CAB. II

1Reesht va laa dy row, tra haink ainleyn Yee dy hassoo stiagh fenish y Chiarn, dy daink Satan myrgeddin ny mast’ oc, as hass eh stiagh fenish y Chiarn. 2As dooyrt y Chiarn rish Satan, Cre veih t’ou uss er jeet? As dreggyr Satan y Chiarn, as dooyrt eh, Veih rouail noon as noal, as veih gimmeeaght huggey as veih er feaï-ny-cruinney. 3As dooyrt y Chiarn rish y drogh-spyrryd, Vel oo er ghoaill tastey jeh my harvaant Job, nagh vel fer erbee goll-rish er y thalloo, dooinney slane ynrick as jeeragh, fer ta goaill aggle roish Jee, as shaghney olk? as foast t’eh cummal shickyr e ynrickys, ga dy ren uss m’y ghreinnaghey n’oï, dy stroie eh gyn oyr. 4As dreggyr Satan y Chiarn, as dooyrt eh, Crackan son crackan; eer ooilley ny t’ec dooinney ver eh son e vioys hene. 5Agh sheeyn magh dty laue nish, as benn rish y chraue as yn eill echey, as nee eh dt’oltooaney gys dty eddin. 6As dooyrt y Chiarn rish Satan, Cur-my-ner, t’eh ayns dty laue; agh ny gow e vioys.

7Myr shen hie Satan magh veih fenish y Chiarn, as ren eh Job y woalley lesh askaidyn yngyragh, veih boyn e choshey gys mullagh e chione. 8As ghow eh shlig chrockan dy screebey eh-hene; as hoie eh sheese fud y leoie.

9Eisht dooyrt e ven-heshey rish, Vel oo foast shassoo er dty ynrickys? Guee gys Jee dy ghoaill dty vioys. 10Agh dooyrt eh r’ee, T’ou uss loayrt myr unnane jeh ny mraane mee-hushtagh. Cre shoh! jean mayd mie y ghoaill ec laue Yee, as nagh gow mayd rish seaghyn? Lesh ooilley shoh, cha daink drogh ockle ass beeal Yob.

11Nish tra cheayll three caarjyn Yob jeh ooilley ny seaghyn shoh v’er daghyrt da, haink ad dagh fer jeu veih e ynnyd hene; Eliphaz yn Temanite, as Bildad y Shuhite, as Zophar yn Naamathite: son v’ad er choardail ry-cheilley dy heet dy ghobberan mârish, as dy gherjaghey eh. 12As tra hrog ad seose nyn sooillyn foddey jeh, as s’coan dy dug ad enney er, hrog ad seose nyn goraa as cheayn ad; as raip ad dagh fer e choamrey, as spreih ad joan seose ’syn aer er nyn ghing. 13Myr shen hoie ad sheese mârish er y thalloo shiaght laghyn as shiaght oieghyn, as cha loayr fer jeu fockle rish: son honnick ad dy row e hrimshey feer trome.