CAB. XXIII

1Eisht dreggyr Job as dooyrt eh, 2Eer jiu hene ta my accan sharroo; ta my ghuin ny s’diuney na my osnaghyn. 3Oh dy beagh fys aym c’raad yiow’n magh eh! dy heet gys eer stoyl e vriwnys! 4Yinnin my chooish y hoiaghey magh kiongoyrt rish, as lhieeney my veeal lesh resoonyn fondagh. 5Veagh fys aym eisht cre’n ansoor veagh aym, as toiggal cre yiarragh eh rhym. 6Jean eh pleadeil m’oï ayns mooadys e niart? Cha jinnagh eh; agh m’y niartaghey. 7Ayns shen oddagh yn dooinney cairagh resooney rish; myr shoh veign er my heyrey maghey shen veih my vriw. 8Cur-my-ner, ta mee goll er my hoshiaght, agh cha vel eh ayns shen; as jeeaghyn my yeï, agh cha voddym cur-my-ner eh. 9Er y laue chiare, raad t’eh gobbraghey, agh cha vel baght aym jeh: t’eh follaghey eh-hene er y laue yesh, nagh voddym shilley y gheddyn jeh. 10Agh shione dasyn my ymmyrkey: tra t’eh er my phrowal, hig-ym magh myr airh. 11Ta my chass er reayll e chesmadyn; gys e raad ta mee er chummal, as cha vel mee er hreigeil eh. 12Chamoo ta mee er hyndaa veih slattys e veillyn; ta mee er hoiaghey ny smoo jeh goan e veeal na jeh my veaghey ymmyrchagh. 13Agh t’eshyn jeh’n un aigney, as quoi oddys eh y hyndaa? as shen ta’n annym echey geearree, eer myr shen t’eh dy yannoo. 14Son t’eh cooilleeney shen ta kiarit er my hon: as ymmodee lheid ny reddyn ta mârish. 15Shen-y-fa ta mee seaghnit kiongoyrt rish; tra ta mee smooinaghtyn er, ta mee ayns aggle roish. 16Son ta Jee jannoo my chree meiygh, as ta’n Ooilley-niartal dy my heaghney. 17Er-yn-oyr nagh row mee er ny yiarey jeh roish y dorraghys, chamoo t’eh er skeayley’n dorraghys veih m’eddin.