CAB. XXI

1Agh dreggyr Job as dooyrt eh, 2Eaisht-jee dy tastagh rish my ghoan, as jean-jee myr shoh m’y gherjaghey. 3Lhig-jee dou loayrt; as eisht craid-jee nyn saie. 4Er my hon’s, vel m’accan gys dooinney? as abbyr dy beagh eh, cre’n-fa nagh lhisagh my spyrryd ve seaghnit? 5Jeeagh-jee orrym, as gow-jee yindys, as cur-jee nyn laue er nyn meeal. 6Eer tra ta mee cooinaghtyn er, te dy m’y agglaghey, as ta my eill er-creau. 7Kys te dy vel ny mee-chrauee beayn, cheet dy ve shenn, as niartal ayns pooar? 8T’ad fakin yn sheel oc bishaghey mâroo, as nyn sluight kiongoyrt rish nyn sooillyn. 9Ta ny thieyn oc sauchey veih aggle, chamoo ta slatt Yee orroo. 10Ta’n tarroo oc trean, as cha vel eh failleil; ta’n voa oc breh, as cha vel ee tilgey e lheiy. 11T’ad cur magh yn vooinjer veggey oc myr shioltane, as ta nyn gloan daunsin. 12T’ad goaill y timbrel as y chlaasagh, as t’ad gennal ec kiaull yn organ. 13T’ad baarail nyn laghyn ayns sonnys, as ayns y tullogh goll sheese gys yn oaie. 14Shen-y-fa t’ad gra rish Jee, Faag voïd shin; son cha vel shin shirrey tushtey dty raaidyn. 15Cre ta’n Ooilley-niartal, dy jinnagh shin eshyn y hirveish? as cre’n vondeish veagh eh dooin, dy ghoaill padjer huggey? 16Cur-my-ner, cha vel y vaynrys oc ’sy laue oc hene: ta coyrle ny mee-chrauee foddey voym. 17Cre cha mennick ta cainle ny mee-chrauee er ny chur ass! cre cha leah ta’n toyrt-mow oc cheet orroo! ta Jee rheynn magh trimshey ayns e yymmoose. 18T’ad myr y stubble roish y gheay, as myr y coau ta’n sterrym dy heebey ersooyl. 19Ta Jee stoyral seose e vee-chairys cour e chloan: gowee eh cooilleeney er, as nee eh gennaghtyn eh. 20Ver e hooillyn hene my-ner e hoyrt-mow, as iu-ee eh jeh jymmoose yn Ooilley-niartal. 21Son cre’n taitnys t’echey ayns e hie vees ny lurg, tra ta earroo ny meeaghyn echey er ny yiarey jeh ’sy vean? 22Quoi nee gynsaghey tushtey da Jee? fakin dy nee eshyn ta briwnys yn vooinjer syrjey. 23Ta fer geddyn baase ayns mean e niart, ayns slane aash as shee. 24Ta ny siyn echey roie harrish lesh bainney, as ny craueyn echey er ny ooraghey lesh smuir. 25As ta fer elley geddyn baase ayns angaish e annym, as cha vel eh dy bragh gee lesh gerjagh. 26Nee ad lhie sheese co-laik ’sy joan, as coodee ny beishteigyn ad. 27Cur-my-ner, ta fys aym er ny smooinaghtyn eu, as er ny croutyn ta shiu dy aggairagh kiarail m’oï. 28Son ta shiu gra, C’raad ta thie yn phrince? as cre’n erree t’er cummallyn ny mee-chrauee? 29Nagh vel shiu er vriaght jeusyn ta goll er y raad? as nagh nhione diu ny cowraghyn oc, 30Dy vel ny mee-chrauee er ny reayll gys laa ny briwnys? bee ad er ny chur lhieu magh ayns laa’n jymmoose. 31Quoi nee soilshagh e raad da gys e eddin? as quoi nee eh y chooilleeney son shen ny t’eh er n’yannoo? 32Ny-yeih bee eh er ny chur lesh gys yn oaie, as nee eh tannaghtyn ayns lhiaght ny hooirey. 33Bee foaidyn y choan millish da, as hed dy chooilley ghooinney geiyrt er, myr t’adsyn erskyn earroo hie roish. 34Kys eisht ta shiu dy my gherjaghey ayns fardail, fakin dy vel foalsaght ayns ny ansooryn eu?