CAB. XVI

1Eisht dreggyr Job as dooyrt eh, 2Ta mee er chlashtyn dy liooar jeh’n ghlare shoh: s’treih ny fir-gherjee shiu ooilley! 3Bee jerrey eddyr er goan floutagh? ny cre’n daanys t’aynyd dy choyrt ansoor? 4Oddin’s myrgeddin loayrt myr ta shiuish: dy beagh yn annym euish ayns stayd m’annym’s, oddin’s eisht gra dy liooar nyn ’oï, as my chione y chraa erriu. 5Agh yinnin shiu y niartaghey lesh my veeal, as nyn drimshey y veeinaghey lesh bree my ghoan. 6Ga dy vel mee loayrt, cha vel my hrimshey er ny lhaggaghey; as my ta mee my host, cre’n aash te dou? 7Agh nish t’eh er my yannoo deinagh: t’ou er skeayley ooilley my heshaght. 8As t’ou er my choodaghey lesh craplagyn, ta feanish m’oï: as ta’n shangid, ta ry-akin orrym, gymmyrkey feanish gys my eddin. 9Ta my noid dy my raipey ayns e eulys; t’eh snaggeraght orrym lesh e eeacklyn; ta e hooill shleeuit orrym. 10T’ad er vlakey orrym lesh nyn meeal: t’ad er my woalley er y lieckan dy naareydagh; t’ad er haglym ad-hene cooidjagh m’oï. 11Ta Jee er my livrey seose gys ny mee-chrauee, as er my cheau ayns laueyn drogh-yantee. 12Va mee ec m’aash, agh t’eh er my vrishey veih-my-cheilley: t’eh myrgeddin er my ghoaill er y wannal, as er my chraa ayns peeshyn, as er my hoiaghey seose son mark. 13Ta ny sideyryn echey er my chruinnaghey mygeayrt; t’eh scoltey my aaraghyn veih-my-cheilley gyn myghin erbee; t’eh deayrtey magh my ghall er y thalloo. 14T’eh dy my vrishey lesh brishey er brishey; t’eh roie orrym myr dooinney caggee. 15Ta mee er whaaley aanrit-sack er my chrackan, as ta my ooashley er ny choodaghey ’sy joan. 16Ta my eddin gatt lesh keayney, as er ferroogh my hooillyn ta scadoo yn vaaish. 17Cha nee son mee-chairys erbee ayns my laueyn: ta my phadjer myrgeddin ynrick. 18O halloo, ny jean uss my uill y cheiltyn, as ny lhig da my eam ve er ny lhiettal. 19As nish, cur-my-ner, ta m’eanish ayns niau, as my recortys ’syn yrjid. 20Ta my chaarjyn craidey moom; agh ta my hooill deayrtey magh jeïr gys Jee. 21Oh dy voddagh dooinney pleadeil son dooinney rish Jee, myr ta dooinney pleadeil son e naboo! 22Tra vees earroo giare my vleeantyn ec kione, eisht hem y raad veih nagh vel chyndaa.