CAB. XXXI

1Ren mee conaant rish my hooillyn; cre’n-fa eisht smooinin er moidyn? 2Son cre’n leagh t’ec nyn lheid veih Jee ta heose? as cre ta nyn eiraght veih’n Ooilley-niartal t’er yn yrjid? 3Nagh vel toyrt-mow cour ny mee-chrauee? as kerraghey atchimagh kiarit dauesyn ta cur-rish mee-chairys? 4Nagh vel eshyn fakin my raaidyn, as coontey ooilley my chesmadyn? 5My ta mee er n’immeeaght lurg fardalys, as my chass er ve bieau lurg molteyrys; 6Lhig dou ve er my howse ayns meihaghyn kiart, dy vod m’ynrickys ve roish Jee. 7My ta my chesmad er hyndaa jeh’n raad, as my chree er rouail lurg my hooillyn, as my ta lheamys erbee er lhiantyn gys my laueyn; 8Eisht lhig dooys cuirr, as lhig da fer elley gee; dy jarroo, lhig da my luight ve astyrit ass ny fraueyn. 9My ta my chree er ve mollit liorish ben; ny my ta mee er lhie follit ec dorrys my naboo; 10Eisht lhig da my ven-heshey blieh gys fer elley, as lhig da feallagh elley croymmey sheese urree. 11Son ta shoh peccah trome; dy jarroo, te loght dy ve kerrit liorish ny briwnyn. 12Son te ny aile ta lostey gys toyrt-mow, yinnagh ooilley my chooid-seihlt y chur naardey. 13My ren mee beg y hoiaghey jeh cooish m’er-mooinjerey, ny m’inney-veyl, tra ren ad gaccan hym; 14Cre eisht nee’m y yannoo tra nee Jee girree seose? as tra eïe-ys eh orrym, cre nee’m freggyrt? 15Nagh ren eh, ren mish y chroo ayns y vreïn, eshyn myrgeddin? as nagh nee yn un er ren shin ny-neesht y chummey ’sy vreïn? 16My ta mee er reayll veih ny boghtyn nyn yeearree, ny er chur er sooillyn y ven-treoghe dy arkiaght foddey; 17Ny, er n’ee my veer orrym pene er-lheh, as nagh vel y chloan gyn ayr er gheddyn ayrn jeh; 18(Son veih my aegid v’eh troggit seose mârym’s, myr marish e ayr, as jeeish ta mee er ve chymmoil veih breïn my vayrey:) 19My ta mee er vakin fer erbee cherraghtyn feme eaddagh, ny boght erbee gyn coodagh; 20Mannagh vel e veeghyn er my vannaghey, as mannagh row eh jeant souyr lesh loamraghyn my chirree; 21My ta mee er hroggal seose my laue noi’n chloan gyn ayr, tra honnick mee dy row ad feme cooney ’sy whaiyl; 22Eisht lhig da my roih tuittym veih my gheayltyn, as my laue ve brisht veih m’uillin. 23Son ren aggle kerraghey veih Jee m’y lhiettal, as roish yn ard-ooashley echeysyn cha voddin shassoo. 24My ta mee er n’yannoo airh my hreishteil, ny my ta mee er ghra rish y ghlen airh, T’ou uss my varrant; 25My ren mee boggyssagh ayns my verchys vooar, as dy row my laue er chosney mooarane cooid; 26My hug mee my-ner y ghrian tra ve soilshean, ny’n eayst gimmeeaght ayns sollyssid, 27As my chree er ve cleaynit cheu-sthie jee’m, ny my veeal er phaagey my laue: 28Veagh shoh myrgeddin peccah toilchin kerraghey veih ny briwnyn: son eisht veign er n’obbal yn Jee t’er-nyn-skyn. 29My ren mee boggey y ghoaill son toyrt-mow my noid, ny boggyssagh tra verr yn olk er; 30Chamoo ta mee er lhiggey da my veeal jannoo peccah, liorish gwee mollaght er e annym; 31Mannagh dooyrt deiney my chabbane, Oh dy voddagh shin cooilleen y ghoaill er feill e noidyn! yinnagh shin nyn saie daue. 32Cha ren y joarree aaght y ghoaill ’sy traïd; agh doshil mee my ghorryssyn da’n troailtagh. 33My ren mee my pheccaghyn y choodaghey myr ren Adam, liorish keiltyn my loght fo my oghrish; 34Eisht lhig da aggle yn earroo mooar tuittym orrym, as craid ny kynneeyn m’y naaraghey; dy bee’m my host, as nagh jem magh er my ghorrys. 35Oh dy jinnagh fer clashtyn y chur dou! cur-my-ner, my yeearree te yn Ooilley-niartal dy my phrowal, as my noid dy chur stiagh e accan scruit m’oï. 36Son shickyrys ghoin eh er my gheaylin, as y chiangley orrym eh myr attey; 37Yinnin’s earroo my chesmadyn y hoilshaghey da; myr prince harrin er-gerrey da. 38My ta my halloo geamagh m’oï, as my ta ny creaghyn echey gaccan; 39My ta mee er n’ee ny messyn echey fegooish argid, ny er chur orroosyn by-liesh ve dy choayl nyn mioys; 40Lhig da onnaneyn gaase seose ayns ynnyd curnaght, as coggyl ayns ynnyd oarn. Shoh jerrey er goan Yob.