CAB. XXII

1Eisht dreggyr Eliphaz yn Temanite as dooyrt eh, 2Vod dooinney ve vondeishagh da Jee, myr t’eshyn ta creeney vondeishagh da hene? 3Vel eh maynrys da’n Ooilley-niartal dy vel oo crauee? vel eh cosney erbee da dy vel oo gymmyrkey oo-hene dy cairagh? 4Vel aggle ersyn dy chur oghsan dhyt? jean eh gentreil ayns cooish briwnys rhyt? 5Nagh vel dty olkys mooar? as dty vee-chairys erskyn-earroo? 6Son t’ou er ghoaill gioal jeh dty vraar son veg, as er spooilley ny boghtyn jeh nyn goamrey. 7Cha vel oo er hirveish ushtey orroosyn va tooillit, as t’ou er lhiettal arran veih ny accryssee. 8Agh son y dooinney berchagh, va’n thalloo roish, as y dooinney ooasle, v’eh cummal ayn. 9T’ou er chur ny mraane-treoghe ersooyl follym, as er vrishey roihaghyn y chloan gyn ayr. 10Shen-y-fa ta ribbaghyn mygeayrt-y-mood, as ta aggle doaltattym dy dty heaghney; 11Ny dorraghys, nagh vod oo fakin; as ta thooillaghyn ushtey dy dty choodaghey. 12Nagh vel Jee ayns yrjid niau? as cur-my-ner yrjid ny rollageyn, cre cha ard as t’ad! 13As t’ou uss gra, Cre’n fys t’ec Jee? vod eshyn briwnys trooid y vodjal dorraghey? 14Ta ny bodjallyn chiu dy choodaghey eh, nagh vel eh fakin; as t’eh gimmeeaght ayns slane reamys niau. 15Vel oo er chur tastey da’n chenn raad ta ny mee-chrauee er n’immeeaght ayn; 16Va er nyn yiarey sheese roish nyn draa; yn undin oc va er ny choyrt mow lesh thooilley; 17Dooyrt rish Jee, Faag voïd shin; as cre oddys yn Ooilley-niartal jannoo roo? 18Ny-yeih lhieen eh nyn dhieyn lesh nheeghyn mie: agh ta coyrle ny mee-chrauee foddey voym. 19Ta’n sleih cairal fakin shoh, as s’mie lhieu eh; as t’ad ayns faghid ec y vooinjer ôney. 20Shen-y-fa cha vel y chooid ainyn er ny yiarey jeh; agh shen ny ta er-mayrn jeusyn ta’n aile dy chur mow. 21Jean uss nish oo-hene y injillaghey huggey, as bee oo ec shee: son liorish shoh bee mieys dty chour. 22Gow, ta mee guee ort, yn leigh veih e veeal, as tasht seose e ghoan ayns dty chree. 23My hyndaa-ys oo gys yn Ooilley-niartal, bee oo er dty hroggal seose, ver oo ersooyl mee-chairys foddey veih dty chabbaneyn. 24Eisht ver oo seose airh myr joan, as airh Ophir myr claghyn y strooan. 25Dy jarroo bee’n Ooilley-niartal dty Endeilagh, as bee ayd mooarane argid. 26Son eisht bee dty haitnys ’syn Ooilley-niartal, as nee oo dty eddin y hroggal seose gys Jee. 27Nee oo padjer y ghoaill huggey, as ver eh clashtyn dhyt, as nee oo cooilleeney dty vreearraghyn. 28Nee oo cooish y ghoaill ayns laue, as hig eh lhiat: as bee’n soilshey sollys er dty raaidyn. 29Tra ta deiney er ny hilgey sheese, eisht jir uss, Bee troggal seose ayn; as sauee eh yn dooinney imlee. 30Nee eshyn ellan yn vooinjer gyn-loght y livrey; as te er ny hauail liorish ynrickys dty laueyn.