CAB. III

1Ny lurg shoh doshil Job e veeal, as ghwee eh da’n laa ruggyr eh. 2As loayr Job, as dooyrt eh, 3Lhig da’n laa cherraghtyn er va mee er my ruggey, as yn oie ayn ve er ny ghra, Ta lhiannoo-mac er ny yientyn. 4Lhig da’n laa shen ve dorraghys; ny lhig da Jee jeeaghyn er veih’n yrjid, chamoo lhig da soilshey soilshean er. 5Lhig da neeal y dorraghys as scadoo’n vaaish ve er; lhig da bodjal lhie er; lhig da dooid y laa jannoo eh atchimagh. 6As er son yn oie shen, lhig da dorraghys greimmey eh, ny lhig da ve er ny choontey mastey laghyn ny bleeaney, ny lhig da cheet ayns earroo ny meeaghyn. 7Agh lhig da’n oie shen ve trimshagh; ny lhig da coraa erbee dy yennallys ve er ny chlashtyn ayn. 8Lhig daue gwee mollaght da, myr da’n laa er ta’n coraa dy ghobberan hrome er ny chlashtyn. 9Lhig da rollageyn e cho-leayrtys ve fo dorraghys; lhig da jeeaghyn son soilshey, agh ayns fardail, chamoo lhig da fakin ferrooghyn y voghrey: 10Er-yn-oyr nagh yeigh eh seose dorryssyn breïn my vayrey, as nagh dollee eh trimshey veih my hooillyn. 11Cre’n-fa nagh dooar mee baase ayns y vreïn? cre’n-fa nagh scarr mee rish my vioys tra haink mee er y theihll? 12Cre’n-fa ren ny glioonyn goaill rhym? ny ny keeaghyn ta mee er yiole? 13Son nish veign my lhie ec my aash; dy kiune veign my chadley ayns shee as ec fea, 14Marish reeaghyn as mooaralee yn thallooin, hrog lhiaghtyn daue hene ayns ynnydyn faasagh; 15Ny marish princeyn berchagh ayns airh, ren ny thieyn oc y lhieeney lesh argid: 16Er-nonney follit myr ymmyrkey roish y traa cha beign ayn; myr mwaneyn nagh vaik rieau y toilshey. 17Shen y raad ta ny mee-chrauee scuirr veih tranlaase; as ayns shen ta’n deinagh ec fea. 18Shen y raad ta ny pryssoonee goaill nyn aash cooidjagh; cha vel ad clashtyn coraa yn tranlaasagh. 19Ta beg as mooar corrym ayns shen; as ta’n charvaant seyr veih e vainshtyr. 20Cre’n-fa ta soilshey er ny hannaghtyn dasyn ta ayns treihys, as bea dauesyn ta ayns sherriuid anmey? 21Ta goaill foddeeaght son y vaase, as cha vel eh cheet; as cleiy er y hon ny smoo na son berchys follit; 22Ta ayns lane boggey, as booiagh dy liooar dy gheddyn yn oaie. 23Cre’n-fa ta soilshey er ny choyrt da’n dooinney shen ta e raad ayns dorraghys, as eh ta Jee er chruinnaghey mygeayrt lesh seaghyn? 24Son ta my osnaghyn cheet orrym roish my lhongaghyn, as ta my ghobberan deayrtey magh myr ny ushtaghyn. 25Son ta shen ny va mee dy mooar ayns aggle roish er jeet orrym, as yn atchim va mee fo er duittym orrym dy trome. 26Cha row mee ayns sauchys, chamoo va mee ec m’aash, chamoo va mee ec fea; ny-yeih haink seaghyn sodjey my raad.