CAB. XX

1Eisht dreggyr Zophar yn Naamathite as dooyrt eh, 2Shoh’n oyr dy vel my smooinaghtyn hene dy my ghreinnaghey dy chur ansoor, as son shoh ta mee jannoo siyr. 3Ta mee er chlashtyn guin my oltooan, as ta spyrryd my chree cur orrym freggyrt. 4Nagh vel fys ayd er shoh veih’n chenn earish, er-dyn traa va dooinney er ny chroo er y thalloo, 5Nagh vel mooaralys ny mee-chrauee agh giare, as nagh vel boggey yn chrauee-oalsey agh son shallid? 6Ga dy vel e ooashley roshtyn gys ny niaughyn, as e chione troggit seose gys ny bodjallyn; 7Ny-yeih nee eh cherraghtyn son dy bragh, myr yn eoylley echey hene: jir adsyn t’er vakin eh, C’raad t’eh? 8Nee eh lheïe ersooyl myr dreamal, as cha bee eh er ny gheddyn; dy jarroo hed eh shaghey myr ashlish ’syn oie. 9Yn sooill myrgeddin honnick eh, cha jean eh fakin eh arragh; chamoo ver e ynnyd my-ner eh arragh. 10Bee e chloan ayns ammys da ny boghtyn, as nee e laueyn jannoo lhiasaghey daue son nyn gooid. 11Ta e chraueyn laadit lesh peccaghyn e aegid, nee lhie sheese mârish ayns y joan. 12Ga dy vel mee-chairys millish ayns e veeal, as eh dy cheiltyn eh fo e hengey; 13Ga dy vel eh caigney eh, gyn scarrey rish, agh freayll eh kinjagh ayns e veeal; 14Ny-yeih ta e vee ayns e vynnagh jiooldagh da, te gall ard-nieughyn cheu-sthie jeh. 15T’eh er lhuggey sheese berchys, as nee eh ad y hilgey reesht: ver Jee er y volg echey dy scarrey roo, 16Nee eh soo pyshoon ny ard-nieughyn: nee chengey yn viper eshyn y varroo. 17Cha vaik eh ny awinyn, ny thooillaghyn, ny strooanyn dy vill as eeym. 18Hed y chooid t’eh er laboragh er y hon dy yannoo lhiasaghey; cha bee eh baarit er hene: rere e chooid vees e lhiasaghey, as cha bee soylley echey jeh. 19Er-yn-oyr dy vel eh er n’yannoo tranlaase er as er hreigeil y boght; er-yn-oyr dy vel eh liorish laue lajer er ghoaill thie nagh ren eh y hroggal; 20Shickyr cha bee aash echey ayns e chree, cha jean eh veg y hauail jeh shen va e chree soit er. 21Cha bee greme echey dy ghoaill: shen-y-fa cha jean dooinney erbee jeeaghyn son e chooid. 22Ayns y palchey smoo echey bee eh ayns chennid: nee laue dy chooilley ghrogh ghooinney tuittym er. 23Tra t’eh mysh goaill beaghey, nee Jee, trimmid e yymmoose y hilgey er, as bee eh er ny gheayrtey er choud as t’eh gee. 24Nee eh chea veih’n wappin-yiarn, agh nee’n bow steillyn eh dy woalley trooid. 25Te er ny hayrn, as ta’n side goll trooid e chorp; dy feer, ta’n cliwe sollys lhiggey magh e ghall: ta atchim y vaaish er. 26Berree yn dorraghys er ayns shamyryn follit e hie; ver aile nagh row er ny heidey eshyn mow; smerg dasyn vees cummal ’sy chabbane mârish. 27Nee ny niaughyn e vee-chairys y hoilshaghey, as nee’n thalloo girree seose n’oï. 28Nee bishagh e hie lheïe ersooyl, as nee e chooid roie myr thooilley ayns laa e yymmoose. 29Shoh cronney yn dooinney mee-chrauee veih Jee, as yn eiraght ta kiarit da liorish Jee.