CAB. XXVIII

1As haink eh gy-kione ’sy vleïn cheddin, ayns toshiaght reill Zedekiah ree Yudah, ’sy chiarroo vleïn, as ayns y wheiggoo vee, dy ren Hananiah mac Azur yn phadeyr, va jeh Gibeon, loayrt rhym ayns thie yn Chiarn, fenish ny saggyrtyn as ooilley’n pobble, gra, 2Myr shoh ta Chiarn ny flaunyssee, Jee Israel, loayrt as gra, Ta mee er vrishey quing ree Vabylon. 3Roish slane daa vleïn ver-ym lhiam gys yn ynnyd shoh ooilley siyn thie yn Chiarn ren Nebuchadnezzar ree Vabylon goaill ersooyl veih’n voayl shoh, as hug eh lesh ad gys Babylon: 4As ver-ym lhiam reesht gys y voayl shoh Jeconiah mac Yehoiakim ree Yudah, marish ooilley cappeeyn Yudah, hie gys Babylon, ta’n Chiarn dy ghra: son brish-yms quing ree Vabylon.

5Eisht dooyrt y phadeyr Jeremiah rish y phadeyr Hananiah, fenish ny saggyrtyn as ooilley’n pobble, va nyn shassoo ayns thie yn Chiarn, 6Dooyrt eer y phadeyr Jeremiah, Amen: dy jean y Chiarn myr shen; dy gooilleen y Chiarn dty ghoan t’ou er loayrt, dy chur thie reesht veih Babylon gys yn ynnyd shoh siyn thie yn Chiarn, as ooilley ny hug ad lhieu ersooyl ayns cappeeys. 7Ny-yeih, eaisht uss nish rish y goo shoh ta mish loayrt ayns dty chleayshyn, as ayns clashtyn ooilley’n pobble shoh; 8Ren ny phadeyryn ta er ny ve roym’s as royd’s ’sy chenn earish phadeyrys chammah noi ymmodee cheeraghyn, as reeriaghtyn niartal, mychione caggey, as seaghyn, as cramp. 9Yn phadeyr ta phadeyrys jeh shee, tra hig goo yn adeyr shen gy-kione, eisht bee’n phadeyr cronnit dy vel yn Chiarn dy firrinagh er choyrt eh. 10Eisht ghow Hananiah yn phadeyr yn whing jeh mwannal y phadeyr Jeremiah, as ren eh brishey eh. 11As loayr Hananiah fenish ooilley’n pobble, gra, Myr shoh ta’n Chiarn dy ghra, Er yn aght cheddin brish-yms quing Nebuchadnezzar ree Vabylon veih mwannal dy chooilley ashoon, cheu-sthie jeh slane daa vleïn. As hie yn phadeyr Jeremiah roish. 12Eisht haink goo yn Chiarn gys Jeremiah yn phadeyr, (erreish da’n phadeyr Hananiah brishey yn whing veih mwannal yn adeyr Jeremiah,) gra, 13Immee as abbyr rish Hananiah, gra, Myr shoh ta’n Chiarn dy ghra, T’ou er vrishey ny quingyn fuygh; agh nee oo jannoo ’syn ynnyd oc quingyn yiarn. 14Son myr shoh ta Chiarn ny flaunyssee, Jee Israel, dy ghra, Ta mee er choyrt quing yiarn er mwannal ooilley ny ashoonyn shoh, dy vod ad shirveish Nebuchadnezzar ree Vabylon; as nee ad shirveish eh: as ta mee er choyrt dasyn beïyn y vagheragh myrgeddin.

15Eisht dooyrt y phadeyr Jeremiah rish yn adeyr Hananiah, Eaisht rhym nish, Hananiah, Cha vel yn Chiarn er dty choyrt; agh t’ou cur er y pobble shoh dy hreishteil ayns breg. 16Shen-y-fa myr shoh ta’n Chiarn dy ghra, Cur-my-ner, neem’s uss y scughey veih eaghtyr y thallooin: eer ’sy vleïn shoh hene yiow baase, son dy vel oo er n’ockley magh mee-viallys noi yn Chiarn. 17Myr shen hooar y phadeyr Hananiah baase yn vleïn cheddin, ’sy chiaghtoo vee.