CAB. X

1Ta mee skee jeh my vioys: neem’s m’accan y cheau orrym pene; neem’s loayrt ayns angaish m’annym. 2Jir-ym rish Jee, Ny jean m’y gheyrey; insh dou cre’n-fa t’ou streeu rhym. 3Vel eh vondeish dhyt’s dy my laadey lesh seaghyn, dy hoiaghey beg jeh obbyr dty laueyn hene, as soilshean er coyrle ny mee-chrauee? 4Vel sooillyn foalley ayd? ny vel oo fakin myr ta dooinney fakin? 5Vel dty laghyn myr laghyn dooinney? vel dty vleeantyn myr laghyn dooinney, 6Dy vel oo briaght lurg my vee-chairys, as ronsaghey son my pheccah? 7Ta fys ayd nagh vel mee ooilley-cooidjagh foiljagh; as nagh vel fer erbee oddys livrey ass dty laue. 8Ta dty laueyn er my chroo, as dy slane er my chummey; ny-yeih t’ou dy my stroie. 9Cooinee, ta mee guee ort, dy vel oo er n’yannoo mee jeh’n chray; as der oo lhiat mee reesht gys y joan? 10Nagh vel oo er my heeley myr bainney, as er my vinjaghey myr groo? 11T’ou er my choamrey lesh crackan as feill, as er my niartaghey lesh craueyn as fehyn. 12T’ou er choyrt dou bea as foayr, as ta dty ard-chiaralys er choadey my spyrryd. 13As ny reddyn shoh t’ou er cheiltyn ayns dty chree: ta fys aym dy row shoh ayns dt’aigney. 14My ta mee jannoo peccah, t’ou goaill tastey jeh, as cha jean oo m’y heyrey veih my vee-chairys. 15My ta mee cur-rish olk, smerg dou hene; as my ta mee ynrick, ny-yeih cha droggym seose my chione. Ta mee lane dy heaghyn; shen-y-fa jeeagh er my angaish; 16Son te lhieeney orrym. T’ou dy my helg myr lion dewil; as reesht ta dty laue yindyssagh trome orrym. 17T’ou troggal seose dt’eanishyn ass-y-noa m’oï, as bishaghey dty yymmoose orrym; ta caghlaaghyn as caggey m’oï. 18Cre’n-fa eisht hug oo lhiat mee ass y vreïn? Oh dy beign er scarrey rish my vioys, as nagh beagh sooill er vakin mee! 19Veign myr nagh beign; veign er my choyrt lhiam veih’n vreïn gys yn oaie. 20Nagh vel my laghyn giare? scuirr eisht voym, as lhig fea dou, dy voddym tammylt dy gherjagh y gheddyn, 21Roish my jem roym as nagh jyndaa-ym reesht, eer gys cheer y dorraghys hene as scadoo yn vaaish; 22Cheer dy ghorraghys, eer dorraghys hene, as scadoo yn vaaish, fegooish caghlaa, as raad ta’n soilshey myr y dorraghys hene.