dy vel mee er chur shiu fo harey nagh jir shiu, Errey yn Chiarn; 39Shen-y-fa, cur-jee my-ner, neem’s, dy jarroo neem’s, shiuish y ghoaill ersooyl myr errey, as nee’m shiu y hreigeil, shiu hene, as yn ard-valley hug mee diuish as da nyn ayraghyn, as ver-yms shiu ass my hilley: 40As ver-ym lhiam shiu fo scammylt kinjagh, as nearey kinjagh, nagh bee dy leah er ny yarrood.