CAB. XXXVIII

1Eisht cheayll Shephatiah mac Vattan, as Gedaliah mac Phashur, as Jucal mac Shelemiah, as Pashur mac Valchiah, ny goan va Jeremiah er loayrt rish ooilley’n pobble, gra, 2Myr shoh ta’n Chiarn dy ghra, Eh ta fuirriaght ayns yn ard-valley shoh, yiow eh baase liorish y chliwe, yn ghortey, as y chramp: agh bee eshyn hed magh gys ny Caldeanee bio; son bee e vioys lhiggit lesh, as bee eh sauchey. 3Son myr shoh ta’n Chiarn dy ghra, Bee yn ard-valley shoh dy shickyr er ny livrey gys laue armee ree Vabylon, nee goaill eh. 4Er-y-fa shen dooyrt ny princeyn rish y ree, Ta shin guee ort, lhig da’n dooinney shoh ve currit gy-baase: son myr shoh, t’eh gannooinaghey laueyn ny deiney-caggee ta er-mayrn ’syn ard-valley, as laueyn ooilley’n pobble, ayns loayrt lheid ny goan roo: son cha vel eh shoh shirrey foays y phobble, agh yn assee oc. 5Eisht dooyrt Zedekiah yn ree, Cur-my-ner, t’eh ayns y laue eu: son cha nee yn ree oddys nhee erbee y yannoo noi nyn aigney. 6Eisht ghow ad Jeremiah, as hilg ad eh ayns dungeon Valchiah mac Hammelech, va ayns cooyrt y phryssoon: as lhig ad sheese Jeremiah lesh coyrdyn. As ayns y dungeon cha row ushtey erbee, agh laagh; myr shen dy row Jeremiah dowin ’sy laagh.

7Nish tra cheayll Ebed-melech yn Ethiopian, fer jeh ny offishearyn va ayns thie yn ree, dy row ad er choyrt Jeremiah ’sy dungeon, (yn ree ’sy traa cheddin ny hoie ayns giat Venjamin,) 8Hie Ebed-melech magh ass thie yn ree, as loayr eh rish y ree, gra, 9My hiarn yn ree, ta ny deiney shoh er n’yannoo dy olk ayns ooilley ny t’ad er n’yannoo rish Jeremiah yn phadeyr, t’ad er hilgey ayns y dungeon, raad t’eh goll eig lesh accyrys; son cha vel arragh dy arran ayns yn ard-valley. 10Eisht doardee yn ree da Ebed-melech yn Ethiopian, gra, Gow mayrt veih shoh jeih deiney as feed, as trog seose Jeremiah yn phadeyr ass y dungeon, my vow eh baase. 11Er shen ghow Ebed-melech ny deiney mârish, as hie eh stiagh gys thie yn ree fo yn thie-tashtee, raad hooar eh shenn chloodyn ceaut, as shenn frytlagyn loau, as lhig eh sheese ad lesh coyrdyn ’sy dungeon gys Jeremiah. 12As dooyrt Ebed-melech yn Ethiopian rish Jeremiah, Cur nish ny shenn chloodyn ceaut, as ny frytlagyn loau shoh fo dty achlishyn, fo ny coyrdyn. As ren Jeremiah shen. 13Myr shen hayrn ad seose Jeremiah lesh ny coyrdyn, as ghow ad eh ass y dungeon: as duirree Jeremiah ayns cooyrt y phryssoon.

14Eisht hug y ree Zedekiah fys son Jeremiah yn phadeyr, as ghow eh mârish eh gys y trass yiat jeh thie yn Chiarn: as dooyrt y ree rish Jeremiah, Ta red aym dy ênaghtyn jeed: ny jean nhee erbee y cheiltyn voym. 15Eisht dooyrt Jeremiah rish Zedekiah, My insh-yms dhyt eh, nagh jean oo dy jarroo mish y choyrt dy baase? as my ver-ym coyrle dhyt, jean oo geaishtagh rhym? 16Er shoh loo yn ree Zedekiah rish Jeremiah dy follit, gra, Myr ta’n Chiarn bio, hug yn annym shoh dooin, cha der-ym oo gy-baase, chamoo nee’m uss y livrey gys y laue ocsyn ta shirrey dty vioys. 17Eisht dooyrt Jeremiah rish Zedekiah, Myr shoh ta’n Chiarn, Jee ny flaunyssee, Jee Israel, gra, My hed oo dy jarroo magh gys princeyn ree Vabylon, eisht bee dty annym bio, as cha bee yn ard-valley shoh er ny lostey lesh aile; as bee oo hene, as dty hie, ayns sauchys: 18Agh mannagh jeu magh gys princeyn ree Vabylon, eisht bee yn ard-valley shoh livreït seose gys laue ny Caldeanee, as loshtee ad eh lesh aile, as cha jean oo scapail ass y laue oc. 19As dooyrt Zedekiah yn ree rish Jeremiah, Ta aggle orrym jeh ny Hewnyn ta er duittym lesh ny Caldeanee, dy jean ad m’y livrey gys y laue oc, as dy jean ad m’y oltooan. 20Agh dooyrt Jeremiah, Cha jean ad oo y livrey seose: cur biallys, ta mee guee ort, da coraa yn Chiarn, ta mee dy loayrt rhyt: as hig eh dy mie lhiat, as bee dty annym bio. 21Agh my obbys oo goll magh, shoh yn fockle ta’n Chiarn er hoilshaghey dooys. 22As cur-my-ner, hed ooilley ny mraane, ta faagit ayns thie ree Yudah, magh gys princeyn ree Vabylon, as nee ad gra, Ta e chaarjyn er volley eh, as er ghoaill vondeish er; ta e chassyn dowin ’sy laagh, as t’ad er choyrt cooyl rish. 23Cur-my-ner, hed ooilley dty vraane as dty chloan magh gys ny Caldeanee; as cha jean oo scapail ass ny laueyn oc, agh bee oo goit liorish ree Vabylon: as by-dty-chyndagh loshtee ad yn ard-valley shoh lesh aile.

24Eisht dooyrt Zedekiah rish Jeremiah, Ny lhig da dooinney erbee fys y gheddyn er ny goan shoh, as cha bee uss er dty choyrt gy-baase. 25Agh my chlinnys ny princeyn dy row glare eddyr shin, as my hig ad hood, as gra rhyt, Insh dooin nish cre t’ou er ghra rish y ree, ny jean keiltyn eh voïn, as cha der mayd oo gy-baase; myrgeddin cre dooyrt yn ree rhyt’s; 26Eisht jir uss roo, Hug mee stiagh aghin gys y ree, nagh jinnagh eh m’y choyrt reesht gys thie Yonathan, dy gheddyn baase ayns shen. 27Eisht haink ooilley ny princeyn gys Jeremiah dy vriaght jeh: as dinsh eh daue cordail rish ooilley ny goan shoh, myr va’n ree er harey. Er shoh cha dooyrt ad arragh rish, as cha row yn chooish cronnit. 28Myr shen duirree Jeremiah ayns cooyrt y phryssoon derrey’n laa hie Jerusalem er goaill: as v’eh ayns shen tra va Jerusalem goit.