CAB. XIV

1Dooinney t’er ny ruggey jeh ben, t’eh giare-heihltagh, as lane dy hreihys. 2T’eh cheet seose myr blaa, as t’eh giarit sheese: t’eh chea ersooyl myrgeddin myr scadoo, as cha vel eh tannaghtyn ayns un stayd. 3As vel uss fosley dty hooillyn er e lheid, as dy my choyrt lhiam ayns briwnys kiongoyrt rhyt? 4Quoi oddys red glen y chur lesh ass red neu-ghlen? cha vod fer erbee. 5Fakin nagh vel e laghyn agh giare, ta earroo ny meeaghyn echey mayrt’s; t’ou uss er hoiaghey ny cagliaghyn echey, nagh vod eh goll harrish. 6Chyndaa voish, dy vod eh fea y ghoaill, derrey t’eh er chooilleeney, myr fer-failt, e obbyr. 7Son ta hopes jeh billey my te giarit sheese, dy jean eh blaaghey reesht, as nagh jean e vanglane meiygh scuirr dy aase. 8Ga dy vel e fraue gaase shenn ’sy thalloo, as y bun echey goll naardey ’syn ooir; 9Ny-yeih, lesh bree yn ushtey ver eh magh blaa, as banglaneyn y ymmyrkey myr billey bio. 10Agh ta dooinney geddyn baase, as lheïe ersooyl; dy feer, ta dooinney paartail, as c’raad t’eh? 11Myr ta ny ushtaghyn veih’n aarkey failleil, as y thooilley sloateil as chyrmaghey; 12Shen myr ta dooinney lhie sheese, as cha vel eh girree arragh: derrey ta ny niaughyn lheïe ersooyl, cha jean ad doostey, ny troggal ass nyn gadley. 13Oh dy jinnagh oo m’y ollaghey ’syn oaie, dy jinnagh oo m’y reayll gy-follit, derrey ragh dty yymmoose shaghey, dy jinnagh oo traa er-lheh y phointeil er my hon, as cooinaghtyn orrym! 14My yiow dooinney baase, nee eh aa-vioghey: ooilley laghyn my hraa ta kiarit dou, nee’m farkiaght derrey hig my chaghlaa. 15Nee uss geamagh, as neem’s dty reggyrt: bee dty yeearree gys obbyr dty laueyn hene. 16Son nish t’ou goaill earroo my chesmadyn; nagh vel oo freayll arrey harrish my pheccah? 17Ta my ghrogh-yannoo sealit seose dy shickyr, as my vee-chairys t’ou dy scrieu ayns dty lioar. 18Myr ta’n slieau cleiyt-fo goll naardey, as y chreg er ny scughey ass e lhiaght; 19Myr ta ny ushtaghyn ceau ny claghyn, as ny thooillaghyn niee ersooyl messyn y thallooin; shen myr t’ou dy stroie jerkal dooinney. 20T’eh fo dty reill er son dy bragh; as t’eh goll shaghey: t’ou caghlaa neeal e eddin, as cur eh ersooyl. 21Ta ny mec echey er ny hroggal gys ooashley, as te gyn-yss da; as t’ad tuittym ayns boghtynid, agh cha vel ennaghtyn echey jeh. 22Agh bee’n eill echey, choud s’bio eh, ayns pian, as nee e annym cheu-sthie jeh dobberan.