CAB. XXV

1Yn goo haink gys Jeremiah mychione ooilley phobble Yudah, ayns y chiarroo vleïn jeh Jehoiakim mac Yosiah ree Yudah, shen va yn chied vleïn jeh Nebuchadrezzar ree Vabylon; 2Shen loayr Jeremiah yn phadeyr rish ooilley pobble Yudah, as ooilley cummaltee Yerusalem, gra, 3Veih’n trass vleïn jeig dy Yosiah mac Amon ree Yudah, eer gys y laa jiu, (ta shen y trass vleïn as feed,) ta goo yn Chiarn er ny ve cheet hym, as ta mee er ve loayrt riu, girree dy moghey as loayrt; agh cha vel shiu er n’eaishtagh. 4As ta’n Chiarn er choyrt hiu ooilley e harvaantyn ny phadeyryn, girree dy moghey as coyrt magh ad; agh cha vel shiuish er n’eaishtagh, ny er chroymmey nyn gleaysh dy chlashtyn. 5Dooyrt adsyn, Chyndaa-jee reesht nish dy chooilley ghooinney veih e raad mee-chrauee, as veih nyn ghrogh-yannoo, as jean-jee cummal ’sy cheer hug y Chiarn diuish, as da nyn ayraghyn, veih sheeloghe gys sheeloghe: 6As ny eiyr-jee er jeeghyn joarree, dy hirveish ad, as dy chur ooashley daue, as ny jean-jee mish y vrasnaghey gys corree, lesh obbraghyn nyn laueyn; as voym’s cha jig skielley diu. 7Ny-yeih cha vel shiu er n’eaishtagh rhym, ta’n Chiarn dy ghra; myr shoh dy ghreinnaghey my yymmoose lesh obbraghyn nyn laueyn gys y choayl eu hene.

8Shen-y-fa myr shoh ta Chiarn ny flaunyssee dy ghra, Er-yn-oyr nagh vel shiu er n’eaishtagh rish my ghoan’s, 9Cur-my-ner, ver-ym fys as goym ooilley ashoonyn y twoaie, ta’n Chiarn dy ghra, as Nebuchadrezzar ree Vabylon my harvaant, as ver-ym lhiam ad noi yn cheer shoh, as noi ny cummaltee eck, as noi ooilley ny cheeraghyn shoh ta mygeayrt-y-mood, as stroie-ym ad ooilley, as nee’m ad dy ve son atchim, as son oltooan, as son traartys foddey-beayn. 10Ny sodjey, ver-ym ny host yn kiaull dy voggey, as yn kiaull dy vingys, coraa yn dooinney-poosee, as coraa ben y phoosee, feiyr ny claghyn-mwyllin, as soilshey yn chainle. 11As bee yn slane cheer ny aasagh, as ny atchim; as nee ny ashoonyn shoh shirveish ree Vabylon three-feed bleïn as jeih. 12As shen myr vees eh, ec kione three-feed bleïn as jeih, dy jean-yms ree Vabylon, as y cheer shen, y cherraghey, eer cheer ny Caldeanee, ta’n Chiarn dy ghra, son nyn mee-chairys, as bee eh ny hraartys foddey-beayn. 13As cooilleen-yms er y cheer shen ooilley my ghoan ta mee er n’ockley magh n’oï, eer ooilley ny ta scruit ’sy lioar shoh, myr ta Jeremiah er phadeyrys noi ooilley ny ashoonyn cheddin. 14Son nee ymmodee ashoonyn mooarey, as reeaghyn pooaral shirveish adsyn er yn aght cheddin: as neem’s ad y chooilleeney cordail rish nyn yannoo, as cordail rish obbyr ny laueyn oc hene.

15Son myr shoh ta’n Chiarn, Jee Israel, dy ghra rhym, Gow veih my laue cappan-feeyney yn eulys shoh, as lhig da ooilley ny ashoonyn hucsyn ta mee dy choyrt oo giu jeh. 16As nee ad giu, as bee ad er-meshtey as baanrit, kyndagh rish yn chliwe ver-yms magh ny mast’ oc. 17Eisht ghow mee yn cappan veih laue yn Chiarn, as hug mee er ooilley ny ashoonyn dy iu, hucsyn va’n Chiarn er choyrt mee: 18Ta shen dy ghra, Jerusalem, as ard-valjyn Yudah, as nyn reeaghyn, as nyn brinceyn, dy yannoo ad ny hraartys, as ny atchim, son flout, as faghid, as mollaght; (myr te ec y laa t’ayn jiu;) 19Pharaoh ree Egypt, as e hirveishee, as e phrinceyn, as ooilley e phobble. 20As slane shiartanse ny ashoonyn-quaagh as joarree, as ooilley reeaghyn thalloo Uz, as ooilley reeaghyn thalloo ny Philistinee, as Ashkelon, as Azzah, as Ekron, as fooilliagh Ashdod, 21Edom, as Moab, as cloan Ammon, 22As ooilley reeaghyn Tyre, as ooilley reeaghyn Zidon, as reeaghyn ny ellanyn cheu elley jeh’n aarkey, 23Dedan, as Tema, as Buz, as ooilley ny ta ayns ny corneilyn sodjey magh, 24As ooilley reeaghyn Arabia, as ooilley reeaghyn yn ymmodee pobble ta cummal ’syn aasagh, 25As ooilley reeaghyn Zimri, as ooilley reeaghyn Elam, as ooilley reeaghyn ny Medeyn, 26As ooilley reeaghyn y twoaie, foddey as gerrit, ooilley dy cheilley, as ooilley reeriaghtyn y theihll, ta er eaghtyr y thallooin; as nee ree Sheshach giu geiyrt orroo. 27Shen-y-fa jir oo roo, Myr shoh ta Chiarn ny sheshaghtyn flaunyssagh, Jee Israel, dy ghra, Iu-jee, as bee-jee er-meshtey, as jean-jee tilgey as tuittym, as ny irree-jee arragh, kyndagh rish y chliwe ver-yms ny mast’ eu. 28As my obbys ad goaill y cappan veih dty laue dy iu, eisht jir uss roo, Myr shoh ta Chiarn ny sheshaghtyn flaunyssagh dy ghra, Shegin diu son shickyrys giu. 29Son cur-my-ner, ta mee kiarail kerraghey son yn ard-valley ta enmyssit orrym’s, as jed shiuish gyn kerraghey erbee? Cha jed shiu gyn kerraghey; son ver-yms eam da’n chliwe dy gholl magh noi ooilley cummaltee yn ooir, ta Chiarn ny sheshaghtyn flaunyssagh dy ghra. 30Shen-y-fa nee oo phadeyrys ooilley ny goan shoh nyn ’oï, as gra roo, Nee’n Chiarn gyllaghey veih’n yrjid, as fockley-magh e choraa veih e chummal casherick; ver eh magh yllaghey atchimagh er e chummal; troggee eh seose e choraa noi ooilley cummaltee yn thallooin, myr adsyn ta broo ny messyn-feeyney. 31Hig feiyr gys eer ardjyn sodjey magh yn ooir; son ta cooish ec y Chiarn rish ny ashoonyn; nee eh e chooish hene y ghoaill seose noi dy chooilley vac dooinney; faagee eh magh ny mee-chrauee gys y chliwe, ta’n Chiarn dy ghra. 32Shoh myr ta Chiarn ny sheshaghtyn flaunyssagh dy ghra, Cur-my-ner, hed yn olk magh veih ashoon gys ashoon, as bee geay vooar chassee er ny hroggal veih ardjyn ny hooirey. 33As bee merriu yn Chiarn ec y laa shen veih kione dy kione ny hooirey: cha bee dobberan jeant harrystoo, chamoo hed ad er jaglym, ny er n’oanluckey; agh bee ad myr eoylley er y thalloo.

34Gull-jee, shiuish vochillyn, as keayn-jee; as seiy-jee shiu hene ’sy joan, shiuish leeideilee y chioltane: son ta laghyn nyn stroie as nyn scaalhean er jeet mygeayrt; as tuittee shiu ayns peeshyn myr saagh craie costal. 35As cha bee saase ec ny bochillyn dy chosney roue, ny ard-vooinjer y chioltane dy scapail. 36Bee eam keayney ny bochillyn, as yllaghey leeideilee yn chioltane, er ny chlashtyn: son ta’n Chiarn er chur naardey nyn aber. 37As ta ny ynnydyn-vaghee sheeoil lhieggit trooid jymmoose eulyssagh y Chiarn. 38T’eh er jeet magh ass e ooig, myr lion: son ta’n cheer oc follym-faase, kyndagh rish dewilys yn tranlaasagh, as eulys e yymmoose.