CAB. XXIX

1Ny-sodjey, hie Job er e hoshiaght lesh e choraa-dorraghey, as dooyrt eh, 2Oh dy beagh mee myr ayns ny meeaghyn t’er n’gholl shaghey, myr ayns ny laghyn tra ren Jee m’y choadey; 3Tra ren e chainle soilshean er my chione, as tra liorish e hoilshey ren mee gimmeeaght trooid dorraghys; 4Myr va mee ayns laghyn my aegid, tra va ard-chiarail Yee harrish my chabbane; 5Tra va’n Ooilley-niartal foast mârym, tra va my chloan mygeayrt-y-moom; 6Tra ren mee my chesmadyn y ooraghey lesh eeym, as tra ren y chreg deayrtey magh er my hon awinyn dy ooil; 7Tra hie mee magh er y yiat, trooid yn ard-valley, tra hoie mee er y stoyl-briwnys ’sy traid; 8Honnick ny deiney aegey mee, as hie ad dy lhiattee: dirree yn chanstyr, as hass ad seose. 9Va ny princeyn nyn dhost, as hug ad nyn laue er nyn meeal. 10Cha daink fockle ass beeal ny deiney ooasle, as ren nyn jengey lhiantyn gys druntyn nyn meeal. 11Tra ren y chleaysh m’y chlashtyn, eisht vannee eh mee; as tra honnick yn sooill mee, dymmyrk eh feanish dou: 12Er-yn-oyr dy livrey mee yn boght er e accan, yn chloan gyn ayr, as eshyn va gyn cooney. 13Haink orrym’s y bannaght echeysyn va aarloo dy herraghtyn: as hug mee er cree yn ven-treoghe dy ghoaill arrane son boggey. 14Hug mee cairys moom, as ve my choamrey: va my vriwnys myr coamrey ooasle orrym, as myr attey reeoil. 15Va mee sooillyn da’n doal, as cassyn va mee da’n chroobagh. 16Va mee my ayr da’n voght: as y chooish doillee ronsee mee magh. 17As vrish mee cab y vee-chrauee, as phluck mee yn spooilley ass e eeacklyn. 18Eisht dooyrt mee rhym pene, Yioym baase ayns my edd, as bee my laghyn er ny vishaghey myr y ghenniagh. 19Va my fraue er ny skeayley magh liorish ny ushtaghyn, as lhie yn druight fud-ny-hoie er my vanglane. 20Va my ghloyr aalin orrym, as va my vhow er ny niartaghey ayns my laue. 21Rhym’s ren deiney geaishtagh, as farkiaght, as v’ad nyn dhost ec my choyrle. 22Lurg my ghoan cha loayr ad reesht; as ren my ghlare shilley myr y druight orroo. 23As ren ad farkiaght er my hon myr son y fliaghey; as doshil ad nyn meeal dy lhean myr son fliaghey yn jerrey bleeaney. 24My va mee gennal mâroo, s’coan v’ad dy chredjal eh; as soilshey my eddin cha lhig ad sheese. 25Hug mee rhymboo nyn raad, as hoie mee myr yn ard-er ny mast’ oc, as va mee myr ree ayns y cheshaght-chaggee, myr fer ta gerjaghey ny trimshee.