CAB. XXIX

1Nish she shoh bree yn screeuyn hug Jeremiah yn phadeyr veih Jerusalem gys y chanstyr va er-mayrn jeusyn hie rhymboo nyn gappeeyn, as gys ny saggyrtyn, as ny phadeyryn, as gys ooilley’n pobble va Nebuchadnezzar er chur lesh ersooyl ayns cappeeys veih Jerusalem gys Babylon. 2(Erreish da Jeconiah yn ree, as y ven-reïn, as ny shamyrderyn, princeyn Yudah as Yerusalem, as ny seyir, as ny gaauenyn, v’er n’immeeaght ass Jerusalem,) 3Liorish laue Elasah mac Shaphan, as Gemariah mac Hilkiah, (hug Zedekiah ree Yudah gys Babylon gys Nebuchadnezzar ree Vabylon,) gra, 4Myr shoh ta Chiarn ny flaunyssee, Jee Israel, dy ghra rish y slane cappeeys, ta mee er choyrt ersooyl veih Jerusalem gys Babylon, 5Trog-jee thieyn, as cum-jee ayndoo; as soie-jee garaghyn, as ee-jee yn mess oc; 6Poose-jee mraane, as jean-jee mec as inneenyn y gheddyn; as gow-jee mraane son ny mec eu, as cur-jee ny inneenyn eu ayns poosey, dy vod ad gymmyrkey mec as inneenyn; dy vod shiu bishaghey ayns shen, as gyn ve er nyn leodaghey. 7As shir-jee shee ard-valley nyn gappeeys, gys shen ta mish er choyrt shiu, as gow-jee padjer gys y Chiarn er e son: son ayns y chee ecksh bee yn shee euish.

8Son myr shoh ta Chiarn ny sheshaghtyn flaunyssagh, Jee Israel, dy ghra, Ny lhig da ny phadeyryn eu, as ny fallogyssee, ta nyn mastey, shiu y volley, as ny cur-jee geill da ny dreamallyn eu ta shiu er ghreamal. 9Son t’ad jannoo phadeyrys foalsey diu ayns my ennym’s; cha vel mish er choyrt ad, ta’n Chiarn dy ghra.

10Son shoh myr ta’n Chiarn dy ghra, Lurg diu v’er n’yannoo magh three-feed bleïn as jeih ec Babylon, jeeagh-yms erriu, as cooilleen-yms my ockle mie erriuish, ayns coyrt erriu dy hyndaa reesht gys yn ynnyd shoh. 11Son ta fys aym cre t’ayns my chree nyn gour, ta’n Chiarn dy ghra, smooinaghtyn dy hee, as cha nee dy cherraghey, dy chur diu yn jerrey ta shiu jerkal er y hon. 12Eisht nee shiu geamagh orrym, as gowee shiu padjer hym’s, as eaisht-yms riu. 13As nee shiu m’y hirrey, as m’y gheddyn magh, tra nee shiu briaght er my hon lesh ooilley nyn gree. 14As yiow shiu mish foayroil diu, ta’n Chiarn dy ghra; as chyndaa-yms ersooyl yn cappeeys eu, as neem’s shiu y haglym ass dy chooilley ashoon, as veih dy chooilley ynnyd, raad ta mee er n’eiyrt shiu, dooyrt y Chiarn; as ver-ym lhiam shiu reesht gys y voayl veih shen deiyr mee shiu gys cappeeys.

15Son dy vel shiu er ghra, Ta’n Chiarn er hroggal seose dooin phadeyryn ayns Babylon; 16Toig-jee dy nee shoh goan y Chiarn mychione y ree ta ny hoie er stoyl-reeoil Ghavid, as mychione ooilley’n pobble ta cummal ’syn ard-valley shoh, as mychione ny braaraghyn eu nagh vel er n’gholl magh mêriu ayns cappeeys; 17Ad shoh goan Chiarn ny sheshaghtyn flaunyssagh, Cur-my-ner, ver-yms orroo yn cliwe, yn ghortey, as y chramp, as nee’m ad y yannoo myr figgyn loau, nagh vod ve eeit, t’ad cha olk shen. 18As ver-ym eiyrtys orroo lesh y chliwe, yn ghortey, as y chramp, as nee’m ad y livrey dy ve scughit gys dy chooilley reeriaght ’sy theihll, dy ve son mollaght, as atchim, as faghid, as an-ghoo, mastey dy chooilley ashoon raad ta mee er n’eiyrt ad: 19Er-yn-oyr nagh vel ad er choyrt geill da my ghoan, ta’n Chiarn dy ghra, loayr mee roo liorish my hirveishee ny phadeyryn, girree dy moghey as dy choyrt ad magh; agh cha n’eaishtagh shiu, ta’n Chiarn dy ghra.

20Clasht-jee, er-y-fa shen, goo yn Chiarn, ooilley shiuish jeh’n chappeeys, ta mee er choyrt veih Jerusalem gys Babylon: 21Myr shoh ta Chiarn ny flaunyssee, Jee Israel, dy ghra, mychione Ahab mac Cholaiah, as Zedekiah mac Vaaseiah, ta phadeyrys breg diu ayns my ennym, Cur-my-ner livrey-yms ad gys laue Nebuchadrezzar ree Vabylon, as nee eh ad y varroo kiongoyrt rish ny sooillyn eu; 22As my-nyn-gione bee mollaght-mynney troggit liorish ooilley cappeeys Yudah ta ayns Babylon, gra, Dy jean y Chiarn rhyt’s myr ren eh rish Zedekiah, as rish Ahab, ren ree Vabylon y roastey ’syn aile; 23Son dy vel ad er n’yannoo dy naareydagh ayns Israel, as er vrishey-poosey rish mraane nyn naboonyn, as er loayrt goan breagagh ayns my ennym, red nagh doardee mee daue: aym’s ta fys er shoh, as ta mee my eanish orroo, ta’n Chiarn dy ghra.

24Myr shoh nee oo loayrt myrgeddin rish Shemaiah yn Nehelamite, gra, 25Myr shoh ta Chiarn ny flaunyssee, Jee Israel, loayrt as gra, Er-yn-oyr dy vel oo er choyrt screeunyn ayns dty ennym hene gys ooilley cummaltee Yerusalem, as gys Zephaniah mac Vaaseiah, yn saggyrt, as gys ooilley ny saggyrtyn, gra, 26Ta’n Chiarn er n’yannoo uss dty haggyrt ayns ynnyd Yehoiada yn saggyrt, shiuish dy ve fir-oik ayns thie yn Chiarn, son dy chooilley ghooinney ta ass e cheeayll, as goaill er hene dy ve phadeyr, dy choyrt eh ayns pryssoon, as ayns ny sthockyn: 27Nish er-y-fa shen, kys te dy vel oo lhiggey lesh Jeremiah t’ayns Anathoth, ta soiaghey seose eh-hene son phadeyr diu? 28Son yn oyr shen hug eh fys hooin ayns Babylon, gra, Ta’n cappeeys shoh foddey-farraghtyn: trog-jee thieyn, as cum-jee ayndoo: as soie-jee garaghyn, as ee-jee yn mess oc. 29As lhaih Zephaniah yn saggyrt yn screeuyn shoh ayns clashtyn Yeremiah yn phadeyr.

30Eisht haink goo yn Chiarn gys Jeremiah, gra, 31Cur fys hucsyn ooilley jeh’n chappeeys, gra, Myr shoh ta’n Chiarn dy ghra mychione Shemaiah yn Nehelamite, Er-yn-oyr dy vel Shemaiah er n’yannoo phadeyrys diuish, as cha dug mish eh, as hug eh erriuish treishteil ayns breg; 32Shen-y-fa shoh myr ta’n Chiarn dy ghra, Cur-my-ner, goyms kerraghey er Shemaiah yn Nehelamite, as er e luight: cha bee mac dooinney jeh faagit dy vaghey mastey yn pobble; chamoo nee eh fakin yn foays shen neem’s jannoo son my phobble, ta’n Chiarn dy ghra, er-yn-oyr dy vel eh er n’ynsaghey mee-viallys noi’n Chiarn.