CAB. XXXIII

1Ny-sodjey, haink goo yn Chiarn gys Jeremiah yn nah cheayrt, (choud’s v’eh foast ny phryssoonagh ayns cooyrt y phryssoon,) gra, 2Myr shoh ta’n Chiarn dy ghra, ren y seihll y chroo, yn Chiarn ren eh y chummey, as soiaghey magh eh; ta’n Chiarn yn ennym echey; 3Eïe orrym’s, as nee’m oo y reggyrt, as jeeagh-ym dhyt reddyn mooarey as yindyssagh, nagh vel toiggal ad jeu. 4Son shoh myr ta’n Chiarn, Jee Israel, gra, mychione thieyn yn ard-valley shoh, as mychione thieyn reeaghyn Yudah, ta lhieggit liorish ny tooryn-caggee, as lesh y chliwe; 5T’ad cheet dy chaggey rish ny Caldeanee, agh she dy lhieeney ad lesh kirp deiney marroo, ta mish er choyrt gy-baase ayns my chorree, as ayns my eulys, as son ooilley yn olkys oc ta mee er hyndaa my eddin veih’n ard-valley shoh. 6Cur-my-ner, ver-yms lhiam huggey slaynt as couyr, as nee’m ad y lheihys, as soilshee-ym daue mooarane shee as ynrickys. 7As ver-ym chyndaa da cappeeys Yudah, as cappeeys Israel, as trog-yms ad myr ec y toshiaght. 8As nee’m ad y ghlenney veih ooilley yn vee-chairys oc, liorish t’ad er n’yannoo peccah m’oï; as leih-yms daue ooilley ny loghtyn, ayndoo t’ad er ny ve foiljagh, as lioroo t’ad er n’irree-magh m’oï. 9As bee eh dooys ennym dy voggey, moylley as ooashley mastey ooilley ashoonyn y thallooin, nee clashtyn jeh ooilley my vieys ta mish dy yannoo daue: as gowee ad aggle, as bee ad er-creau, son ooilley ny bannaghtyn, as ooilley yn vaynrys, ta mee dy chosney daue. 10Myr shoh ta’n Chiarn dy ghra, ’Syn ynnyd shoh, (ta shiu gra vees treigit fegooish dooinney ny baagh, eer ayns ard-valjyn Yudah, as ayns straïdyn Yerusalem, ta follym-faase fegooish dooinney, as fegooish cummaltagh, as fegooish baagh,) 11Vees er ny chlashtyn yn coraa dy voggey, as yn coraa dy yennallys; coraa yn dooinney-poosee, as coraa ben y phoosee, yn coraa ocsyn nee gra, Moylley-jee Chiarn ny flaunyssee; son s’mie ta’n Chiarn; son ta e vyghin farraghtyn dy bragh; as yn coraa ocsyn ver lhieu yn oural dy voylley gys thie yn Chiarn. Son ver-yms chyndaa da cappeeys y cheer, myr ec y toshiaght, ta’n Chiarn dy ghra. 12Myr shoh ta Chiarn ny flaunyssee gra, Reesht ’syn ynnyd shoh, ta treigit fegooish dooinney as fegooish baagh, as ayns ooilley ny ard-valjyn echey, bee bwaneyn bochill troggit, as ny shioltaneyn lhie ec fea ayns ny bwoailtchyn. 13Ayns baljyn ny sleityn, ayns baljyn ny glionney, as ayns baljyn y jiass, as ayns cheer Venjamin, as ayns ny ardjyn mygeayrt Jerusalem, as ayns ard-valjyn Yudah, nee ny shioltaneyn goll reesht fo ny laueyn echeysyn ta dy choontey ad, ta’n Chiarn dy ghra. 14Cur-my-ner, ta ny laghyn cheet, ta’n Chiarn dy ghra, dy gooilleen-yms yn red mie shen ta mee er yialdyn da thie Israel, as thie Yudah.

15Ayns ny laghyn shen, as ec y traa shen, trog-yms seose da David yn Vanglane dy chairys; as nee eh briwnys as cairys y hirveish ’sy cheer. 16Ayns ny laghyn shen vees Judah er ny hauail, as nee Jerusalem cummal ayns shee: as shoh yn cowrey vees enmyssit er, YN CHIARN YN YNRICKYS AINYN.

17Son shoh myr ta’n Chiarn dy ghra, Cha bee David dy bragh laccal dooinney dy hoie er stoyl-reeoil thie Israel; 18Chamoo nee ny saggyrtyn ny Leviteyn laccal dooinney ayns my enish, dy hebbal ourallyn-losht, as ourallyn-arran, as dy yannoo shirveish casherick gagh-laa kiongoyrt rhym.

19As haink goo yn Chiarn gys Jeremiah, gra, 20Myr shoh ta’n Chiarn dy ghra, My oddys shiu brishey my chonaant jeh’n laa, as my chonaant jeh’n oie, as nagh beagh laa as oie ayns nyn imbagh cooie; 21Eisht foddee myrgeddin my chonaant ve brisht rish David my harvaant, nagh beagh mac echey dy reill er e stoyl-reeoil; as rish ny Leviteyn ny saggyrtyn, my hirveishee. 22Myr nagh vod earroo ve goit jeh rollageyn yn aer, ny genniagh ny marrey ve towshit; myr shen neem’s bishaghey sluight Ghavid my harvaant, as ny Leviteyn my hirveishee. 23Ny-sodjey, haink goo yn Chiarn gys Jeremiah, gra, 24Vel oo goaill tastey cre ta’n pobble shoh er loayrt, gra, Yn daa heeloghe ta’n Chiarn er reih, t’eh eer er n’yiooldey roo? Shoh myr t’ad er hoiaghey beg jeh my phobble, nagh beagh ad ny smoo ny ashoon kiongoyrt roo. 25Myr shoh ta’n Chiarn gra, Mannagh vel my chonaant shickyr rish laa as oie, as mannagh vel mee er phointeil nyn oardaghyn son niau as thalloo; 26Eisht jioold-yms rish sluight Yacob, as David my harvaant, myr shen nagh goym’s veg jeh’n chynney shen dy ve reiltee harrish sluight Abraham, Isaac, as Jacob: son ver-yms chyndaa da’n chappeeys oc, as bee’m myghinagh daue.