CAB. I

1Va dooinney ayns cheer Uz, va’n ennym echey Job; as va’n dooinney cheddin slane ynrick as jeeragh, goaill aggle roish Jee, as shaghney olk. 2As v’echey shiaght mec as three inneenyn. 3Va e chooid myrgeddin shiaght thousane keyrrey, as three thousaneyn dy chamelyn, as queig cheead whing dy ghew, as queig cheead assyl bwoirryn, as niart mooinjer; myr shen dy row yn dooinney shoh yn er s’berchee jeh ooilley deiney’n niar. 4As hie ny mec echey as ren ad cuirraghyn, dagh dooinney laa mygeayrt ayns e hie; as hug ad fys er ny three shayraghyn oc, dy ee as dy iu mâroo. 5As myr shen ve, tra va laghyn y yien oc er n’gholl mygeayrt, dy dug Job fys orroo, as ren eh ad y chasherickey, as heb eh chebballyn-losht son dagh unnane jeu: son smooinee Job, Foddee eh ’ve dy vel my vec er n’yannoo peccah, as er yarrood Jee ayns nyn gree. Shoh myr ren Job dy kinjagh.

6Nish haink eh gy-kione er laa dy row, tra haink ainleyn Yee fenish y Chiarn dy hebbal nyn shirveish, dy daink Satan myrgeddin ny mast’ oc. 7As dooyrt y Chiarn rish Satan, Cre veih t’ou uss er jeet? Eisht dreggyr Satan y Chiarn, as dooyrt eh, Veih goll noon as noal, as shooyl huggey as veih er feaï-ny-cruinney. 8As dooyrt y Chiarn rish Satan, Vel oo er chur-my-ner my harvaant Job, nagh vel fer erbee goll-rish er y thalloo, dooinney slane ynrick as jeeragh, ta goaill aggle roish Jee, as shaghney olk? 9Eisht dreggyr Satan y Chiarn, Vel Job goaill aggle roish Jee nastee? 10Nagh vel oo er n’yannoo cleiy mygeayrt-y-mysh hene, as mysh e hie, as mysh ooilley ny t’echey er dy chooilley heu? T’ou er vannaghey obbyr ny laueyn echey, as ta e chooid-seihlt er ny vishaghey er y thalloo. 11Agh sheeyn magh dty laue nish, as benn rish ooilley ny t’echey, as nee eh dt’oltooaney gys dty eddin. 12As dooyrt y Chiarn rish Satan, Cur-my-ner, ta ooilley ny t’echey ayns dty phooar; ynrycan er hene cha lhie oo dty laue. Myr shen hie Satan magh veih fenish y Chiarn.

13As er laa dy row, va ny mec as ny inneenyn echey gee as giu feeyn ayns thie nyn mraar shinney: 14As haink chaghter gys Job, as dooyrt eh, Va ny dew traaue, as ny assylyn gyndyr lioroo; 15As huitt ny Sabeanee orroo, as ghow ad ad ersooyl; as t’ad er varroo ny sharvaantyn lesh foyr y chliwe: as ta mish my-lomarcan er scapail dy insh dhyt. 16S’coan v’eh er loayrt, tra haink myrgeddin fer elley, as dooyrt eh, Ta aile Yee er duittym veih niau, as er lostey seose ny kirree, as ny sharvaantyn, as er stroie ad; as ta mish my-lomarcan er scapail dy insh dhyt. 17S’coan v’eh shoh erreish loayrt, tra haink myrgeddin fer elley, as dooyrt eh, Haink ny Caldeanee ayns three sheshaghtyn, as huitt ad er ny camelyn, as t’ad er chur lhieu ad ersooyl, as neesht er varroo ny sharvaantyn lesh foyr y chliwe; as ta mish my-lomarcan er scapail dy insh dhyt. 18Choud as v’eh shoh foast loayrt, haink fer elley myrgeddin, as dooyrt eh, Va dty vec as dty inneenyn gee as giu feeyn ayns thie nyn mraar shinney: 19As cur-my-ner, haink geay niartal veih’n aasagh, as cheau eh er kiare corneilyn y thie, as huitt eh er ny deiney aegey, as t’ad marroo; as ta mish my-lomarcan er scapail dy insh dhyt. 20Er shoh dirree Job, as raip eh e choamrey, as ren eh e chione y vaarey, as huitt eh sheese er y thalloo, as hug eh ooashley, 21As dooyrt eh, Rooisht haink mee ass breïn my vayrey, as rooisht chyndaa-ym reesht gys yn ooir: yn Chiarn ren coyrt, as ta’n Chiarn er ghoaill ersooyl; bannit dy row ennym y Chiarn. 22Ayns ooilley shoh, cha ren Job peccah, chamoo ren eh dy mee-hushtagh cur foill gys lieh Yee.