CAB. XLIII

1As haink eh gy-kione, erreish da Jeremiah v’er loayrt rish ooilley yn pobble ooilley goan y chaghteraght va’n Chiarn nyn Yee er choyrt huc liorishyn, eer ooilley ny goan shoh, 2Eisht dooyrt Azariah mac Hoshaiah, as Johanan mac Chareah, as ooilley ny mooaralee, rish Jeremiah, T’ou loayrt dy breagagh: cha vel y Chiarn y Jee ain er dty choyrt dy ghra, Ny gow-jee sheese gys Egypt dy chummal ayns shen. 3Agh ta Baruch mac Neriah dy dty ghreinnaghey nyn ’oï, dy livrey shin gys laue ny Caldeanee, dy choyrt shin dy baase, as dy chur lhieu ersooyl shin nyn gappeeyn gys Babylon. 4Myr shen cha dug Johanan mac Chareah, ny ooilley ny captanyn-caggee, ny ooilley’n pobble, biallys da coraa yn Chiarn, dy chummal ayns cheer Yudah. 5Agh ghow Johanan mac Chareah, as ooilley ny captanyn-caggee, ooilley jeelym Yudah v’er jyndaa dy chummal ayns cheer Yudah veih dy chooilley ashoon, raad v’ad eiyrit magh, 6Eer deiney, as mraane, as cloan, as inneenyn y ree, as dy chooilley pheccagh daag Nebuzaradan captan y ghard, marish Gedaliah mac Ahikam, mac Shaphan, as Jeremiah yn phadeyr, as Baruch mac Neriah. 7Myr shen haink ad gys cheer Egypt: son cha dug ad biallys da coraa yn Chiarn: as shoh myr haink ad, eer gys Tahpanhes.

8Eisht haink goo yn Chiarn gys Jeremiah ayns Tahpanhes, gra, 9Gow claghyn mooarey ayns dty laue, as follee ad fenish deiney Yudah ’sy chray ayns yn aiee-vreek, ta roish giat thie Pharaoh ayns Tahpanhes; 10As abbyr roo, Myr shoh ta Chiarn ny flaunyssee, Jee Israel, dy ghra, Cur-my-ner, ver-yms fys er, as goyms Nebuchadrezzar ree Vabylon my harvaant, as soie-yms yn stoyl-reeoil echeysyn er ny claghyn shoh ta mee er n’ollaghey; as skeaylee eh e chabbane reeoil harrystoo. 11As tra hig eh, nee eh thalloo Egypt y woalley, as livrey lheid as ta son baase, gys baase; as lheid as ta son cappeeys, gys cappeeys; as lheid as ta son y chliwe, gys y chliwe. 12As foaddee eh aile ayns chiambleyn yeeghyn Egypt, as nee eh ad y lostey, as ver eh lesh ersooyl ad nyn gappeeyn; as nee eh eh-hene y choamrey lesh thalloo Egypt, myr ta bochilley dy choyrt er e chooat-fastee, as hed eh magh veih shen ayns shee. 13Brishee eh myrgeddin jallooyn Veth-shemesh, ta ayns cheer Egypt; as chiambleyn yeeghyn ny Egyptianee nee eh lostey lesh aile.