CAB. XXXIX

1Ayns y nuyoo vleïn jeh reill Zedekiah ree Yudah, ayns y jeihoo vee, haink Nebuchadrezzar ree Vabylon as ooilley yn armee echey noi Jerusalem, as chruinnee ad stiagh eh ooilley mygeayrt. 2As ’syn un vleïn jeig jeh reill Zedekiah, ’sy chiarroo vee, er y nuyoo laa jeh’n vee, vrish ad stiagh er yn ard-valley. 3As haink ooilley princeyn ree Vabylon stiagh, as hoie ad ayns y yiat meanagh, eer Nergal-sharezer, Samgar-nebo, Sarsechim, Rab-saris, Rab-mag, marish y chooid elley jeh ard-gheiney ree Vabylon.

4As haink eh gy-kione, tra honnick Zedekiah ree Yudah ad, as ooilley ny fir-chaggee, chossyn ad roue, as daag ad yn ard-valley ’sy dorraghys, goaill raad garey yn ree, er y yiat eddyr y daa voalley, jannoo son y cheer-rea. 5Agh deiyr armee ny Caldeanee orroo, as verr ad er Zedekiah ayns cheer-rea Yericho: as tra v’ad er ghoaill eh, hug ad lhieu seose eh gys Nebuchadrezzar ree Vabylon gys Riblah, ayns cheer Hamath, raad hug eh briwnys n’oï. 6Eisht doardee ree Vabylon mec Zedekiah dy ve stroit ayns Riblah kiongoyrt rish e hooillyn; as ooilley deiney ooasle Yudah hug ree Vabylon dy baase myrgeddin. 7Ny-sodjey, hug eh sooillyn Zedekiah ass, as hug eh ayns geulaghyn eh, dy chur lesh eh gys Babylon.

8As losht ny Caldeanee plaase y ree, as thieyn y phobble lesh aile, as lhieg ad voallaghyn Yerusalem. 9Eisht hug Nebuzaradan, captan y ghard, lesh ersooyl nyn gappeeyn gys Babylon fooilliagh yn phobble va er-mayrn ayns yn ard-valley, as adsyn ren tuittym lesh, as haink harrish huggey, marish yn chooid elley jeh’n sleih va faagit. 10Agh boghtyn y cheerey nagh row monney oc, daag Nebuzaradan captan y ghard ayns cheer Yudah, as hug eh daue garaghyn-feeyney as magheryn ec y traa cheddin.

11Eisht hug Nebuchadrezzar ree Vabylon currym mychione Jeremiah da Nebuzaradan captan y ghard, gra, 12Gow eh, as jeeagh dy mie da, as ny cur drogh ghellal da; agh jean er e hon cre-erbee t’eh dy yeearree. 13Myr shen hug Nebuzaradan captan y ghard, as Nebushasban, Rab-saris, as Nergal-sharezer, Rab-mag, as ooilley ard-leeideilee ree Vabylon, 14Eer adsyn hug fys, as ghow ad Jeremiah ass cooyrt y phryssoon, as livrey ad eh gys currym Ghedaliah mac Ahikam, mac Shaphan, eh dy chur lesh thie eh: myr shen ren eh baghey mastey’n pobble.

15Nish haink goo yn Chiarn gys Jeremiah, choud as v’eh jeight seose ayns cooyrt y phryssoon, gra, 16Immee, as loayr rish Ebed-melech yn Ethiopian, gra, Myr shoh ta Chiarn ny flaunyssee, Jee Israel, dy ghra, Cur-my-ner, cooilleen-yms my ghoan er yn ard-valley shoh son olk, as cha nee son mie; as bee ad jeant mie ayns y laa shen kiongoyrt rhyt. 17Agh livrey-yms oo ayns y laa shen, ta’n Chiarn dy ghra, as cha jig oo fo yn phooar ocsyn t’ou ayns aggle roue. 18Son neem’s dy shickyr uss y livrey, as cha duitt oo liorish y chliwe; agh cosnee oo ersooyl lesh dty vioys, er-yn-oyr dy vel oo er hreishteil aynym’s, ta’n Chiarn dy ghra.