CAB. XV

1Eisht dreggyr Eliphaz yn Temanite as dooyrt eh, 2Vel dooinney creeney dy loayrt goan fardalagh, as lhieeney e chleeau lesh y gheay-niar? 3Vel eh dy phleadeil lesh taggloo gyn ymmyd? as lesh goan nagh vel gys foays erbee? 4Dy feer, t’ou scarrey rish aggle, as lhiettal padjer fenish Yee. 5Son ta dty veeal hene fockley magh dty vee-chairys, as t’ou goaill myr reih chengey’n chialgeyr. 6Ta dty veeal hene dy dty gheyrey, as cha nee mish; ta eer dty veillyn hene gymmyrkey feanish dt’oï. 7Nee uss yn chied dooinney v’er ny ruggey? ny row uss er dty chroo roish ny sleityn? 8Vel uss er chlashtyn folliaghtyn Yee? as vel oo goaill ooilley’n chreenaght dhyt hene? 9Cre’n toiggal t’ayd’s, nagh vel ainyn? cre’n chreenaght t’aynyd’s, nagh vel aynin? 10Ny mast’ ainyn ta chammah ny king lheeah as y chenndeeaght, foddey shinney na dty ayr. 11Vel oo soiaghey beg jeh gerjagh Yee? vel saase follit erbee ayd? 12Cre’n-fa ta dty chree cur shaghrynys ort? as quoi er ta dty hooillyn meekey, 13Dy vel oo chyndaa dty yymmoose noi Jee, as lhiggey lheid ny goan cheet ass dty veeal? 14Cree ta dooinney, eh dy ve glen? ny eshyn t’er ny ruggey jeh ben, dy ve cairagh? 15Cur-my-ner, cha vel eh coyrt treishteil erbee gys e ainleyn; cha vel eer ny niaughyn hene glen ayns e hilley. 16Cre-woad sloo dwoaiagh as neu-ghlen ta dooinney, ta sluggey mee-chairys myr ushtey? 17Neem’s y hoilshaghey dhyt, clasht rhym; as shen ny ta mee er vakin, neem’s y ockley magh; 18Shen ny ta deiney creeney er livrey veih nyn ayraghyn, as nagh vel ad er cheiltyn: 19Dauesyn ny-lomarcan va’n thalloo er ny choyrt, as nagh daink joarree erbee ny mast’ oc. 20Ta’n drogh ghooinney troailt lesh pian ooilley e laghyn, as ta earroo bleeantyn y tranlaasagh goit giare. 21Ta feiyr atchimagh ayns e chleayshyn: ayns mean e vaynrys hig y stroider er. 22Cha vel treishteil echey dy hyndaa reesht veih’n dorraghys, son dy vel y cliwe farkiaght er e hon. 23T’eh rouail mygeayrt son arran, gra, C’raad te? ta fys echey dy vel lane dorraghys er-gerrey da. 24Nee seaghyn as angaish aggle y chur er; yiow ad barriaght harrish, myr ree shleeuit son caggey. 25Son t’eh sheeyney magh e laue noi Jee, as niartaghey eh-hene noi’n Ooilley-niartal. 26T’eh roie er e wannal, eer er builg lajer e eilley-caggee. 27Er-yn-oyr dy vel eh coodaghey e eddin lesh riurid, as rollaghyn dy vlennick er e vlainyn. 28As t’eh baghey ayns ard-valjyn treigit, ayns thieyn ayndoo nagh vel dooinney erbee cummal, ta aarloo dy huittym ayns carnaneyn. 29Cha jean eh bishaghey, chamoo nee e chooid farraghtyn, chamoo vees e ooashley beayn er y thalloo. 30Cha bee eh er ny livrey ass y dorraghys: nee’n aile e vanglaneyn y lostey seose, as lesh blest e veeal hed eh naardey. 31Ny lhig da eh-hene y volley lesh fardalys; son bee fardalys e leagh. 32Son bee eh er ny chooilleeney ayns y traa echey hene, as cha bee e vanglane messoil. 33Bee e vess creen er ny hilgey myr y billey-feeyney, as e vlaa tuittym myr yn olive. 34Son bee sheshaght ny crauee-oalsey er nyn skeayley, as nee’n aile stroie ny cabbaneyn ocsyn ta creck briwnys. 35T’ad gientyn olkys, as gymmyrkey magh fardalys, as ta nyn gree cur er y hoshiaght molteyrys.