CAB. XXVIII

1Son shickyrys ta meayn ayn son yn argid, as boayl son yn airh raad t’ad dy lheïe eh. 2Ta yiarn er ny chleiy ass y thalloo, as ta prash er ny lheïe ass y chlagh. 3T’eh soiaghey cagliagh son y dorraghys, as t’eh ronsagh magh dy chooilley foays: claghyn y dorraghys, as scadoo’n vaaish. 4Ta’n thooilley scarrey cummaltee yn thallooin; eer ny ushtaghyn, raad nagh vel kesmad coshey: t’ad er ny hyrmaghey seose, t’ad sheeley ersooyl veih deiney. 5Agh er son y thalloo, ass shen ta’n arran cheet; as fo t’er ny hyndaa seose myr dy beagh eh aile. 6Ayns ny claghyn eck ta sapphireyn ry-gheddyn, as ayn ta joan yn airh. 7Ta cassan ayn nagh nhione da eean erbee, as nagh vel sooill y vulture er vakin: 8Cha vel quallianyn yn lion er n’gholl er, chamoo ta’n lion eulyssagh er hooyl er. 9T’eh sheeyney magh e laue er y chreg; t’eh dy hilgey harrish ny sleityn bun-ry-skyn. 10T’eh dy yiarey magh awinyn mastey ny creggyn; as ta’n sooill echey cur-my-ner dy chooilley nhee costal. 11T’eh dy chiangley seose ny ushtaghyn veih roie harrish; as shen ny ta follit t’eh cur lesh magh gys y toilshey. 12Agh cre raad vees creenaght er ny gheddyn? as cre vel ynnyd-vaghee tushtey? 13Cha nhione da dooinney cre sheeagh eh; chamoo te er ny gheddyn ayns cheer ny bioee. 14Ta’n diunid gra, Cha vel eh aynym’s: as ta’n aarkey gra, Cha vel eh mârym’s. 15Cha vod eh ve kionnit son airh, chamoo vees argid er ny howse son y phrice echey. 16Cha vod eh ve cormit ayns price lesh airh Ophir, lesh yn onyx costal, ny’n sapphire. 17Cha vod airh ny crystal cheet seose rish; as cha bee eh er ny chaghlaa son jewellyn yn airh s’glenney. 18Cha bee imraa jeant jeh coral, ny pearlyn: son ta price creenaght foddey erskyn rubieyn. 19Cha bee topaz Ethiopia soylit huggey, chamoo vees eh cormit rish airh ghlen. 20Cre voish eisht ta creenaght cheet? as cre raad ta tushtey er ny gheddyn? 21Fakin dy vel eh keillit veih sooillyn dy chooilley ghooinney bio, as gyn-yss da eeanlee’n aer. 22Ta toyrt-mow as baase gra, Ta shin er chlashtyn yn goo jeh lesh nyn gleayshyn. 23Ec Jee ta toiggal jeh e raad, as shione dasyn yn oayll echey. 24Son t’eshyn cur-my-ner ardjyn sodjey magh y thallooin, as fakin fo’n slane niau; 25Dy chur trimmid da ny bodjallyn, as t’eh towse ny ushtaghyn dy kiart. 26Tra ren eshyn oardagh son y fliaghey, as raad son tendreil y taarnagh; 27Eisht honnick eh, as hoilshee eh shoh; hooar eh aarloo eh, as ren eh ronsagh magh eh. 28As rish dooinney dooyrt eh, Cur-my-ner, aggle y Chiarn, shen ta creenaght; as dy haghney yn olk, shen ta tushtey.