CAB. XXXIII

1Shen-y-fa, Yob, ta mee guee ort, clasht rish my ghoan, as eaisht rish ooilley ny t’aym dy ghra. 2Cur-my-ner, nish ta mee er vosley my veeal, ver my hengey magh my ghoan. 3Bee my ghoan veih ynrickys my chree; as hig tushtey dy baghtal veih my veillyn. 4Ta Spyrryd Yee er my chroo, as ta ennal yn Ooilley-niartal er choyrt bioys aynym. 5My oddys oo my reggyrt, fow aarloo dty ghlare kiongoyrt rhym; shass seose. 6Cur-my-ner, ta mish cordail rish dty yeearree ayns lieh Yee; ta mish myrgeddin er my chiaddey ass yn ooir. 7Cur-my-ner, cha jean dty atchim roym’s aggle y chur aynyd, chamoo vees my laue trome ort. 8Son shickyrys t’ou er loayrt ayns my chlashtyn, as cheayll mee coraa dty ghoan, gra, 9Ta mee glen veih drogh-yannoo, ta mee gyn-loght; chamoo ta mee-chairys erbee aynym. 10Cur-my-ner, t’eh geddyn magh oyryn m’oï, t’eh dy my choontey son e noid. 11T’eh dy chur my chassyn ayns geulaghyn, t’eh cur tastey gyere da ooilley my chesmadyn. 12Cur-my-ner, ayns shoh cha vel oo ynrick: neem’s y reggyrt oo, dy vel Jee ny syrjey na dooinney. 13Cre’n-fa t’ou streeu n’oï? son cha vel eh cur coontey jeh veg jeh e chooishyn. 14Son ta Jee loayrt keayrt as keayrt, ny-yeih cha vel dooinney cur tastey da. 15Ayns dreamal, ayns ashlish ny hoie, tra ta cadley trome tuittym er deiney, ayns saveenagh er y lhiabbee, 16Eisht t’eh fosley cleayshyn deiney, as cur raaue shickyr daue, 17Dy vod eh dooinney y hyndaa veih peccah as keiltyn moyrn veih dooinney. 18T’eh freayll e annym veih’n ooig, as e vioys veih cherraghtyn liorish y chliwe. 19T’eh er ny cherraghey myrgeddin lesh pian er e lhiabbee, as earroo e chraueyn lesh guin gyere: 20Myr shen dy vel e vea jiooldey rish arran, as e annym rish bee blaystal. 21Ta’n eill echey er shymley ersooyl, nagh vel eh ry-akin; as ny craueyn echey nagh row cronnit, t’ad shassoo magh. 22Dy feer, ta’n annym echey tayrn er-gerrey gys yn oaie, as e vioys da ny stroideryn. 23My ta chaghter er-gerrey da, fer-ynsee, fer mastey thousane, dy hoilshaghey da dooinney ynrickys Yee; 24Eisht t’eh graysoil huggey, as gra, Livrey-jee eh veih goll sheese gys yn oaie; ta mee er gheddyn lhiasaghey. 25Bee’n eill echey ny s’meiygh na feill lhiannoo: couree eh reesht gys laghyn e aegid: 26Nee eh padjer y ghoaill gys Jee, as bee eh foayroil da; as nee eh e eddin y akin lesh boggey: son nee eh cooilleeney er dy chooilley ghooinney e chairys. 27T’eh jeeaghyn er deiney; as my jir fer erbee, Ta mee er n’yannoo peccah, as er chassey cairys, as cre-woad share mee? 28Nee eh livrey yn annym echey shen veih goll sheese gys yn oaie, as nee e vea fakin y toilshey. 29Cur-my-ner, liorish ooilley ny saaseyn shoh ta Jee dy mennick dellal rish cloan gheiney. 30Dy chur da livrey e vioys veih’n oaie, dy v’er ny hoilshaghey lesh soilshey ny bioee. 31Cur tastey gyere, O Yob, eaisht rhym’s: bee dty host, as neem’s loayrt. 32My ta red erbee ayd dy ghra, abbyr eh: immee lesh; son ta mee aggindagh dy dty heyrey. 33Mannagh vel, eaisht rhym’s: cum dty hengey, as neem’s creenaght y ynsaghey dhyt.