CAB. XXVII

1Ny-sodjey, hie Job er e hoshiaght lesh e choraa-dorraghey, as dooyrt eh, 2Myr ta Jee bio, t’er lhaggaghey my vriwnys; as yn Ooilley-niartal, t’er heaghney m’annym; 3Choud as ta my ennal aynym, as spyrryd Yee cheu-sthie jee’m; 4Cha jean my veillyn olkys y loayrt, ny my hengey fockley magh molteyrys. 5Ny lhig eh Jee dy jinnin’s shiuish y heyrey: choud s’bio mee cha scarr-ym rish m’ynrickys. 6My chairys ta mee cummal shickyr, as cha lhiggym voym eh: cha der my chree oghsan dou choud as vee’m bio. 7Lhig da my noid ve myr ny mee-chrauee, as eshyn ta girree seose m’oï myr y neu-chairal. 8Son cre ta treishteil yn chialgeyr, ga dy vel eh er chosney, tra ta Jee goaill ersooyl e annym? 9Jean Jee geaishtagh rish yn eam echey tra ta seaghyn cheet er? 10Jean eh taitnys y ghoaill ayns yn Ooilley-niartal? jean eh dy kinjagh geamagh er Jee? 11Neem’s shiuish y ynsaghey liorish cooney Yee: obbraghyn yn Ooilley-niartal cha jean-ym keiltyn veue. 12Cur-my-ner, ta shin hene ooilley er vakin eh: cre’n-fa eisht ta shiu ooilley dy cheilley lesh cha beg dy hushtey? 13Shoh cronney’n dooinney mee-chrauee veih Jee, as shoh eiraght ny tranlaasee, yiow ad veih’n ooilley-niartal. 14My ta e chloan er ny vishaghey, te cour y chliwe; as cha bee e luight er ny yannoo magh lesh arran. 15Adsyn ta faagit ny yeï, bee ad oanluckit ayns baase; as cha jean e vraane-treoghe dobberan. 16Ga dy vel eh tashtey seose argid myr joan, as cur seose coamraghyn myr y chray; 17Foddee eh cur seose ad, agh nee yn vooinjer chairal ad y cheau, as rheynnee yn vooinjer gyn-loght yn argid. 18T’eh dy hroggal e hie myr lhemeen, as myr y bwaag ta’n bochilley dy yannoo. 19Nee’n dooinney berchagh lhie sheese, agh cha bee eh er ny haglym gys e ayraghyn; t’eh fosley e hooillyn, as t’eh rey. 20Ta atchimyn goaill greme er myr ny thooillaghyn, ta dorrin geiyrt ersooyl eh doaltattym ’syn oie. 21Ta’n gheay-niar sheebey lesh ersooyl eh, as t’eh gimmeeaght; as myr sterrym dy eebyrt roish eh ass e ynnyd. 22Son hig Jee dy trome er, as cha jean eh sparail: baillish cosney ass e laue. 23Nee deiney nyn massyn y woalley er, as eiyree ad eh magh ass e ynnyd lesh craid.