CAB. XL

1Shoh myr haghyr eh da Jeremiah veih’n Chiarn, erreish da Nebuzaradan captan y ghard v’er lhiggey yn raad da veih Ramah, tra v’eh er ghoaill eh ayns geulaghyn mâroosyn ooilley hie ersooyl nyn gappeeyn veih Jerusalem as veih Judah, gys Babylon. 2As ghow captan y ghard Jeremiah, as dooyrt eh rish, Ta’n Chiarn dty Yee er n’ockley magh yn kerraghey shoh er yn ynnyd shoh. 3Nish ta’n Chiarn er choyrt eh gy-kione, as er n’yannoo cordail rish e raa: er-yn-oyr dy vel shiu er n’yannoo peccah noi’n Chiarn, as nagh vel shiu er choyrt biallys da e choraa, shen-y-fa ta’n olk shoh er jeet erriu. 4As nish, cur-my-ner, ta mee dy dty eaysley jiu veih ny geulaghyn ta er dty laueyn. My s’taittin lhiat goll mârym gys Babylon, tar royd, as bee’m dooie rhyt; agh mannagh by-haittin lhiat goll mârym gys Babylon, jean dty aigney hene: cur-my-ner, ta ooilley yn cheer shoh royd: raad erbee dy vaik oo mie as jesh dhyt hene, gow dty chummal ayns shen. 5As mannagh vel shoh neesht gys dty aigney, as eshyn, immee back reesht gys Gedaliah mac Ahikam, mac Shaphan, eh ta ree Vabylon er n’yannoo ny chiannoort harrish ard-valjyn Yudah, as jean cummal mârishyn mastey yn pobble; er-nonney gow raad erbee hee oo jesh dhyt. Myr shen doardee captan y ghard beaghey as cowrey da, as lhig eh yn raad da. 6Eisht hie Jeremiah gys Gedaliah mac Ahikam, gys Mizpah, as chum eh mârish mastey yn pobble va faagit ’sy cheer.

7Nish tra cheayll ooilley ny captanyn va fud y vagheragh, eer ad-hene as nyn gheiney, dy row ree Vabylon er n’yannoo Gedaliah mac Ahikam ny chiannoort er y cheer, as er choyrt fo e churrym deiney, as mraane, as cloan, as boghtyn ny cheerey, nagh row er n’gholl ersooyl nyn gappeeyn gys Babylon; 8Eisht haink ad gys Gedaliah gys Mizpah, eer Ishmael mac Nethaniah, as Johanan as Jonathan mec Chareah, as Seraiah mac Tanhumeth, as mec Ephai yn Netophathite, as Jezaniah mac dy Vaachathite, adsyn as nyn gheiney 9As ren Gedaliah mac Ahikam, mac Shaphan, breearrey daue hene, as da ny deiney va mâroo, gra, Ny gow-jee aggle dy ve fo ammys ny Caldeanee; cum-jee ayns y cheer, as shirveish-jee ree Vabylon, as hig shiu jeh dy mie. 10Er my hon hene, cur-my-ner, nee’m cummal ec Mizpah dy hirveish ny Caldeanee hig hooin: agh shiuish, chaggle-jee feeyn as messyn souree, as ooil, as jean-jee stoyr jeu, as cum-jee ayns nyn ard-valjyn ta shiu er reayll. 11Myr-chaagh, tra va ooilley ny Hewnyn v’ayns Moab, as mastey ny Ammoniteyn, as ayns Edom, as ayns ooilley ny cheeraghyn mygeayrt, er chlashtyn dy row ree Vabylon er vaagail fooilliagh dy Yudah, as dy row eh er hoiaghey harrystoo Gedaliah mac Ahikam, mac Shaphan; 12Eisht hyndaa ooilley ny Hewnyn veih dy chooilley ard raad v’ad eiyrit, as haink ad gys thalloo Yudah, gys Gedaliah ayns Mizpah; as hymsee ad stiagh feeyn, as messyn souree, cooid nagh nee beggan. 13As haink myrgeddin Johanan mac Chareah, as ooilley captanyn y chiartanse va fud y vagheragh, gys Gedaliah gys Mizpah, 14As dooyrt ad rish, S’beg fys t’ayd dy vel Baalis ree ny Ammoniteyn er choyrt Ishmael mac Nethaniah dy dty varroo? Agh cha ren Gedaliah mac Ahikam ad y chredjal. 15Eisht loayr Johanan mac Chareah rish Gedaliah ec Mizpah eddyr ad-hene, gra, Lhig dou goll, ta mee guee ort, as marr-yms Ishmael mac Nethaniah gyn-yss da dooinney erbee, er-aggle dy marree eshyn uss, as dy bee ooilley ny Hewnyn t’er jeet stiagh hood er nyn skeayley, as fooilliagh Yudah dy herraghtyn. 16Agh dooyrt Gedaliah mac Ahikam rish Johanan mac Chareah, Cha jean mie dhyt lheid y red y yannoo, son t’ou loayrt yn aggair jeh Ishmael.