CAB. XXVI

1Agh dreggyr Job as dooyrt eh, 2Kys t’ou er chooney leshyn ta fegooish pooar? kys t’ou sauail yn roih gyn-niart? 3Kys t’ou er choyrlaghey eshyn ta gyn creenaght? as kys t’ou dy slane er hoilshaghey yn chooish myr te? 4Quoi da t’ou er n’ockley magh dty ghoan? as quoi’n spyrryd haink voïd? 5Va ny tranlaasee niartal ’sy chenn earish er nyn stroie fo ny ushtaghyn, marish ny cummaltee elley. 6Ta niurin foshlit kiongoyrt rish, as toyrt-mow gyn coodagh. 7T’eh sheeyney magh yn twoaie harrish y feaynid vooar, as t’eh cummal seose yn seihll er y folmid. 8T’eh kiangley seose ny ushtaghyn ayns e vodjallyn chiu, as cha vel y bodjal er ny scoltey foue. 9T’eh coodaghey ynnyd e eanish, as skeayley bodjal harrish. 10T’eh er hoiaghey cagliagh da ny ushtaghyn, derrey ta’n laa as yn oie cheet dy cheilley. 11Ta pillaryn yn aer er-creau, as fo atchim ec e oghsan. 12T’eh dy rheynn yn aarkey liorish e phooar, as liorish e hushtey t’eh cur haart ny mooaralee. 13Liorish e Spyrryd t’eh er choamrey ny niaughyn; e laue t’er chummey yn ard-nieu camlaagagh. 14Cur-my-ner, cha vel ad shoh agh ayrn giare jeh ny raaidyn echey; agh cre cha beg ta nyn dushtey jeh e obbraghyn? as taarnagh e phooar quoi oddys toiggal?