CAB. XIII

1Cur-my-ner, ta my hooill er vakin ooilley shoh, ta my chleaysh er chlashtyn as er hoiggal eh. 2Shen ny ta fys euish er, ta fys aym’s er myrgeddin: cha vel mee veg ergooyl riu. 3Shickyr rish yn Ooilley-niartal baillym’s loayrt, as dy phleadeil my chooish fenish Yee. 4Agh cha vel shiuish agh cooiney breagyn; ta shiu ooilley fir-lhee gyn foaynoo. 5O dy beagh shiu ooilley-cooidjagh nyn dhost! as veagh shiu eisht goit son deiney creeney. 6Clasht-jee nish rish ny t’aym dy ghra, as eaisht-jee rish pleadeil my veillyn. 7Jean shiuish loayrt dy aggairagh ayns lieh Yee? as taggloo dy molteyragh er e hon? 8Vod shiuish soiaghey jeh’n persoon echey? nee shiuish oddys pleadeil ayns lieh Yee? 9Bee eh son y vondeish eu briaght dy ve jeant erriu? ny, myr ta dooinney brynneraght rish dooinney, vel shiuish myr shen brynneraght rishyn? 10Nee eh son shickyrys shiu y cherraghey, my ta shiu gy-follit soiagh jeh persoonyn. 11Nagh der yn ard-ooashley echeysyn aggle erriu? as nagh jean yn atchim echey tuittym erriu? 12Ta ny raaghyn eu myr y joan, as nyn girp myr kirp dy chray. 13Bee-jee nyn dhost, as lhig-jee fea dou, dy voddym loayrt, lhig cre saillish cheet orrym. 14Cre’n-fa ta pian my eill cur orrym snaggeraght lesh my eeacklyn, as dy vel my vioys ayns my laue? 15Ga dy marr eh mee, ny-yeih treishtin ayn: agh neem’s my ynrickys y yannoo mie kiongoyrt rish. 16Eshyn neesht vees my haualtys: son cha jig yn crauee-oalsey ny enish. 17Clasht-jee dy imneagh rish my ghoan as my chooish lesh nyn gleayshyn. 18Cur-my-ner nish, ta mee er n’yannoo magh my chooish; ta fys aym dy bee’m er my heyrey. 19Quoi eh nee pleadeil m’oï? son dy beign my host, veagh eh baase dou. 20Agh ny jean daa red rhym; eisht cha jean-ym mee-hene y ollaghey voïd. 21Jean dty smaght y scughey foddey voym; as ny lhig da dty atchim mish y agglaghey: 22Eisht eïe uss, as neem’s freggyrt; er-nonney, lhig dooys loayrt, as jean uss gansoor. 23Cre wheesh as ta my vee-chairys as my pheccaghyn? soilshee dou my ghrogh-yannoo, as my loght. 24Cre’n-fa t’ou follaghey dty eddin, as dy m’y ghoaill son noid? 25Jean oo broo duillag ta eiyrit noon as noal? as jed oo geiyrt er y stubble chirrym? 26Son t’ou scrieu sheese reddyn sharroo m’oï, as dy my cherraghey son loghtyn m’aegid. 27T’ou cur my chassyn neesht ayns ny stockyn, as sooill ghyere ayd er ooilley my raaidyn; t’ou cur cowrey myrgeddin er boynyn my choshey. 28As ta mee goll naardey myr red loau, myr garmad ta eeit lesh y lhemeen.