CAB. L

1Yn goo loayr y Chiarn noi Babylon, as noi cheer ny Caldeanee, liorish Jeremiah yn phadeyr. 2Insh-jee magh mastey ny ashoonyn, as lhig daue clashtyn, as soie-jee seose yn mergey; cur-jee eam, as ny jean-jee keiltyn: abbyr-jee, Ta Babylon goit, ta Bel currit naardey, ta Merodach brisht ayns peeshyn; ta ny jeeghyn eck bun-ry-skyn, ny jallooyn eck nyn beeshyn mynney. 3Son ass y twoaie ta cheet seose ashoon noi eck, nee jannoo yn cheer eck follym-faase, as cha bee cummaltagh ayn; nee ad scughey, nee ad treigeil ee, chammah dooinney as baagh.

4Ayns ny laghyn shen, as ec y traa cheddin, ta’n Chiarn dy ghra, hig cloan Israel, adsyn as cloan Yudah dy cheilley, keayney myr t’ad goll, as shirrey gys y Chiarn nyn Yee. 5Nee ad briaght yn raad gys Zion, as nyn eddin lesh shen, gra, Tar-jee, as lhig dooin lhiantyn gys y Chiarn ayns conaant shickyr nagh bee jarroodit. 6Ta my phobble er ve kirree cailjey; ta ny bochillyn oc er lhiggey daue goll er-shaghryn, t’ad er hyndaa ad ass y raad er ny sleityn: t’ad er n’gholl veih slieau gys cronk, t’ad er yarrood nyn aber hene. 7Quoi-erbee hooar ad, ren stroie ad: as dooyrt nyn noidyn, Cha vel shin ayns foill, son dy vel adsyn er n’yannoo peccah noi’n Chiarn, fendeilagh yn chairys; eer yn Chiarn, treishteil nyn ayraghyn. 8Scugh-jee ass Babylon, as ny fuirree-jee ny-sodjey ayns cheer ny Caldeanee; as bee-jee myr buick ny goair er kione ny shioltaneyn.

9Son cur-my-ner, trog-yms seose, as ver-ym noi Babylon, shiartanse vooar dy ashoonyn pooaral veih’n cheer-twoaie; as nee ad soiaghey ad-hene ayns order-caggee noi eck; lioroo shen vees ee goit: bee ny sideyn oc myr sideyn dooinney lajer gastey; cha bee side jeu lhiggit ayns fardail. 10As bee Caldea son spooilley: bee nyn saie ocsyn ooilley nee ish y spooilley, ta’n Chiarn dy ghra. 11Er-yn-oyr dy ren shiu boggyssagh as craid, shiuish stroideryn my eiraght; son dy vel shiu er n’aase roauyr myr yn cholbagh ec faiyr, as dy vel shiu buirroogh myr terriu; 12Bee nyn moir dy mooar seaghnit; bee ish dymmyrk shiu er-nearey: cur-my-ner, bee ish unnane jeh ny ashoonyn s’fardalee, faasagh, thalloo sponkit as reeastaneagh. 13Kyndagh rish jymmoose y Chiarn cha bee cummaltagh aynjee, agh bee ee dy bollagh treigit: dy chooilley unnane hed raad Vabylon, gowee ad yindys, as nee ad gannidys er ooilley ny t’ee dy hurranse. 14Cur-jee shiu hene ayns order-caggee noi Babylon cruin mygeayrt: ooilley shiuish ta lhoobey yn vhow, lhig-jee urree, ny jean-jee mooaraghey sideyn; son t’ee er n’yannoo peccah noi yn Chiarn. 15Yllee-jee noi eck ooilley mygeayrt: t’ee er livrey seose ee hene: ta ny undinyn eck er ny lhaggaghey, ny voallaghyn eck lhieggit; son shoh lhiasaghey yn Chiarn: gow-jee cooilleeney urree; ’naght myr t’ee er n’yannoo, jean-jee r’ee. 16Giare-jee jeh yn correyder veih Babylon, as yn beaynee ta loaghtey yn corran ayns imbagh yn ouyr: son aggle roish cliwe yn chragheyder nee ad cosney roue dy chooilley ghooinney gys e phobble, as nee ad chea dagh fer gys e heer hene.

17Ta Israel ny cheyrrey chailjey; ta ny lionyn er n’eiyrt ersooyl eh: hoshiaght d’ee ree Assyria yn eill jeh, as ny lurg-syn ta ree Vabylon er chaigney e chraueyn. 18Shen-y-fa myr shoh ta Chiarn ny flaunyssee, Jee Israel, dy ghra, Cur-my-ner, smaght-yms ree Vabylon as y cheer echey, myr ta mee er smaghtaghey ree Assyria. 19As ver-ym lhiam Israel reesht gys e ynnyd-vaghee hene, as nee eh gyndyr er Carmel as Bashan, as bee yn annym echey jeant magh er cronk Ephraim as Gilead. 20Ayns ny laghyn shen, as ec y traa cheddin, ta’n Chiarn dy ghra, nee ad briaght son loght Israel, agh cha bee veg ayn; as son peccaghyn Yudah, agh cha bee ad ry-gheddyn: son beem’s myghinagh dauesyn ta mee dy livrey.

21Immee seose noi thalloo Merathaim, eer noi shen, as fir-vaghee Phekod; cur naardey as stroie dy bollagh nyn eiyrt’s, ta’n Chiarn dy ghra, as jean ooilley rere myr ta mee er harey dhyt. 22Ta tharmane caggee ’sy cheer, as dy chragh trome. 23Kys ta oayrd mooar y theihll scelt as brisht! kys ta Babylon er jeet dy ve ny hraartys mastey ny ashoonyn! 24Ta mee er hoiaghey ribbey er dty hon, as t’ou goit, O Vabylon, as cha r’ou er dty hwoaie: t’ou er dty gheddyn magh, as greimmit neesht, er-yn-oyr dy vel oo er n’irree-magh noi yn Chiarn. 25Ta’n Chiarn er vosley thie e armyn, as er choyrt lesh magh greinyn e yymmoose: son shoh obbyr y Chiarn Jee ny flaunyssee ayns cheer ny Caldeanee. 26Tar-jee noi eck veih ny ardjyn sodjey magh, brish-jee foshlit ny thieyn-tashtee eck; stamp-jee sheese ee myr creaghyn, stroie-jee dy bollagh ee; ny lhig floag j’ee ve faagit. 27Marr-jee ooilley ny dew eck; sheese lhieu gys y slaughter: smerg daue! son ta’n laa oc er jeet, earish nyn gerraghey. 28Yn coraa ocsyn ta er chosney roue, as er scapail veih cheer Vabylon, dy ockley magh ayns Zion kerraghey voish y Chiarn y Jee ain, yn cooilleen t’eh er ghoaill son e hiamble. 29Eïe-jee er ny sideyryn noi Babylon: ooilley shiuish ta lhoobey yn vhow, camp-jee noi eck chion mygeayrt: ny lhig da veg cosney ass-jee: cur-jee leagh e obbraghyn; rere myr ooilley t’ee er n’yannoo, jean-jee reeish: son t’ee er ve mooaralagh noi yn Chiarn, Fer casherick Israel. 30Shen-y-fa tuittee ny deiney aegey eck ayns ny straïdyn, as bee ooilley ny deiney-caggee eck giarit jeh ayns y laa shen, ta’n Chiarn dy ghra. 31Cur-my-ner, ta mish dt’oï, O uss s’mooaralee ta, myr ta’n Chiarn Jee ny flaunyssee gra: son ta’n laa ayd’s er jeet ort, eer yn imbagh smaghtee. 32As nee yn fer s’moyrnee jeu snapperal as tuittym, as cha der fer erbee laue dy hroggal eh: as foad-yms aile ayns ny ard-valjyn echey, as nee eh stroie ooilley mygeayrt-y-mysh.

33Myr shoh ta Chiarn ny flaunyssee gra, Va cloan Israel as cloan Yudah tranlaasit dy cheilley, as dy chion v’ad freilt lioroosyn ghow ad nyn gappeeyn; dob ad feaysley daue. 34Ta’n Saualtagh oc niartal; Chiarn ny flaunyssee yn ennym echey: nee eh dy fondagh pleadeil yn chooish oc, son fea y choyrt da’n cheer, agh anvea da cummaltee Vabylon.

35Ta’n cliwe er ny Caldeanee, ta’n Chiarn dy ghra, as er cummaltee Vabylon, as er ny princeyn, as er ny deiney creeney eck. 36Ta’n cliwe er ny fir-faishnee breagagh; as nee ad branlaadee: ta’n cliwe er ny deiney niartal eck; as bee ad lhag-chreeagh. 37Ta’n cliwe er nyn gabbil, as er ny fainee oc, as er slane shiartanse y theay; as bee ad faase myr mraane: ta’n cliwe er y verchys eck; as bee ad spooillit. 38Ta’n cliwe er ny ushtaghyn eck; as bee ad chyrmit seose: son te cheer dy yallooyn grainnit, as t’ad er-rouyl son ny jallooyn oc. 39Shen-y-fa nee beishtyn oaldey yn aasagh, marish cretooryn agglagh ny hellanyn, cummal ayns shen, as nee ny hulladyn, goaill ayn: as cha bee eh arragh ny ynnyd-vaghee son dy bragh; chamoo vees cummaltee ayn veih sheeloghe gys sheeloghe. 40Myr ren Jee Sodom as Gomorrah y stroie, marish nyn maljyn naboo, ta’n Chiarn dy ghra; myr shen cha jean dooinney erbee cummal ayns shen, ny mac dooinney baghey ayn. 41Cur-my-ner, hig pobble veih’n twoaie, as nee ashoon mooar as ymmodee reeaghyn troggal seose veih ardjyn sodjey magh y thallooin. 42Nee ad loaghtey yn vhow, as y shleiy: t’ad dewil, as cha jeeaghee ad myghin: nee yn coraa oc freaney myr y cheayn, as nee ad markiagh er cabbil, dagh fer jeu eillit myr dooinney son y chaggey dt’oï’s, O inneen Vabylon. 43Haink skeeal jeu gys ree Vabylon, as daase eh lhag-lauee; ren angaish eh y ghreimmey, as pianyn myr ben er-troailt. 44Cur-my-ner, hig eh seose myr lion veih brooinyn Yordan noi ynnyd-vaghee yn treanagh; agh ver-yms orroo dy leah cur cooyl; as quoi ta’n reih dooinney dunnal dy endeil ee m’oï’s? son quoi ta casley rhym? as quoi s’loys da m’y ghreinnaghey? ny quoi yn bochilley shen oddys shassoo roym? 45Shen-y-fa eaisht-jee rish coyrle y Chiarn t’eh er ghoaill noi Babylon, as cre t’eh kiarit dy yannoo noi cheer ny Caldeanee; dy jean eer yn er s’faase ’sy chioltane ad y eiyrt magh; son shickyrys ver eh naardey nyn ynnyd-vaghee mâroo hene. 46Ec skeeal atchimagh jeh goaill Babylon ta’n thalloo craa, as ta’n eam agglagh er ny chlashtyn mastey ny ashoonyn.