CAB. XIX

1Eisht dreggyr Job as dooyrt eh, 2Caïd nee shiu m’annym y heaghney, as brishey my chree lesh nyn ghoan? 3Shimmey ta ny keayrtyn ta shiu er my oltooaney: nagh vel nearey erriu dy hionney cha trome orrym? 4As abbyr dy vel mee fo marranys, ta my varranys lhie orrym pene. 5Ga dy vel shiu foast shassoo magh m’oï, as lhiassaghey orrym my oltooan; 6Toig-jee nish dy nee Jee ta er my lhieggal, as er my ghoaill ayns e lieen. 7Cur-my-ner, ta mee plaiynt noi mee-chairys, agh cha vel mee er my chlashtyn; ta mee geamagh dy ard, agh cha vel feaysley my chour. 8T’eh er yeigh seose my raad, nagh voddym geddyn harrish, as t’eh er skeayley dorraghys roish my chassyn. 9T’eh er my roostey jeh my ghloyr, as er n’ghoaill yn attey jeh my chione. 10T’eh er my stroie er dy chooilley heu, as ta mee rea: as my hreishteil t’eh er yiarey sheese myr billey. 11T’eh myrgeddin er ghreesaghey e chorree m’oï, as t’eh er ghellal rhym myr rish e noid. 12Ta sheshaght ny roosteyryn cheet cooidjagh, as jannoo raad daue hene m’oï, as campal cruin mygeayrt my chabbane. 13T’eh er scughey my vraaraghyn foddey voym, as ta my eer ainjyssee jannoo quaagh jee’m. 14Ta my gheiney-mooinjer er my hreigeil, as ta my chaarjyn dooie er my yarrood. 15Ta mooinjer my hie hene, as my harvaantyn, jannoo joarree jee’m: ta mee myr fer quaagh ’sy chilley oc. 16Deïe mee er my harvaant, agh cha ren eh my reggyrt; ghuee mee er dy jeean lesh my veeal. 17Ta m’ennal dwoaiagh da my ven-heshey hene, ga dy ghuee mee urree er graih chloan my chorp hene. 18Ren ny eer cloan veggey gannidys orrym; dirree mee seose, as loayr ad m’oï. 19Hug ooilley my henn chaarjyn dwoaie dou; as t’adsyn bare bynney lhiam er jyndaa m’oï. 20Ta my chraueyn brishey trooid my chrackan as m’eill, as s’coan ta mee er scapail lesh crackan er my ghruntyn. 21Gow-jee chymmey jee’m, gow-jee chymmey jee’m, O shiuish my chaarjyn; son ta laue Yee er ventyn rhym. 22My ta Jee er lhie e laue orrym, cre s’lhiass diuish? as nagh s’lioar diu fakin cre ta mee surranse ayns my eill? 23Oh dy beagh my ghoan nish scruit! oh dy beagh ad recordit ayns lioar! 24Dy beagh ad grainnit lesh pen yiarn as leoaie ayns y chreg er son dy bragh! 25Son ta fys aym dy vel my Haualtagh bio, as dy jean eh shassoo ec y laa jerrinagh er y thalloo: 26As ga, lurg my chrackan, dy der ny beishteigyn mow yn corp shoh, ny-yeih ayns my eill neem’s Jee y akin: 27Eshyn neem’s fakin er my hon hene, as ver my hooillyn my-ner eh, as cha nee fer erbee elley er my hon; ga dy vel my veeghyn goll naardey cheu-sthie jee’m. 28Agh lhisagh shiuish gra, Cre’n-fa ta shin jannoo tranlaase er, fakin dy vel bun y chooish er ny gheddyn aynym pene? 29Bee-jee ayns aggle roish y chliwe: son ta jymmoose cur lesh marish kerraghey’n chliwe, dy vod fys ’ve eu dy vel briwnys ry-heet.