CAB. XI

1Eisht dreggyr Zophar yn Naamathite as dooyrt eh, 2Nagh vel ansoor dy ve er ny choyrt dasyn ta goaill rouyr taggloo er? as vel y beealerey dy v’er ny heyrey? 3Vel dty vreagyn dy choyrt deiney nyn dhost? as tra t’ou dty oalserey, vel dooinney erbee dy chur oo gys nearey? 4Son t’ou er ghra, Ta m’ymmyrkey-bea ynrick, as ta mee glen ayns dty hilley. 5Agh oh dy jinnagh Jee loayrt, as e veillyn y osley dt’oï; 6As dy jinnagh eh soilshaghey dhyt folliaghtyn dty cheeayll hene, dy vel ad dooble gys ny t’er ny akin! Toig, er-y-fa shen, dy vel Jee er chur ort foddey sloo na ta dty pheccaghyn dy hoilchin. 7Vod uss liorish ronsaghey geddyn magh Jee? vod slane toiggal ’ve ayd jeh folliaghtyn yn Ooilley-niartal? 8T’eh ny syrjey na niau; cre oddys oo y yannoo? ny s’diuney na niurin; cre’n tushtey oddys ’ve ayd jeh? 9Ta’n towse echey ny s’lhiurey na’n thalloo, as ny shlea na’n aarkey. 10My t’eh giarey jeh, as jeigh seose deiney, ny tayrn dy cheilley; quoi eisht oddys eh y lhiettal? 11Son shione da fardalys deiney: t’eh fakin olkys myrgeddin: nagh jean eh er-y-fa shen smooinaghtyn er? 12Son baillish dooinney donney ve coontit creeney, ga dy vel eh er ny ruggey myr lhiy yn assyl fadane. 13My nee oo dty chree y chiartaghey, as dty laueyn y heeyney seose huggeysyn; 14My ta mee-chairys ayns dty laue, scugh foddey voïd eh, as ny lhig da olkys tannaghtyn ayns dty chabbaneyn. 15Son eisht nee oo dty eddin y hroggal seose gyn cron; bee oo ayns sauchys, as cha bee aggle ort: 16Son nee oo dty heaghyn y yarrood, as gimraa orroo myr er ushtaghyn ta roie shaghey. 17As bee dty vea ny sollys na’n vun-laa; nee dty hoilshey brishey magh myr y voghrey. 18As bee oo ec shee, son dy vel dty hreishteil ayns Jee; nee oo dy feer cleiy mygeayrt-y-mood, as bee dty chummal ayns sauchys, 19Nee oo myrgeddin lhie sheese, as cha der dooinney erbee aggle ort; dy feer, nee ymmodee shirrey hood son cooney. 20Agh nee sooillyn y vee-chrauee failleil, as cha jean ad scapail, as bee nyn dreishteil myr yn ennal baaish.