CAB. XII

1As dreggyr Job as dooyrt eh, 2Gyn dooyt shiu hene sleih creeney’n theihll, as yiow ooilley’n chreenaght baase mêriu. 3Agh ta tushtey aym’s chammah as t’euish; cha vel mee veg ergooyl riu: eer, quoi eh nagh vel toiggal ooilley shoh? 4Ta mish myr fer t’ec e naboo ayns faghid, ta geamagh gys Jee, as t’eh dy reggyrt eh: ta’n dooinney slane ynrick ayns faghid eu. 5Eshyn ta aarloo dy skyrraghtyn, t’eh myr lamp t’er n’gholl ass ayns ny smooinaghtyn echeysyn ta ec aash. 6Ta cabbaneyn ny roosteyryn bishaghey, as t’adsyn ta brasnaghey Jee ayns sauchys; gys ny laueyn oc ta Jee cur stiagh dy palchey. 7Agh fênee nish jeh maase y vagher, as nee ad dty ynsaghey; as jeh eeanlee’n aer, as nee ad ginsh dhyt: 8Er-nonney, loayr rish y thalloo, as nee eh dty ynsaghey; as rish eeastyn ny marrey, as ver ad toiggal dhyt. 9Quoi eh nagh vel fys echey liorish ooilley shoh, dy nee laue Yee t’er n’yannoo eh? 10Ayns e laue ta bioys dy chooilley chretoor, as ennal ooilley sheelnaue. 11Nagh vel y chleaysh prowal goan, as y beeal blastyn bee? 12Marish y chenndeeaght ta creenaght; as ayns lhiurid laghyn ta tushtey. 13Marish Jee ta creenaght as niart, dasyn ta bentyn coyrle as tushtey. 14Cur-my-ner, t’eh lhieggal sheese, as cha vod eh ve troggit reesht; t’eh jeigh seose dooinney, as cha vel fosley ny chour. 15Cur-my-ner, t’eh lhiettal ny ushtaghyn, as t’ad chyrmit seose; myrgeddin t’eh lhiggey’n raad daue, as t’ad lhieeney harrish y thalloo. 16Mârishyn ta niart as creenaght: ta’n er-mollit as y molteyr fo e reill. 17T’eh cur shaghrynys er creenaght ny fir-choyrlee, as jannoo ny briwnyn giare-cheeayllagh. 18T’eh brishey geulaghyn reeaghyn, as niartaghey nyn meeghyn lesh cryss. 19T’eh leeideil princeyn ersooyl spooillit, as tilgey sheese y vooinjer niartal. 20T’eh jannoo gyn bree glare ny fir-choyrlee, as cur shaghrynys er tushtey’n chenndeeaght. 21T’eh deayrtey magh nearey er princeyn, as t’eh lhaggaghey niart ny treanee. 22T’eh cur er folliaghtyn y dorraghys dy heet rish, as cur lesh gys soilshey scadoo’n vaaish. 23T’eh bishaghey ny ashoonyn, as dy stroie ad reesht: t’eh sheeyney magh nyn ardjyn, as dy hionney ad reesht. 24T’eh goaill ersooyl cree mooaralee yn thallooin, as cur orroo dy rouail ayns yn aasagh raad nagh vel cassan erbee. 25T’ad rasey ’sy dorraghys fegooish soilshey, as t’eh cur orroo dy leaystey myr dooinney meshtal.