CAB. XXX

1Yn goo haink gys Jeremiah veih’n Chiarn, gra, 2Myr shoh ta’n Chiarn, Jee Israel, loayrt, gra, Scrieu ayns lioar ooilley ny goan ta mee er loayrt rhyt’s. 3Son cur-my-ner, ta ny laghyn cheet, ta’n Chiarn dy ghra, dy jyndaa-yms reesht cappeeys my phobble Israel as Judah, ta’n Chiarn dy ghra; as ver-yms orroo dy hyndaa gys y cheer hug mee da nyn ayraghyn, as yiow ad eh ayns nyn gummal.

4As shoh ny goan loayr y Chiarn mychione Israel, as mychione Judah. 5Son myr shoh ta’n Chiarn dy ghra, Ta shin er chlashtyn coraa dy chraa, dy aggle, as cha nee dy hee. 6Fênee-jee nish, as jeeagh-jee my ta dooinney er-troailt er lhiannoo? cre’n-fa eisht ta mee fakin dy chooilley ghooinney as e laueyn er e veeghyn, myr ben er-troailt, as drogh neeal er dy chooilley eddin? 7Ah treih! son s’mooar seaghnagh vees y laa shen, laa nagh row rieau y lheid; eer earish hrimshagh Yacob; agh yiow eh livrey-ys. 8Son hig eh gy-kione er y laa shen, ta Chiarn ny flaunyssee gra, dy brish-yms yn whing echey jeh dty wannal, as scolt-yms dty yeulaghyn, as cha bee eh ny-sodjey fo ammys joarreeyn: 9Agh shirveishee ad yn Chiarn y Jee oc hene, as David nyn ree, eshyn trog-yms seose daue.

10Shen-y-fa ny gow aggle, O my harvaant Jacob, ta’n Chiarn dy ghra; as ny lhig sheese, dty chree, O Israel: son cur-my-ner saue-yms oo veih foddey, as dty luight veih cheer nyn gappeeys; as nee Jacob chyndaa, as bee eh ayns shee as sauchys, as cha bee eh ayns aggle roish noid erbee. 11Son ta mish mayrt, ta’n Chiarn dy ghra, dy dty hauail: ga dy jean-yms slane jerrey er dy chooilley ashoon raad ta mee er dty skeayley, foast cha jean-yms slane jerrey jeed’s; agh smaght-yms oo ayns myghin, as cha vaag-ym oo ooilley-cooidjagh gyn kerraghey. 12Son shoh myr ta’n Chiarn dy ghra, Ta dty vroo baasoil, as ta dty lhott dewil: 13Son cha vel ayd fer-lhee dy dty choyrlaghey, as dy hoïlley dty lhottyn: cha vel ayd veg ny saaseyn dy lheihys. 14Ta ooilley dty ghraihderyn er dty yarrood; cha vel nyn aigney hood: son ta mee er dty lhottey lesh lhott noidey, lesh smaghtaghey fer dewil, son mooadys dty vee-chairys; son dy row dty pheccaghyn ymmodee. 15Kys dy vel oo gaccan harrish dty heaghyn? cha vel saase cour dty hrimshey kyndagh rish ymmodee dty vee-chairys: son dy vel dty pheccaghyn er n’ghoaill niart ta mee er n’yannoo myr shoh rhyt. 16Shen-y-fa bee adsyn ooilley ta son coyrt oo naardey, ad-hene currit naardey; as hed ooilley dty noidyn gyn cappeeys; as bee adsyn ta dy dty spooilley son spooilley ad-hene; adsyn ooilley ta dty chraghey ver-ym seose gys y chragh. 17Son neem’s uss y choural reesht, as bee dty lhottyn er ny lheihys, ta’n Chiarn dy ghra; son ren ad dty oltooan myr eebyrtagh, gra, Shoh Zion, nagh vel dooinney erbee dy yeearree.

18Shoh myr ta’n Chiarn dy ghra, Cur-my-ner, ver-ym lhiam reesht cappeeys cabbaneyn Yacob, as bee myghin aym er ny ynnydyn-vaghee echey; as bee yn ard-valley troggit reesht er e shenn undin, as bee yn chiamble shassoo myr ve roïe. 19As assdoo hig magh toyrt-booise, as yn coraa ocsyn t’ayns ard-ghennallys: as nee’m ad y vishaghey, as cha nee beggan vees ad; ver-yms orroo dy ve ashoon ooasle, as cha bee ad er ny leodaghey. 20Bee yn chloan oc myrgeddin myr ’sy chenn earish, as bee slane theay my phobble ayns sauchys kiongoyrt rhym, as hig-yms chion er ooilley nyn dranlaasee. 21As bee ny deiney ooasle oc jeu hene, as voish ny mast’ oc hene nyn giannoort; as ver-yms er dy heet er-gerrey dou, as bee eh liorym: son quoi elley t’er ghoaill ayns e chree dy heet cha faggys dooys? ta’n Chiarn dy ghra. 22As bee shiuish yn pobble aym’s, as beem’s yn Jee euish. 23Cur-my-ner, ta geay-chassee yn Chiarn goll magh lesh eulys, geay-chassee kinjagh; nee eh tuittym lesh pian er king ny mee-chrauee. 24Cha jean jymmoose eulyssagh y Chiarn chyndaa, derrey t’eh jeant magh, as derrey t’eh er chooilleeney slane kiarail e chree: ayns ny laghyn jerrinagh toiggys shiu shoh.