CAB. XXVI

1Ayns toshiaght reill Yehoiakim, mac Yosiah ree Yudah, haink y goo shoh veih’n Chiarn, gra, 2Myr shoh ta’n Chiarn dy ghra, Shass ayns cooyrt thie yn Chiarn, as loayr rish ooilley ard-valjyn Yudah, ta cheet dy ooashlaghey ayns thie yn Chiarn, ooilley ny goan, ta mee coyrt er dty churrym dy loayrt roo; ny lhig sheese fockle jeh: 3My she shen dy jean ad geaishtagh, as dy chooilley ghooinney chyndaa veih e ghrogh raad, dy voddyms myrgeddin chyndaa ersooyl yn olk ta mee kiarail nyn gour son ooilley nyn ghrogh-yannoo. 4As jir uss roo, Myr shoh ta’n Chiarn dy ghra, Mannagh n’eaisht shiuish rhym’s, dy immeeaght ayns my leigh’s ta mee er hoiaghey reue, 5Dy eaishtagh rish goan my harvaantyn ny phadeyryn, ta mee er choyrt er chaghteraght hiu, girree dy moghey, as cur magh ad; (agh cha vel shiuish er n’eaishtagh;) 6Eisht neem’s y thie shoh y yannoo myr Shiloh, as yn ard-valley shoh ny vollaght da ooilley ashoonyn yn ooir. 7As cheayll ny saggyrtyn, as ny phadeyryn, as ooilley’n pobble, Jeremiah loayrt ny goan shoh ayns thie yn Chiarn.

8Nish haink eh gy-kione, erreish da Jeremiah v’er loayrt ooilley ny va’n Chiarn er n’oardaghey da dy loayrt rish ooilley’n pobble, dy ren ny saggyrtyn, as ny phadeyryn, as ooilley’n pobble, eh y ghreimmey, gra, Bee oo son shickyrys er dty choyrt gy-baase. 9Cre’n-fa t’ou er n’yannoo phadeyrys ayns ennym y Chiarn, gra, Bee’n thie shoh myr Shiloh, as bee’n ard-valley shoh follym-faase fegooish cummaltagh? As va ooilley’n pobble er nyn jaglym noi Jeremiah ayns thie yn Chiarn.

10Tra cheayll princeyn Yudah ny reddyn shoh, eisht haink ad seose veih thie yn ree gys thie yn Chiarn, as hoie ad sheese liorish giat noa thie yn Chiarn. 11Eisht loayr ny saggyrtyn as ny phadeyryn rish ny princeyn, as rish ooilley’n pobble, gra, Ta’n dooinney shoh toilliu baase; son t’eh er n’yannoo phadeyrys noi’n ard-valley shoh, myr ta shiu er chlashtyn lesh nyn gleayshyn.

12Eisht loayr Jeremiah rish ooilley ny princeyn, as rish ooilley’n pobble, gra, Hug y Chiarn mee dy adeyrys noi’n thie shoh, as noi’n ard-valley shoh, ooilley ny goan ta shiu er chlashtyn. 13Shen-y-fa nish jean-jee nyn raaidyn as nyn ymmyrkey-bea y lhiasaghey, as bee-jee biallagh da coraa yn Chiarn yn Jee eu; as nee yn Chiarn yn briwnys y chaghlaa, t’eh er n’ockley magh nyn ’oï. 14Er my hon’s, cur-my-ner, ta mee ayns nyn laueyn; jean-jee rhym myr hee shiu mie as cooie. 15Agh toig-jee son shickyrys, my ver shiu mee dy baase, ver shiu lhieu son shickyrys fuill neu-chyndagh erriu hene, as er yn ard-valley shoh, as er ny cummaltee eck: son dy firrinagh-focklagh hug y Chiarn mish magh hiu, dy loayrt ooilley ny goan shoh ayns nyn glashtyn.

16Eisht dooyrt ny princeyn as ooilley’n pobble rish ny saggyrtyn, as rish ny phadeyryn, Cha vel y dooinney shoh toilchin baase; son t’eh er loayrt rooin ayns ennym y Chiarn nyn Yee. 17Eisht hass seose shiartanse jeh shanstyr y cheer, as loayr ad rish slane sheshaght yn phobble, gra, 18Ren Micah yn Morasthite phadeyrys rish lhing Hezekiah ree Yudah, as loayr eh rish ooilley pobble Yudah, gra, Myr shoh ta Chiarn ny sheshaghtyn flaunyssagh dy ghra, Bee Zion traaueit myr magher, as bee Jerusalem jeant ny holtanyn, as yrjid y thie myr ardjyn ny keylley. 19Dug Hezekiah ree Yudah as ooilley Judah eshyn gy-baase? nagh ren eh aggle y ghoaill roish y Chiarn, as guee gys y Chiarn, as ren y Chiarn yn vriwnys y hyndaa v’eh er n’ockley magh nyn ’oï? Myr shoh oddagh shinyn v’er dayrn briwnys trome er ny anmeenyn ain hene. 20As va dooinney myrgeddin ren phadeyrys ayns ennym y Chiarn, Urijah mac Shemaiah veih Kirjath-jearim, ren phadeyrys noi yn ard-valley shoh, as noi yn cheer shoh, casley rish ooilley goan Yeremiah: 21As tra cheayll Jehoiakim y ree, as ooilley e ard-gheiney, as ooilley ny princeyn, ny goan echey, va’n ree kiarit dy choyrt gy-baase eh; agh tra cheayll Urijah shoh, va aggle er, as chossyn eh roish, as hie eh sheese gys Egypt: 22As hug Jehoiakim y ree deiney gys Egypt, eer Elnathan mac Achbor, as shiartanse elley mârish gys Egypt: 23As hug ad lhieu Urijah veih Egypt; as livrey ad eh gys laue y ree, hug er dy ve er ny varroo lesh y chliwe, as e chorp marroo dy ve er ny oanluckey ayns oaiaghyn ny kimmee. 24Ny-yeih, va laue Ahikam mac Shaphan marish Jeremiah, nagh row eh er ny livrey seose gys laueyn y phobble dy choyrt eh dy baase.