CAB. LI

1Myr shoh ta’n Chiarn dy ghra, Cur-my-ner trog-yms seose geay dorrinagh noi Babylon, as noi ny cummaltee eck, mâroosyn ta girree-magh m’oï; 2As ver-yms gys Babylon fasneyderyn, nee ish y asney, as folmaghey yn cheer eck: son ayns y laa seaghnagh bee ad noi eck chion mygeayrt. 3Ny lhig dasyn ta lhoobey yn vhow lhaggagh e laue, ny lhig da cur jeh e choamrey-caggee: ny jeeagh-jee myghin da ny deiney aegey eck; stroie-jee dy bollagh yn slane armee eck. 4Myr shoh tuittee ad sheese marroo ayns thalloo ny Caldeanee, as adsyn vees guint dy baase ayns e straïdyn. 5Son cha vel Israel dy slane treigit, ny Judah, liorish e Yee, Chiarn ny flaunyssee; ga dy row yn cheer oc lhieent lesh peccah noi Fer-casherick Israel. 6Cosne-jee magh veih Babylon, as saue-jee dagh dooinney e vioys; nagh bee shiu giarit jeh ayns e vee-chairys ecksh: son shoh traa yn Chiarn dy ghoaill cooilleeney urree, as dy choyrt jee leagh rere e toilliu. 7Ta Babylon er ve cappan airhey ayns laue y Chiarn, ren ooilley yn seihll er-meshtey: ta ny ashoonyn er n’iu jeh’n feeyn eck; shen-y-fa ta ny ashoonyn ass nyn geeayll. 8Ta Babylon er duittym doaltattym, as t’ee naardey: jean-jee dobberan er e son; gow-jee shelliu son y ghuin eck, my ta lheihys ny cour. 9Bailliu v’er lheihys Babylon, agh cha beagh ee er ny lheihys: faag-jee veue ee, as lhig dooin goll dagh dooinney gys e heer hene: son ta’n briwnys eck roshtyn gys niau, as er droggal eer gys yrjid yn aer. 10Ta’n Chiarn er hoilshaghey yn chairys ain: tar-jee as lhig dooin fockley-magh ayns Sion obbyr y Chiarn yn Jee ain. 11Shleeu-jee ny sideyn; lhieen-jee ny builg-side: ta’n Chiarn er ghoostey spyrryd reeaghyn ny Medeyn: son t’eh kiarit noi Babylon dy stroie eh, as dy nee shoh yn cooilleeney ta’n Chiarn dy ghoaill son e hiamble. 12Cur-jee seose yn mergey er voallaghyn Vabylon, niartee-jee yn arrey, soie-jee ny arreyderyn, cur-jee sleih dy lhie cooyl-chlea: son ta’n Chiarn chammah er chiarail, as er n’yannoo mie ny t’eh er loayrt noi cummaltee Vabylon. 13O uss ta cummal er ymmodee ushtaghyn, sonnyssagh ayns berchys, ta dty yerrey er jeet, as towse dty haynt. 14Ta Chiarn ny flaunyssee er loo liorish hene, gra, Shickyr lhieen-yms oo lesh deiney, myr lesh braddagyn; as troggee ad yllaghey dt’oï. 15T’eh er chroo yn thalloo lesh e phooar, t’eh er chiaddey yn seihll liorish e chreenaght, as er heeyney magh yn aer liorish e hushtey. 16Tra t’eh cur magh e choraa, ta’n aer laadit lesh ushtey, as t’eh cur er kay troggal veih ardjyn sodjey magh y thallooin; t’eh cur magh tendreilyn lesh fliaghey, as lhiggey magh yn gheay ass e hashtaghyn. 17Ta dy chooilley ghooinney jeu ny vouran ayns tushtey: ta keeayl dy chooilley lheieder lheïe ersooyl marish e yalloo grainnit: son cha vel y jalloo lheït agh fardail, as cha vel ennal ayndoo. 18T’ad fardail, as obbyr y volteyrys: ayns earish nyn gerraghey nee ad cherraghtyn. 19Cha vel Eiraght Yacob goll-roosyn; son she eshyn t’er chroo dy chooilley nhee; as ta Israel cronney e eiraght; Yn Chiarn ny flaunyssee yn ennym echey. 20T’ou uss yn teigh-caggee aym’s, as my ghreinyn-caggee: son lhiat’s brish-yms dy peeshyn ny ashoonyn; as lhiat’s ver-yms reeriaghtyn naardey; 21As lhiat’s giare-yms sheese ayns peeshyn yn cabbyl as y markiaght; as lhiat’s brish-yms ayns peeshyn yn ainagh as eshyn ta caggey ayn; 22Lhiat’s myrgeddin nee’m brishey ayns peeshyn dooinney as ben; as lhiat’s nee’m jannoo myn shenn as aeg; as lhiat’s nee’m jannoo myn yn dooinney aeg as y ven aeg; 23Brish-yms neesht dy peeshyn lhiat’s yn bochilley as e hioltane; as lhiat’s brish-yms ayns peeshyn yn erroo as e hesheraght-ghew; as lhiat’s lhieg-yms dy peeshyn ny captanyn as ny fir-reill. 24Agh cooilleen-yms er Babylon roish nyn sooillyn, as er ooilley fir-vaghee Chaldea, ooilley ny huilk t’ad er n’yannoo er Zion, ta’n Chiarn dy ghra. 25Cur-my-ner, ta mish dt’oï, O lieau chustey, ta’n Chiarn dy ghra, ta coyrt shaghrynys er ooilley yn seihll; agh sheeyn-yms my laue ort, as rowl-yms neose oo veih dty chreggyn, as neem’s oo y yannoo slieau loshtee. 26As cha gowee ad jeed’s clagh chorneilagh, ny clagh undin; agh bee oo dty hraartys kinjagh, ta’n Chiarn dy ghra. 27Soie-jee seose mergey ayns y cheer, sheid-jee yn trumpet mastey ny ashoonyn, soie-jee ny ashoonyn urree, muster-jee cooidjagh noi eck reeriaghtyn Ararat, Minni, as Ashchenaz; reih-jee captan noi eck; lhig da ny cabbil cheet seose myr ny braddagyn mollagh. 28Greinnee-jee seose ny ashoonyn noi eck, marish reeaghyn ny Medeyn, ny captanyn oc, as ooilley nyn leeideilee, as dy chooilley heer fo e reill. 29As bee yn cheer er-creau as seaghnit: son bee slane aigney yn Chiarn cooilleenit er Babylon, dy yannoo thalloo Vabylon ny hraartys gyn cummaltagh. 30Ta treanee Vabylon er scuirr veih’n chaggey, t’ad lhie cooyl nyn voallaghyn: ta’n troshid oc er n’aase moal; t’ad faase myr mraane: ta ny ynnydyn-vaghee eck losht, as ny boltyn eck brisht. 31Roie-ys post quail post, as chaghter quail chaghter, lesh naight gys ree Vabylon, dy vel yn ard-valley echey goit ec y derrey chione, 32Dy vel ny coorseyn-ushtey giarit jeh, yn chuirtlagh er aile, as ny deiney-caggee er choayl nyn dappey. 33Son myr shoh ta Chiarn ny flaunyssee, Jee Israel, dy ghra, Ta inneen Vabylon goll-rish laare-vooie, t’ee traa y woalley: foast tammylt beg, as hig earish yn ouyr eck. 34Ta Nebuchadrezzar ree Vabylon er my chur mow, t’eh er my vroo, t’eh er my yannoo saagh follym, t’eh er my lhuggey sheese myr dragon, t’eh er lhieeney e volg lesh my vee s’blaystal, as er my hilgey magh. 35Yn dewilys jeant orrym’s as er my eill, dy row eh er Babylon, nee cummaltagh Zion gra; as, Dy row my uill er fir-vaghee Chaldea, jir Jerusalem. 36Shen-y-fa myr shoh ta’n Chiarn dy ghra, Cur-my-ner, goym’s seose dty chooish, as trog-yms cooilleen er dty hon; as chyrmee-ym seose yn awin eck, as dooin-ym e farraneyn; 37As hig Babylon dy ve ny holtanyn, ynnyd-vaghee son dragonyn, atchim, as faghid, fegooish cummaltagh. 38Nee ad garveigagh ry-cheilley myr lionyn: nee ad gullal myr quallianyn lion. 39Ayns chiass nyn rouanys aarlee-yms gien elley daue, as nee’m ad er-meshtey dy yannoo ching jeu, as dy hilgey ad ayns cadley trome kinjagh, nagh bee ad dy bragh er nyn ghoostey, ta’n Chiarn dy ghra. 40Ver-ym lhiam ad sheese myr eayin gys y skynn, myr reaghyn ny goair fyrryn. 41Kys dy vel Sheshach goit! as kys ta gloyr vooar y theihll greimmit doaltattym! kys ta Babylon er jeet dy ve red atchimagh mastey ny ashoonyn! 42Ta’n keayn er jeet seose er Babylon; t’ee baiht fo earroo ny tonnyn. 43Ta ny ard-valjyn eck ny hraartys, thalloo sponkit as fadaneagh, cheer gyn cummaltagh, chamoo ta mac dooinney cheet ny choair. 44As neem’s Bel y vriwnys ayns Babylon, as goym’s ass e veeal shen t’eh er lhuggey; as cha jean ny ashoonyn ny smoo lhieeney stiagh huggey; dy feer, nee voalley Vabylon tuittym. 45My phobble, immee-jee magh ass-jee, as livrey-jee dy chooilley ghooinney e annym veih jymmoose trome y Chiarn. 46As ny lhig da’n cree eu gannooinaghey, as ny bee shiu agglit son y naight vees er ny chlashtyn ’sy cheer; hig naight un vleïn, as naight elley ’sy vleïn cheddin: bee cragheyder ’sy cheer, fer-reill noi fer-reill. 47Shen-y-fa, cur-my-ner, ta ny laghyn cheet dy jean-yms briwnys er jallooyn grainnit Vabylon: as bee yn slane cheer eck bun-ry-skyn, as tuittee ooilley ny cummaltee eck marroo cheu-sthie jee. 48Eisht nee niau as thalloo, as ooilley ny t’ayndoo, jannoo ronneeaght er Babylon: son hig ny cragheyderyn urree veih’n twoaie, ta’n Chiarn dy ghra. 49Myr ta Babylon er choyrt er sidooryn Israel dy huittym ayns caggey, myr shen ec Babylon tuittee fir-chaggee veih dy chooilley ard. 50Shiuish ta er scapail yn chliwe, cosne-jee rieau, ny shass-jee: cooinee-jee er y Chiarn foddey jeh, as smooinee-jee er Jerusalem. 51Ta shin mow, er-y-fa dy vel shin er chlashtyn oltooan: ta nearey er choodaghey nyn eddin; son ta joarreeyn er jeet stiagh gys ynnydyn smoo casherick thie yn Chiarn. 52Shen-y-fa, cur-my-ner, ta ny laghyn cheet, ta’n Chiarn dy ghra, dy goym’s cooilleeney er ny jallooyn grainnit eck; as fud ny cheerey nee ny guintee gaccan. 53Ga dy jinnagh Babylon troggal seose ee hene gys niau, as ga dy jinnagh ee niartaghey yrjid yn troshid eck, ny-yeih voym’s hig cragheyderyn urree, ta’n Chiarn dy ghra. 54Ta sheean yn eam cheet veih Babylon, as dy chragh trome veih cheer ny Caldeanee: 55Son dy vel y Chiarn er speeiney Babylon, as er chur ny host aynjee yn coraa vooar; tra ta ny tonnyn eck feiyral myr sheean ymmodee ushtaghyn, ta feiyr yn choraa oc troggal dy ard: 56Er-yn-oyr dy vel y spooilleyder er jeet urree, eer er Babylon, as ta ny deiney niartal eck goit; ta ooilley ny bow’ghyn oc brisht, son nee yn Chiarn Jee, yn Lhiaseyder, dy shickyr cooilleeney. 57As nee’m ny princeyn eck er-meshtey, ny deiney creeney, ny captanyn, ny fir-reill, as ny treanee caggee: as hig cadley trome orroo, as gyn doostey, ta’n Ree dy ghra, ta e ennym Yn Chiarn ny flaunyssee. 58Myr shoh ta Chiarn ny armeeyn dy ghra, Bee voallaghyn lheaney Vabylon dy bollagh lhieggit rish y thalloo, as ny giattyn ard eck losht lesh aile; as nee’n pobble tooilleil ayns fardail, as baaree yn sleih nyn niart dy deinagh trooid yn aile.

59Yn goo hug Jeremiah yn phadeyr ayns currym da Seraiah mac Neriah, mac Vaaseiah, tra hie eh marish Zedekiah ree Yudah gys Babylon, ’sy chiarroo vleïn jeh e reill. As va Seraiah shoh ny ard-shamyrder reeoil. 60Myr shoh scrieu Jeremiah ayns lioar ooilley ny huilk va kiarit er Babylon, eer ooilley ny goan shoh ta scruit noi Babylon. 61As dooyrt Jeremiah rish Seraiah, Tra hig oo gys Babylon, as ver oo my-ner, as lhaihys oo ooilley ny goan shoh, 62Eisht nee oo gra, O Hiarn, t’ou er loayrt noi’n voayl shoh, dy stroie eh, nagh bee cummaltagh faagit ayn, peccagh ny baagh, agh dy ve lhome treigit er son dy bragh. 63As tra vees oo erreish lhaih yn lioar shoh, dy jean oo kiangley clagh huggey, as ceau eh ayns mean Euphrates; 64As nee oo gra, Shoh myr hed Babylon fo, as cha n’irree eh veih’n cherraghey ver-yms urree; as bee ish rey. Choud shoh ta goan Yeremiah.