CAB. XXXII

1Eisht scuirr ny three deiney shoh dy chur ansoor da Job, er-yn-oyr dy row eh cairal ayns e hooillyn hene. 2Eisht va jymmoose Elihu mac Varachel yn Buzite, jeh kynney Ram, er ny vrasnaghey; noi Job va e yymmoose er ny vrasnaghey, er-yn-oyr dy ren eh eh-hene y heyrey ny smoo na Jee. 3Myrgeddin noi ny three caarjyn echey va e chorree er ny vrasnaghey, er-yn-oyr nagh row arragh oc dy ghra, as ny-yeih v’ad er gheyrey Job. 4Nish va Elihu er farkiaght derrey va Job erreish loayrt, er-yn-oyr dy row adsyn ny shinney na eh. 5Tra honnick Elihu nagh row ansoor erbee ayns beeal ny three deiney shoh, eisht va e chorree er ny vrasnaghey. 6As dreggyr Elihu mac Varachel yn Buzite, as dooyrt eh, Ta mish aeg, as ta shiuish feer shenn; shen-y-fa va aggle orrym, as cha by-loys dou my smooinaghtyn y hoilshaghey. 7Dooyrt mee, Lhisagh laghyn loayrt, as ymmodee bleeantyn gynsaghey creenaght. 8Agh ta spyrryd ayns dooinney; as ta bree yn Ooilley-niartal cur tushtey daue. 9Cha vel ooilley’n chreenaght ec deiney ooasle; chamoo ta briwnys goll dy kinjagh lesh y chenndeeaght. 10Shen-y-fa dooyrt mish, Eaisht-jee rhym’s; neem’s myrgeddin my smooinaghtyn y hoilshaghey. 11Cur-my-ner, va mee farkiaght son y ghoan euish; deaisht mee rish ny resoonyn eu, choud as va shiu ronsaghey magh cre dy ghra. 12Dy feer, hug mee tastey gyere diu; as cur-jee my-ner, cha row fer j’iu ren Job y chastey, ny freggyrt e ghoan: 13Nagh beagh oyr eu dy ghra, Ta shin er gheddyn magh creenaght: liorish Jee bee eh er ny gheyrey, as cha nee liorish dooinney. 14Nish, cha nee m’oï’s t’eh er n’ockley magh e ghoan; chamoo neem’s eshyn y reggyrt lesh y ghlare euish. 15Ghow ad yindys; cha dreggyr ad ny smoo; scuirr ad veih loayrt. 16Tra va mee er farkiaght, (son cha dooyrt ad veg, agh hass ad nyn dhost, as cha dreggyr ad arragh,) 17Dooyrt mee, Neem’s myrgeddin ansoor er my lieh hene; neem’s myrgeddin my smooinaghtyn y hoilshaghey. 18Son ta mee lane dy vree; ta’n spyrryd cheu-sthie jee’m dy my êginaghey. 19Cur-my-ner, ta my chree myr feeyn ta laccal vent; te aarloo dy vrishey magh myr boteilyn dy feeyn noa. 20Nee’m loayrt, dy voddym feaysley y gheddyn: fosley my veillyn, as freggyrt er my hon hene. 21Ny lhig dou, ta mee guee erriu, soiaghey jeh persoon dooinney erbee; chamoo lhig dou goan brynneragh y choyrt da dooinney erbee. 22Son nagh vel fys aym, liorish coyrt goan brynneragh, dy jinnagh my Er-croo dy leah m’y stroie?