CAB. XLIV

1Yn goo haink gys Jeremiah, mychione ooilley ny Hewnyn ta cummal ayns cheer Egypt, ec Migdol, as ec Tahpanhes, as ec Noph, as ayns cheer Phathros, gra, 2Myr shoh ta Chiarn ny flaunyssee, Jee Israel, dy ghra, Ta shiu er vakin ooilley yn olk ta mee er choyrt er Jerusalem, as er ooilley ard-valjyn Yudah; as cur-my-ner, yn laa jiu t’ad ny hraartys, as cha vel dooinney erbee baghey ayndoo; 3Son ooilley yn olk t’ad er n’yannoo, dy my vrasnaghey gys corree, as dy jagh ad dy lostey incense, as dy hirveish jeeghyn joarree, nagh bione daue hene, ny shiuish, ny nyn ayraghyn. 4Ny-yeih hug mish hiuish ooilley my harvaantyn ny phadeyryn, girree dy moghey, as dy choyrt ad, gra, Oh, ny jean-jee yn red dwoaiagh shoh, ta feoh aym er. 5Agh cha ren ad geaishtagh, ny croymmey nyn gleaysh dy hyndaa veih nyn olk, gyn dy lostey incense gys jeeghyn elley. 6Shen-y-fa va my eulys as my chorree deayrtit magh, as foaddit er ard-valjyn Yudah, as ayns straïdyn Yerusalem; as t’ad naardey as mow, myr ec y laa jiu. 7Shen-y-fa nish, myr shoh ta’n Chiarn Jee ny flaunyssee, Jee Israel, dy ghra, Cre’n-fa ta shiu jannoo yn olk mooar shoh noi ny anmeenyn eu hene, dy stroie veue dooinney as ben, lhiannoo as oikan, veih Judah, nagh bee veg j’iu faagit; 8Son dy vel shiu dy my vrasnaghey gys corree lesh obbraghyn nyn laueyn, lostey incense gys jeeghyn joarree ayns thalloo Egypt, raad ta shiu er gholl dy vaghey, shiu hene dy ve giarit jeh, as dy ve son mollaght as oltooan mastey ooilley ashoonyn y theihll? 9Vel shiu er yarrood mee-chraueeaght nyn ayraghyn, as drogh-yannoo reeaghyn Yudah, as drogh-yannoo ny mraane oc, as y drogh-yannoo eu hene, as olkys nyn mraane, t’ad er chur-rish ayns cheer Yudah, as ayns straïdyn Yerusalem? 10Cha vel ad er n’injillaghey ad-hene eer gys y laa t’ayn jiu, chamoo t’ad er ghoaill aggle, ny er n’immeeaght ayns my leigh, ny ayns my lattyssyn, ren mee soiaghey reue, as roish ny ayraghyn eu.

11Shen-y-fa myr shoh ta Chiarn ny flaunyssee, Jee Israel, dy ghra, Cur-jee my-ner, soie-yms my eddin nyn ’oï eu son olk, as dy yiarey jeh ooilley Judah. 12As goyms fooilliagh Yudah, t’er hoiaghey nyn eddin dy gholl gys cheer Egypt dy chummal ayns shen, as hed ad ooilley naardey, as nee ad tuittym ayns cheer Egypt; bee ad dy feer stroit liorish y chliwe, as y ghortey; yiow ad ooilley baase, beg as mooar, lesh y chliwe as y ghortey: as bee ad son ard-vollaght, as son atchim, as son mollaght-mynney, as son oltooan. 13Son goym’s kerraghey orroosyn ta cummal ayns cheer Egypt, myr ta mee er cherraghey Jerusalem, liorish y chliwe, liorish y ghortey, as liorish y chramp: 14Myr shen nagh bee fer hene faagit er-mayrn jeh fooilliagh Yudah, ta er n’gholl gys cheer Egypt dy vaghey ayns shen, ny chyndaa reesht gys cheer Yudah, huggey t’ad aggindagh dy hyndaa dy chummal ayn; son cha jean veg chyndaa agh lheid as nee cosney roue.

15Eisht ooilley ny deiney va fys oc dy row ny mraane oc er lostey incense gys jeeghyn joarree, as ooilley ny mraane va kionfenish, shiartanse vooar jeu, eer ooilley pobble Yudah va cummal ayns cheer Egypt, ec Pathros, dansoor ad Jeremiah, gra, 16Son ny goan t’ou er ghoaill ort dy loayrt rooin ayns ennym y Chiarn, cha n’eaisht mayd rhyt. 17Agh nee mayd eer lurg nyn aigney hene, dy lostey incense gys queen yn aer, as dy lhieeney magh ourallyn-feeyney jee, myr boallagh shin, shin hene, as nyn ayraghyn, nyn reeaghyn, as nyn brinceyn, ayns ard-valjyn Yudah, as ayns straïdyn Yerusalem: son eisht va palchey beaghey ain, as va shin dy souyr, chamoo honnick shin olk erbee. 18Agh er-dyn traa scuirr shin dy lostey incense gys queen yn aer, as dy lhieeney magh ourallyn-feeyney jee, ta shin er ve feme dy chooilley nhee, as er n’gholl naardey liorish y chliwe as y ghortey. 19As tra heb shin incense da queen yn aer, as lhieen shin magh chebballyn-feeyney jee, cha ren shin keeakyn gys yn ooashley eck, ny lhieeney magh ourallyn-feeyney fegooish nyn sheshaghyn.

20Eisht dooyrt Jeremiah rish ooilley yn pobble, rish ny deiney, as ny mraane, as rish ooilley yn sleih va er choyrt da yn ansoor shen, gra, 21Yn incense heb shiu ayns ard-valjyn Yudah, as ayns straïdyn Yerusalem, shiuish, as nyn ayraghyn, ny reeaghyn eu, as nyn brinceyn, as pobble y cheer, nagh ren y Chiarn cooinaghtyn orroo, as nagh daink eh ayns e chree? 22Myr shen nagh voddagh y Chiarn gymmyrkey ny-sodjey rish loght nyn yannoo, as ny cliaghtaghyn dwoaiagh ta shiu er chur roo: shen-y-fa ta’n cheer eu ny hraartys, as atchim, as mollaght, gyn cummaltagh, myr ec y laa t’ayn jiu. 23Er-yn-oyr dy vel shiu er lostey incense, as er n’yannoo peccah noi yn Chiarn, as nagh dug shiu biallys da coraa yn Chiarn, chamoo ta shiu er n’immeeaght ayns e leigh, ny ayns ny slattyssyn, ny ayns ny oardaghyn echeysyn; er-y-fa shen ta’n kerraghey shoh er duittym erriu, myr te ec y laa jiu. 24Ny-sodjey dooyrt Jeremiah rish ooilley yn pobble, as rish ooilley ny mraane, eaisht-jee rish goo yn Chiarn, shiuish ooilley Yudah ta ayns cheer Egypt; 25Myr shoh ta Chiarn ny flaunyssee, Jee Israel, dy ghra, Ta shiu hene as ny mraane eu chammah er loayrt lesh nyn meeal, as er chooilleeney lesh nyn laue, gra, Nee mayd dy shickyr cooilleeney ny breearraghyn ta shin er n’yannoo, dy lostey incense gys queen yn aer, as dy lhieeney magh ourallyn-feeyney gys yn ooashley eck: nee shiu dy jarroo cooilleeney nyn mreearraghyn, as dy shickyr jannoo mie ny ta shiu er yialdyn. 26Shen-y-fa clasht-jee goo yn Chiarn, ooilley Yudah ta cummal ayns cheer Egypt; Cur-my-ner, ta mish er loo liorish my ennym ooasle, ta’n Chiarn gra, nagh bee my ennym ny smoo enmyssit ayns beeal dooinney erbee dy Yudah, ayns ooilley cheer Egypt, gra, Ta’n Chiarn Jee bio. 27Cur-my-ner bee sooill aym’s orroo son olk, as cha nee son mie; as bee ooilley deiney Yudah ta ayns cheer Egypt er nyn stroie liorish y chliwe as liorish y chramp, derrey vees slane jerrey orroo. 28Foast nee kuse fardalagh jeusyn scaapys y chliwe, chyndaa reesht veih cheer Egypt gys cheer Yudah: eisht toiggee ooilley jeelym Yudah, t’er n’gholl gys cheer Egypt dy chummal ayn, quoi ny goan nee shassoo, ny goan aym’s, ny ny goan ocsyn.

29As bee shoh son cowrey diu, ta’n Chiarn dy ghra, dy jean-yms shiu y cherraghey ’sy voayl shoh, dy vod fys ’ve eu dy jean my ghoan dy shickyr shassoo nyn ’oï son olk: 30Shoh myr ta’n Chiarn dy ghra, Cur-my-ner, ver-yms Pharaoh-hophra ree Egypt gys laue e noidyn, as gys y laue ocsyn ta shirrey e vioys, myr hug mee Zedekiah ree Yudah gys laue Nebuchadrezzar ree Vabylon, yn noid echeysyn va shirrey e vioys.