CAB. XXX

1Agh nish ta mee ayns faghid dauesyn ta ny saa na mee hene, ny ayraghyn oc cha by-feeu lhiam dy hoie marish moddee my hioltane. 2Dy jarroo, cre’n vondeish veagh niart nyn laueyn dooys, adsyn t’er choayl nyn mioyr lesh eash? 3Trooid gort as genney v’ad nyn gercheenyn; chea gys yn aasagh foddey-feayn as fadaneagh: 4Ren ad lhuss-ny-moal-moirrey y yiarey sheese liorish ny thammagyn, as fraueyn y villey-juniper son nyn meaghey. 5V’ad er nyn eebyrt magh veih mastey deiney, deïe ad nyn yeï myr lurg maarliagh, 6Dy ghoaill fastee ayns guaggyn ny coanyn, ayns ooigyn y thallooin, as ayns ny creggyn. 7Mastey ny thammagyn ren ad caayney; fo’n undaagagh v’ad er nyn lostey. 8V’ad cloan volvaneagh, cloan chercheenee, v’ad ny s’melley na joan ny hooirey. 9As nish cha vel mee agh son ronneeaght daue, dy jarroo, ta mee son an-ghoo oc. 10Ta dwoaie oc orrym, t’ad dy my haghney, as ta’n daanys oc dy cheau shellaghyn ayns my eddin. 11Er-yn-oyr dy vel eshyn er n’eaysley my niart, as er heaghney mee, t’adsyn myrgeddin er eaysley yn streean ayns my enish. 12Er my laue yesh ta’n aegid girree seose, t’ad dy cheau mee jeh my voynyn, as ta sheshaghtyn y toyrt-mow cruinnaghey mygeayrt-y-moom. 13T’ad cheet tessyn er my chassanyn, t’ad cur my heaghyn er y hoshiaght, ga nagh vel fer erbee dy ghreinnaghey ad. 14Haink ad orrym myr thooilley mooar ushtaghyn; lhie ad dy trome orrym myr y traartys. 15Ta atchimyn er ny hyndaa orrym: t’ad geiyrt my annym myr y gheay, as ta my vaynrys lheïe ersooyl myr bodjal. 16Son nish ta my annym er ny gheayrtey magh cheu-sthie jee’m: ta laghyn my heaghyn er verraghtyn orrym. 17Ta my chraueyn guint lesh pian ayns imbagh ny hoie; as cha vel aash ec my fehyn. 18Liorish bree trome my ghoghan ta my choamrey er ny chaghlaa: te lhiantyn hym cha chion as mwannal my chooat. 19T’eh er my hilgey ’sy laagh, as ta mee er jeet dy ve myr joan as leoie. 20Ta mee geamagh hood, agh cha vel oo dy my chlashtyn: ta mee shassoo seose, as cha vel oo cur geill dou. 21T’ou er n’aase dewil rhym: lesh dty laue niartal t’ou freayll mee fo. 22T’ou dy my hroggal seose gys y gheay; t’ou cur orrym dy ve sheebit roish, as t’ou cur naardey my vree. 23Son ta fys aym dy der oo lhiat mee gys stayd ny merriu, gys y thie shen ta kiarit son ooilley ny bioee. 24Ny-yeih cha jean eh sheeyney magh e laue gys yn oaie, ga dy vel ad boggyssagh ayns my hoyrt-mow. 25Nagh ren mee dobberan er ny hon-syn va ayns trimshey? nagh row m’annym seaghnit son y voght? 26Tra yeeagh mee son mie, eisht haink yn olk orrym; as myr va mee farkiaght son y toilshey, haink dorraghys. 27Ren my chree lostey cheu-sthie jee’m, as cha dooar mee fea; verr laghyn my heaghyn orrym. 28Hie mee dobberan fegooish gerjagh ny greiney, hass mee seose, as dyllee mee ayns y chaglym. 29Ta mee my vraar da dragonyn, as sheshey da hulladyn. 30Ta my chrackan doo orrym, as my chraueyn shirgit seose lesh chiass. 31Ta my chlaasagh myrgeddin er ny hyndaa gys dobberan, as my ghreinyn-kiaullee gys coraa ny trimshee keayney.