CAB. XVII

1Ta my ennal failleil, ta my laghyn baarit, ta ny oaiaghyn aarloo er my hon. 2Nagh vel deiney streeuagh orrym? as nagh vel my hooill cur-my-ner yn brasnagh oc? 3Cur dou gioal nish, cur raane dou; quoi ghoys my laue ’sy chooish? 4Son t’ou er vreayll tushtey veih nyn gree: shen-y-fa cha jean uss ad y hoiaghey seose. 5Eshyn ta brynneraght rish e charrey, nee eer soilshey e chloan failleil. 6T’eh er my yannoo myrgeddin an-ghoo mastey’n pobble; as t’ad cloie orrym myr tabret. 7Ta my hooill myrgeddin moal lesh trimshey, as ta ooilley my oltyn myr scadoo. 8Gowee deiney cairal yindys jeh shoh, as ver yn dooinney ynrick eddin da’n molteyr. 9Nee yn er-crauee myrgeddin cummal gys e raad, as aasee ny laueyn glen ny s’troshey as ny s’troshey. 10Agh er nyn son euish ooilley, chyndaa-jee nish, as tar-jee: son cha voddym un dooinney creeney y gheddyn ny mast’ eu. 11Ta my laghyn er n’immeeaght, ta my yerkallyn er ny vrishey, eer smooinaghtyn my chree. 12T’ad jannoo yn oie as y laa co-laik: ta’n soilshey giare kyndagh rish dorraghys. 13My ta mee farkiaght son yn oaie, shen my hie: ta mee jannoo my lhiabbee ’sy dorraghys. 14Ta mee er ghra rish loauid, Uss my ayr: rish y veishteig, Uss my voir as my huyr. 15As cre vel nish my hreishteil? as er son my hreishteil, quoi ver my-ner eh? 16Hed shen sheese mârym gys diunid yn oaie, raad yiow mayd fea cooidjagh ’sy joan.