CAB. XXIV

1Fakin nagh vel ny traaghyn keillit veih’n Ooilley-niartal, cre’n-fa nagh vel adsyn oc ta enney er cur geill da e laghyn? 2Ta paart scughey ny cagleeyn; t’ad liorish laue lajer goaill ersooyl shioltaneyn, as beaghey orroo. 3T’ad geiyrt ersooyl assyl y chloan gyn ayr, t’ad goaill dow yn ven-treoghe son gioal. 4T’ad cur yn voght er-shaghryn ass y raad: ta ymmyrchee yn thallooin follaghey ad-hene cooidjagh. 5Cur-my-ner, myr ny assylyn feïe ’syn aasagh, shen myr t’ad goll magh gys nyn obbyr, girree dy moghey son spooilley: ta’n aasagh gymmyrkey mess daue hene as da nyn gloan. 6T’ad buinn dagh fer e arroo hene ’sy vagher, as t’ad chaglym stiagh fouyr ny mee-chrauee. 7Cha vel ad cur aaght ny eaddagh da’n rooisht, myr shen nagh vel coodagh oc veih’n feayraght; 8T’ad fluigh lesh frassyn ny sleityn, as t’ad lhie rish y chreg son fastee; 9T’ad raipey yn chloan gyn ayr veih’n cheeagh, as goaill gioal veih’n voght; 10T’ad cur er goll rooisht gyn coamrey, as goaill ersooyl y vunney veih ny accryssee; 11Ta jannoo ooil cheu-sthie jeh nyn voallaghyn, as stampey ny pressyn-feeyney oc, as surranse paays. 12Ta deiney gaccan veih’n ard-valley, as ta’n annym ocsyn ta guint geamagh dy ard; ny-yeih cha vel Jee cur ommijys nyn lieh. 13Shoh ad ta dwoaie oc er y toilshey; cha nhione daue ny raaidyn echey, chamoo t’ad tannaghtyn ayns ny cassanyn echey. 14Ta’n dunver, girree ’sy vadran, dy ghunverys yn boght as ymmyrchagh, as ayns yn oie t’eh myr maarliagh. 15Myrgeddin ta sooill y vaarderagh farkiaght son y cho-leayrtys, gra, Cha jean sooill erbee m’y akin; as t’eh caghlaa cummey e eddin. 16Ayns y dorraghys t’ad cleiy trooid ny thieyn, v’ad er chowraghey daue hene ’sy laa: cha nhione daue yn soilshey. 17Son ta’n voghrey dauesyn eer myr scadoo’n vaaish: my nee fer enney y chur orroo, t’ad ayns atchimyn scadoo’n vaaish. 18T’eh bieau myr ny ushtaghyn; ta mollaght lhiantyn gys e chronney er y thalloo; cha vow eh soylley ny garaghyn-feeyney. 19Ta fowan as chiass chyrmaghey seose ny ushtaghyn sniaghtee: myr shen ta’n oaie adsyn t’er n’yannoo peccah. 20Nee’n vreïn eshyn y yarrood; nee’n beishteig beaghey dy blaystal er: cha bee imraa sodjey jeh; as bee mee-chraueeaght er ny vrishey myr billey. 21T’eh cur drogh ghellal da’n ven ghennish nagh vel gymmyrkey; chamoo t’eh jannoo mie erbee da’n ven-treoghe. 22T’eh tayrn myrgeddin huggey yn vooinjer niartal lesh e phooar: t’eh girree seose, as cha vel dooinney erbee shickyr jeh e vioys. 23Ga dy vel eh jeeaghyn er hene dy ve ayns sauchys, as cur e varrant er; ny-yeih ta e hooillyn er nyn raaidyn. 24T’ad troggit seose son tammylt, agh t’ad goit ersooyl, as lhie dy injil; t’ad giarit sheese, myr ooilley nyn lheid, as buinnit myr ny jeeassyn arroo. 25As nish mannagh vel eh myr shoh, quoi nee breagerey jee’m, as my ghlare dy ve gyn ymmyd?