CAB. XXXVII

1As ren y ree Zedekiah, mac Yosiah, reill ayns ynnyd Choniah mac Yehoiakim, va Nebuchadrezzar ree Vabylon er n’yannoo ny ree ayns cheer Yudah. 2Agh cha dug eshyn, ny e harvaantyn, ny pobble y cheer, geill da goan y Chiarn, loayr eh liorish yn adeyr Jeremiah. 3As hug y ree Zedekiah Jehucal mac Shelemiah, as Zephaniah mac Vaaseiah yn saggyrt, gys yn adeyr Jeremiah, gra, Gow padjer nish er nyn son gys y Chiarn y Jee ain. 4Nish va Jeremiah cheet stiagh, as goll magh mastey yn pobble; son cha row ad foast er choyrt eh ayns pryssoon. 5Eisht haink sheshaght-caggee Pharaoh seose veih Egypt: as tra cheayll ny Caldeanee va cruinnaghey stiagh Jerusalem skeeal jeu, hrog ad roue veih Jerusalem.

6Eisht haink goo yn Chiarn gys Jeremiah yn phadeyr, gra, 7Myr shoh ta’n Chiarn Jee Israel dy ghra, Abbyr-jee myr shoh rish ree Yudah, hug shiu hym’s dy vriaght jee’m, Cur-my-ner, nee armee Pharaoh, t’er jeet magh dy chooney lhieu, chyndaa gys Egypt gys y cheer oc hene. 8As hig ny Caldeanee reesht dy chaggey noi yn ard-valley shoh, as gowee ad eh, as loshtee ad eh lesh aile. 9Shoh myr ta’n Chiarn dy ghra, Ny jean-jee molteyrys erriu hene, gra, Hed ny Caldeanee dy shickyr ersooyl voïn: son cha jed ad roue. 10Son ga dy beagh shiu er woalley slane armee ny Caldeanee ta caggey nyn ’oï, as nagh beagh faagit jeu agh deiney lhottit; ny-yeih yinnagh eer ad shen girree seose dagh dooinney ayns e chabbane, as loshtagh ad yn ard-valley shoh lesh aile.

11As haink eh gy-kione, tra va armee ny Caldeanee er droggal veih Jerusalem, ayns aggle roish sheshaght-caggee Pharaoh, 12Eisht hie Jeremiah magh ass Jerusalem dy gholl gys cheer Venjamin, dy ve ec shee ayns shen mastey’n pobble. 13As myr v’eh goll magh er giat Venjamin, raad va captan arreyder, e ennym Irijah, mac Shelemiah, mac Hananiah, ghow eh Jeremiah yn phadeyr, gra, T’ou uss goll er cheu ny Caldeanee. 14Eisht dooyrt Jeremiah, Cha vel yn irriney ayd; cha vel mish goll er cheu ny Caldeanee: agh cha dug eh geill da. Er shoh ghow Irijah Jeremiah, as hug eh lesh eh fenish ny princeyn. 15Shen-y-fa va ny princeyn corree rish Jeremiah, as woaill ad eh, as hug ad eh ayns pryssoon, ayns thie Yonathan y scrudeyr, son ersyn va currym y phryssoon.

16Nish lurg da Jeremiah er ny ve son earish foddey ’sy dungeon dowin dorraghey; 17Eisht hug y ree Zedekiah fys dy ghoaill ass eh, as dênee eh jeh dy follit ayns e hie, as dooyrt eh, Vel fockle erbee veih yn Chiarn? As dooyrt Jeremiah, Ta: son dooyrt eh, Bee oo livreït gys laue ree Vabylon. 18Dooyrt Jeremiah myrgeddin rish y ree Zedekiah, Cre ta my loght dt’oï’s, ny noi dty vooinjer, ny noi’n pobble shoh, dy vel shiu er m’y choyrt ayns pryssoon? 19Cre vel nish ny phadeyryn eu, ren phadeyrys diu, gra, Cha jig ree Vabylon nyn ’oï, ny noi yn cheer shoh? 20Shen-y-fa eaisht uss nish, ta mee guee ort, O my hiarn yn ree; lhig da my aghin, ta mee geearree, ve soit jeh ayns dty hilley; nagh der oo mee reesht gys thie Yonathan y scrudeyr, er-aggle dy voym baase ayns shen. 21Eisht doardee Zedekiah yn ree Jeremiah dy ve ayns cooyrt y phryssoon, as dy choyrt da gagh laa lowanse arran veih straïd y fuinneyder, derrey veagh ooilley’n arran ’syn ard-valley baarit. Myr shoh duirree Jeremiah ayns cooyrt y phryssoon.