CAB. XXXII

1Yn goo haink gys Jeremiah veih’n Chiarn, ayns y jeihoo vleïn jeh reill Zedekiah ree Yudah, va yn hoghtoo vleïn jeh Nebuchadrezzar. 2Shen y traa ren armeeyn ree Vabylon cruinnaghey stiagh Jerusalem: as va Jeremiah yn phadeyr jeight seose ayns cooyrt y phryssoon, va liorish thie ree Yudah. 3Son va Zedekiah ree Yudah er yeigh seose eh, gra, Cre’n-fa t’ou uss phadeyrys, as gra, Myr shoh ta’n Chiarn dy ghra, Cur-my-ner, ver-yms yn ard-valley shoh gys laue ree Vabylon, as nee eh goaill eh; 4As cha jean Zedekiah ree Yudah scapail ass laue ny Caldeanee, agh bee eh dy shickyr livreït gys laue ree Vabylon, as nee eh loayrt rish beeal ry beeal, as ver e hooillyn my-ner ny sooillyn echeysyn; 5As ver eh lesh Zedekiah gys Babylon, as bee eh ayns shen derrey yeeagh-yms er, ta’n Chiarn dy ghra: ga dy jean shiu caggey rish ny Caldeanee, cha vow shiu laue yn eaghtyr?

6As dooyrt Jeremiah, Haink goo yn Chiarn hym’s, gra, 7Cur-my-ner, hig Hanameel, mac Shallum, dty naim, hood’s, gra, Kionnee yn magher aym’s t’ayns Anathoth; son ta’n cairys feayslee aynyd’s dy chionnaghey eh. 8Myr shen haink Hanameel, mac my naim, hym, ayns cooyrt y phryssoon, rere goo yn Chiarn, as dooyrt eh rhym, Kionnee my vagher, ta mee guee ort, ta ayns Anathoth, ayns cheer Venjamin: son ta’n cairys eiraght aynyd’s, as lhiat’s ta’n feaysley; kionnee eh dhyt hene. Eisht hoig mee dy nee goo yn Chiarn va shoh. 9As chionnee mee yn magher veih Hanameel, mac my naim, va ayns Anathoth, as howse mee yn argid da, eer shiaght shekelyn jeig dy argid. 10As hug mee my laue as seal gys y vargane, as ghow mee feanishyn, as howse mee yn argid da ayns ny meihaghyn. 11Myr shoh ghow mee yn bargane-kionnee, chammah shen va sealit cordail rish y leigh as y cliaghtey, as shen va foshlit. 12As hug mee yn bargane-kionnee da Baruch mac Neriah, mac Vaaseiah, ayns shilley Hanameel mac my naim, as kiongoyrt rish ny feanishyn hug nyn laueyn gys yn vargane-kionnee, fenish ooilley ny Hewnyn va nyn soie ayns cooyrt y phryssoon.

13As hug mee currym er Baruch ’syn eanish ocsyn, gra, 14Myr shoh ta Chiarn ny flaunyssee, Jee Israel, dy ghra, Gow ny gioalteenyn shoh, yn bargane-kionnee shoh, chammah shen ta sealit, as y copy ta foshlit, as cur ad ayns saagh craie, dy reayll ad son foddey dy hraa: 15Son shoh myr ta Chiarn ny flaunyssee, Jee Israel, dy ghra, Bee cummaltee reesht ’sy cheer shoh, as bee oc thieyn, as magheryn, as garaghyn-feeyney.

16Nish tra va mee er livrey yn bargane-kionnee da Baruch mac Neriah, ghow mee padjer gys y Chiarn, gra, 17O Hiarn Yee, cur-my-ner, t’ou uss er chroo niau as thalloo liorish dty phooar niartal as dty roih sheeynt magh, as dhyt’s cha vel nhee erbee ro ghoillee: 18T’ou soilshaghey kenjallys-ghraihagh da thousaneyn, as cooilleeney mee-chairys ny ayraghyn gys oghrish nyn gloan nyn yeï: yn Jee mooar as niartal, Chiarn ny flaunyssee yn ennym echeysyn, 19Mooar ayns coyrle, as pooaral ayns dty obbraghyn: (son ta dty hooillyn foshlit er ooilley raaidyn cloan gheiney, dy choyrt da dagh unnane cordail rish e raaidyn, as cordail rish mess e obbraghyn:) 20T’ou er hoilshaghey cowraghyn as yindyssyn ayns cheer Egypt, as ayns Israel, as ayns ashoonyn elley, as gys y laa t’ayn jiu t’ou er n’yannoo ennym ooasle dhyt hene; 21As t’ou er choyrt lhiat magh dty phobble Israel ass cheer Egypt, lesh cowraghyn, as yindyssyn, as lesh laue niartal, as roih sheeynt magh, as lesh atchim mooar; 22As t’ou er hoiaghey ad ’sy cheer shoh, ren oo breearrey da nyn ayraghyn dy choyrt daue, cheer palchey ayns bainney as mill; 23As haink ad stiagh ayn, as ve oc ayns nyn gummal; agh cha dug ad biallys da dty choraa, chamoo jimmee ad ayns dty leigh; cha vel ad er n’yannoo veg jeh ooilley ny t’ou er harey daue dy yannoo; shen-y-fa t’ou er choyrt orroo ooilley’n kerraghey trome shoh. 24Cur-my-ner ny tooryn-caggee: t’ad er jeet gys yn ard-valley dy ghoaill eh; as ta’n ard-valley livreït gys laue ny Caldeanee ta caggey n’oï, lesh y chliwe as y ghortey, as y phaitt: as ta dty ghoan er nyn gooilleeney; as cur-my-ner, t’ou dy akin eh. 25As t’ou er ghra rhym, O Hiarn Yee, kionnee yn magher son argid, as gow feanishyn; ga dy vel yn ard-valley er ny choyrt gys laue ny Caldeanee.

26Eisht haink goo yn Chiarn gys Jeremiah, gra, 27Cur-my-ner, mish y Chiarn Jee harrish dy chooilley chretoor: vel red erbee ro ghoillee dooys? 28Shen-y-fa myr shoh ta’n Chiarn dy ghra, Cur-my-ner, livrey-yms yn ard-valley shoh gys laue ny Caldeanee, as gys laue Nebuchadrezzar ree Vabylon, as nee eshyn goaill eh. 29As hig ny Caldeanee ta caggey noi yn ard-valley shoh, as ver ad aile ayns yn ard-valley shoh, as loshtee ad eh, marish ny thieyn er ny mulleeyn oc t’ad er hebbal incense da Baal, as er gheayrtey magh ourallyn-feeyney gys jeeghyn joarree, dy vrasnaghey my yymmoose. 30Son cha vel cloan Israel, as cloan Yudah, er n’yannoo monney agh ynrycan olk kiongoyrt rhym veih nyn aegid: son ta cloan Israel ooilley-cooidjagh er vrasnaghey my yymmoose lesh obbyr nyn laueyn, ta’n Chiarn dy ghra. 31Son ta’n ard-valley shoh er ve dooys oyr corree as eulys, veih’n laa hrog ad eh, eer gys y laa t’ayn jiu, as derrey hed eh er scughey ass my hilley; 32Kyndagh rish ooilley yn drogh-yannoo ta cloan Israel as cloan Yudah er chur-rish dy my vrasnaghey gys corree, ad-hene, nyn reeaghyn, nyn brinceyn, nyn saggyrtyn, as ny phadeyryn oc, marish deiney Yudah, as fir-vaghee Yerusalem. 33Son t’ad er jyndaa cooyl rhym, as cha nee nyn oaie orrym: ga dy dynsee mee ad, girree dy moghey as cur roue, ny-yeih cha vel ad er n’eaishtagh dy ghoaill ynsagh. 34Agh hoie ad seose nyn yallooyn eajee ayns y thie ta enmyssit orrym, dy yannoo eh an-chasherick. 35As hrog ad altaryn Vaal, ta ayns coan mac Hinnom, dy choyrt er nyn mec as nyn inneenyn dy gholl trooid yn aile gys Molech, red nagh doardee mee daue, chamoo haink eh ayns my aigney, dy jinnagh ad lheid yn eajeeys shoh, dy hayrn Judah fo loght peccah. 36Agh nish er-y-fa shen, myr shoh ta’n Chiarn, Jee Israel, dy ghra, mychione yn ard-valley shoh, jeh ta shiu gra, Bee eh livreït gys laue ree Vabylon lesh y chliwe, yn ghortey, as y phaitt. 37Cur-my-ner, chaglym’s ad ass dy chooilley heer raad deiyr mee ad ayns my chorree, as ayns my eulys, as my yymmoose hrome; as ver-ym lhiam ad reesht gys yn ynnyd shoh, as ver-yms orroo dy chummal ayns sauchys: 38As bee adsyn yn pobble aym’s, as beem’s yn Jee ocsyn: 39As ver-yms daue un chree, as un chredjue, dy vod ad aggle y ghoaill roym son dy bragh, son y foays oc hene, as nyn gloan nyn yeï: 40As neem’s conaant foddey beayn y yannoo roo, nagh jyndaa-yms ersooyl voue, agh dy jean-yms mie daue; as ver-yms my aggle ayns nyn greeaghyn, nagh jean ad m’y hreigeil. 41Neem’s eer boggey ’ghoaill harrystoo dy yannoo mie daue, as ver-ym daue cummal shickyr ’sy cheer shoh lesh ooilley my chree, as ooilley my annym. 42Son shoh myr ta’n Chiarn dy ghra, ’Naght myr ta mee er choyrt ooilley’n kerraghey trome shoh er y pobble shoh, ver-ym daue myrgeddin ooilley’n mie yiall mee daue. 43As bee magheryn kionnit ’sy cheer shoh, jeh ta shiu gra, Te treigit fegooish dooinney ny baagh, te er ny choyrt gys laue ny Caldeanee. 44Nee sleih kionnaghey magheryn son argid, as ver ad nyn laueyn as sealyn gys barganeyn, as gowee ad feanishyn ayns cheer Venjamin, as ayns ny ardjyn mysh Jerusalem, as ayns ard-valjyn Yudah, as ayns ard-valjyn ny sleityn, as ayns ard-valjyn ny glionney, as ayns ard-valjyn y jiass: son ver-yms chyndaa da’n chappeeys oc, ta’n Chiarn dy ghra.