CAB. XLIX

1Mychione ny Ammoniteyn, shoh myr ta’n Chiarn dy ghra, Nagh vel mec ec Israel? nagh vel eirey echey? cre’n-fa eisht ta’n ree ocsyn goaill Gad myr eiraght, as e phobble cummal ayns ny ard-valjyn echeysyn? 2Shen-y-fa, cur-my-ner, ta ny laghyn cheet, ta’n Chiarn gra, dy der-yms er larm-caggee dy ve ry-chlashtyn ayns Rabbah ny Ammoniteyn; as bee eh ny charnane traartagh, as bee ny inneenyn ecksh losht lesh aile: eisht bee Israel ny eirey dauesyn, va ny eiraghyn echeysyn, ta’n Chiarn dy ghra. 3Trog yllaghey treih, O Heshbon; son ta Ai currit naardey: yllee-jee, inneenyn Rabbah; cur-jee erriu aanrit-sack; jean-jee dobberan, as roie-jee noon as noal rish ny cleiyee: son hed nyn ree gys cappeeys, as e haggyrtyn as e phrinceyn cooidjagh. 4Kys dy vel oo boggyssagh jeh dty choanyn, dty choan vessoil, O inneen vee-viallagh? ren treishteil ayns dty hashtaghyn, gra, Quoi hig orrym? 5Cur-my-ner, ver-ym lhiam aggle ort’s, ta’n Chiarn Jee ny flaunyssee gra, lioroosyn ooilley ta mygeayrt-y-mood; as bee shiu er nyn yiooldey magh ooilley dy cheilley, as cha jean fer erbee goaill seose ny shaghrynee. 6As lurg shen chyndaa-yms reesht cappeeys cloan Ammon, ta’n Chiarn dy ghra.

7Mychione Edom, shoh ta Chiarn ny flaunyssee gra, Vel creenaght arragh ayns Teman? vel coyrle er vailleil veih’n vooinjer hushtagh? vel ad ooilley er choayl nyn geeayll? 8Chea-jee, cosne-jee reue, cum-jee dowin ’syn aasagh, O fir-vaghee Dedan; son ver-yms ersyn seaghyn Esau, as earish my cherraghey. 9My harragh ny teiyderyn feeyney ort, nagh vaagagh ad kuse jeh ny messyn-feeyney? my hig maarlee ’syn oie, nee ad roostey derrey ta nyn saie oc. 10Agh ta mee er n’yannoo Esau lhome, ta mee er vosley e hashtaghyn, as cha vod eh keiltyn eh-hene: t’eh naardey rass as cass, marish e vraaraghyn as e naboonyn, as cha vel shilley jeu faagit. 11Faag dooys dty chloan gyn ayr, freill-yms ad bio: as lhig da dty vraane-treoghe treishteil aynym’s. 12Son myr shoh ta’n Chiarn dy ghra, Cur-my-ner, adsyn nagh row deyrit dy iu jeh’n chappan, t’ad er n’iu dy dowin jeh; as vel uss jerkal dy jed oo ooilley-cooidjagh gyn kerraghey? cha bee eh lhiggit lhiat, agh nee oo dy shickyr giu jeh. 13Son ta mee er vreearrey liorym pene, ta’n Chiarn dy ghra, dy bee Bozrah jeant ny hraartys, ny oltooan, caitnys, as mollaght, as bee ooilley e ard-valjyn dy bragh naardey. 14Ta mee er chlashtyn goo veih yn Chiarn, as ta chaghter er ny choyrt gys ny ashoonee, gra, Chaggle-jee cooidjagh, as tar-jee noi eck, as trog-jee gys y chaggey. 15Son cur-my-ner, nee’m oo y yannoo fardalagh mastey ny ashoonee, as beg dy ve soit jeed mastey deiney. 16Ta dty chione-ardys hene, as mooaralys dty chree er dty volley, uss ta dty chummal mastey scoltaghyn ny creggey, ta freayll mooie ’sy vullagh: ga dy jinnagh oo dty edd co-ard rish yn urley, raip-yms oo neose veih shen, ta’n Chiarn dy ghra. 17Bee Edom neesht ny hraartys; gowee ny troailtee yindys, as nee ad gannidys er ooilley yn treihys eck. 18Myr ayns toyrt-mow Sodom as Gomorrah, as ny ard-valjyn naboo, ta’n Chiarn dy ghra, cha jean dooinney erbee baghey ayns shen, chamoo nee mac dooinney cummal ayn. 19Cur-my-ner, hig eh seose myr lion veih brooinyn Yordan noi ynnyd-vaghee yn treanagh: agh ver-yms er dy leah cur cooyl r’ee; as quoi ta’n reih dooinney dunnal dooys dy endeil ee? son quoi ta casley rhym’s? as quoi nee pointeil traa dou? as quoi yn bochilley shen nee shassoo roym? 20Shen-y-fa eaisht-jee rish coyrle y Chiarn, t’eh er ghoaill noi Edom; as cre t’eh er chiarail noi fir-vaghee Teman: shickyr nee yn fer s’faase jeh’n chioltane ad y hayrn magh; dy firrinagh, nee eh jannoo nyn ynnydyn-vaghee follym-faase. 21Ta’n thalloo craa ec feiyr yn lhieggey oc; ec yn eam oc, va’n sheean jeh er ny chlashtyn ec yn Aarkey Jiarg. 22Cur-my-ner, hig eh seose, as nee eh getlagh myr urley, as sheeyney magh e skianyn harrish Bozrah: as er y laa shen bee cree treanee Edom myr cree ben er-troailt.

23Mychione Damascus. Ta Hamath bun-ry-skyn, as Arpad; son t’ad er chlashtyn naightyn trome; t’ad lhag-chreeagh; ta groam er yn aarkey; cha vod eh goaill fea. 24Ta Damascus er n’aase moal, as kiartagh ee hene son chea, as ta aggle er ghreimmey ee: ta angaish as pianyn er ghoaill ee, myr ben er-troailt. 25Kys ta’n ard-valley aalin treigit, ard-valley my voggey! 26Shen-y-fa nee ny deiney aegey eck tuittym ayns ny straïdyn, as bee ooilley ny fir-chaggee er ny yiarey jeh ayns y laa shen, ta Chiarn ny flaunyssee dy ghra. 27As foad-yms aile er voalley Ghamascus, as nee eh lostey cooyrt reeoil Ven-hadad.

28Mychione Kedar, as mychione reeriaghtyn Hazor, nee Nebuchadrezzar ree Vabylon y woalley, myr shoh ta’n Chiarn dy ghra, Trog-jee erriu, seose-jee gys Kedar, as stroie-jee deiney yn shiar. 29Ny cabbaneyn as ny shioltaneyn oc nee ad goaill ersooyl: gowee ad daue hene ny curtanyn, as ooilley ny siyn oc, as nyn gamelyn; as nee ad geam huc, Ta aggle er dy chooilley heu.

30Cosne-jee reue, immee-jee foddey jeh, cum-jee dowin ’syn aasagh, O shiuish chummaltee Hazor, ta’n Chiarn dy ghra: son ta Nebuchadrezzar ree Vabylon er ghoaill coyrle nyn ’oï, as er chiarail kerraghey erriu. 31Trog-jee erriu, seose-jee gys yn ashoon berchagh, ta cummal fegooish imnea, ta’n Chiarn dy ghra, nagh vel oc giattyn ny boltyn, ta cummal orroo hene. 32As bee ny camelyn oc son cragh, as earrooyn nyn ollagh son spooilley; as skeayl-yms lesh dy chooilley gheay adsyn ta ayns ny corneilyn sodjey magh, as veih dy chooilley ard ver-yms lhiam seaghyn orroo, ta’n Chiarn dy ghra. 33As bee Hazor ny oayll son dragonyn, as ny hraartys son earishyn foddey: cha jean fer erbee baghey ayns shen, ny mac dooinney cummal ayn.

34Goo yn Chiarn haink gys Jeremiah yn phadeyr noi Elam, ayns toshiaght reill Zedekiah ree Yudah, gra, 35Myr shoh ta Chiarn ny flaunyssee dy ghra, Cur-my-ner, brish-yms bow Elam, troshid nyn niart. 36As er Elam ver-ym lhiam ny kiare geayghyn veih ny kiare ardjyn yn aer, as nee’m fasney ad gys ooilley ny geayghyn shen; as cha bee ashoon erbee raad nagh jig scapailtee Elam. 37Son ver-yms atchim er Elam roish nyn noidyn, as rouesyn ta shirrey nyn mioys; as ver-yms lhiam yn olk orroo, eer eulys my yymmoose, ta’n Chiarn dy ghra; as ver-ym magh yn cliwe nyn eiyrt’s, derrey t’ad dy slane bollagh stroit aym: 38As soie-yms my stoyl-reeoil ayns Elam, as stroie-yms ayn yn ree as ny princeyn, ta’n Chiarn dy ghra.

39Agh hig eh gy-kione ayns ny laghyn jerrinagh, dy jyndaa-yms cappeeys Elam, ta’n Chiarn dy ghra.