CAB. XXXIV

1Ny-sodjey dreggyr Elihu, as dooyrt eh, 2Eaisht-jee rish my ghoan, O shiuish gheiney creeney; as cur-jee clashtyn dou, shiuish gheiney tushtagh: 3Son ta’n chleaysh prowal goan, myr ta’n beeal dy vlaystyn bee. 4Lhig dooin reih dooin hene briwnys: lhig dooin toiggal rooin hene cre ta cair. 5Son ta Job er ghra, Ta mee cairal: as ta Jee gobbal dy my heyrey. 6Ny lhig dou ve breagagh noi’n irriney: ta my lhott gyn lheihys, as shen gyn oyr. 7Quoi’n dooinney ta casley rish Job, ta sluggey oltooan myr ushtey; 8Ta jannoo sheshaght rish drogh-yantee, as gimmeeaght marish deiney mee-chrauee? 9Son t’eh er ghra, Cha vel eh vondeish erbee da dooinney dy ghoaill taitnys ayns Jee. 10Shen-y-fa clasht-jee rhym’s, shiuish gheiney creeney: foddey dy row eh veih Jee, dy yannoo olk; as veih’n Ooilley-niartal, dy yannoo mee-chairys. 11Son ver eh cooilleen da dooinney cordail rish e obbyr, as ver eh lhiasaghey da dy chooilley ghooinney cordail rish e raaidyn. 12Dy feer son shickyrys, cha jean Jee mee-chairys, chamoo nee’n Ooilley-niartal cassey briwnys. 13Quoi t’er chur y thalloo fo e churrym? ny quoi t’er oardaghey yn slane seihll? 14My t’eh dy hoiaghey e chree er dooinney, my t’eh goaill huggey hene yn spyrryd as yn ennal echey; 15Ragh dy chooilley chretoor naardey cooidjagh, as yinnagh dooinney reesht chyndaa gys joan. 16My ta toiggal ayd nish, clasht rish shoh; eaisht rish coraa my ghoan. 17Bee eer eshyn ta dwoaie echey er cairys cooie son reill: as jean uss eshyn y gheyrey ta smoo cairal? 18Vel eh cooie dy ghra rish ree, T’ou uss mee-chairal? as rish princeyn, Ta shiuish mee-chrauee? 19Cre-woad sloo rishyn nagh vel soiaghey jeh persoonyn princeyn, ny cur geill da’n verchagh veg smoo na da’n voght? son t’ad ooilley obbyr e laueyn. 20Ayns y tullogh yiow ad baase, as bee’n pobble seaghnit ec y vean-oie, as hed ad shaghey; as bee’n vooinjer niartal er ny ghoaill ersooyl fegooish laue. 21Son ta e hooillyn er raaidyn dooinney, as t’eh fakin ooilley e ymmyrkey. 22Cha vel dorraghys erbee ayn, ny scadoo’n vaaish hene, raad oddys drogh-yantee ad-hene y ollaghey. 23Son cha jean eh ny smoo ny ta cair y chur er dooinney, dasyn dy phleadeil rish Jee ayns briwnys. 24Nee eh deiney niartal gyn earroo y vrishey ayns peeshyn, as feallagh elley y hoiaghey ayns nyn ynnyd. 25Shen-y-fa ta fys echey er nyn obbraghyn, as t’eh dy hilgey harrish ad ’syn oie, myr shen dy vel ad er nyn stroie. 26T’eh dy woalley ad myr drogh-yantee ayns shilley foshlit feallagh elley; 27Er-yn-oyr dy hyndaa ad cooyl rishyn, as nagh dug ad veg y gheill da e raaidyn. 28Myr shen dy vel ad cur er accan y voght dy heet huggey, as t’eh clashtyn eam yn seaghnit. 29Tra t’eshyn cur shee, quoi eisht oddys jannoo anvea? as tra t’eh follaghey e eddin, quoi eisht oddys cur-my-ner eh? edyr eh ve jeant noi slane ashoon, ny noi dooinney ny-lomarcan: 30Nagh lhisagh yn er-crauee-oalsey reill, er-aggle dy beagh y pobble er ny hayrn ayns ribbey. 31Son shickyrys te cooie dy ve raït rish Jee, Ta mee er n’ymmyrkey kerraghey, cha jean-ym peccah ny smoo. 32Shen nagh vel mee fakin, ynsee uss dooys: my ta mee er n’yannoo mee-chairys, cha jean-ym arragh eh. 33Nee lurg yn aigney ayd’s lhisagh shoh y ve? gowee eshyn cooilleen, edyr noi dty aigney, ny lesh; as cha nee mish: shen-y-fa lhig da dty ghoan ve rere dty hushtey. 34Lhig da deiney lowal ginsh dou, as lhig da dooinney creeney geaishtagh rhym. 35Ta Job er loayrt gyn tushtey, as ta ny goan echey fegooish creenaght. 36Te my yeearree, dy bee slane prowal goit er Job, son pleadeil ayns lieh deiney kyndagh. 37Son t’eh er chur mee-viallys gys e pheccah; t’eh dy woalley e vassyn ny mast’ ain, as t’eh dy vishaghey e ghoan noi Jee.