CAB. XXXV

1Loayr Elihu ny-sodjey, as dooyrt eh, 2Vel oo smooinaghtyn dy vel shoh cairagh, dy dooyrt oo, Ta my chairys erskyn cairys Yee? 3Son dooyrt oo, Cre’n vondeish bee eh dhyt? as, Cre’n cosney vees aym, my ta mee seyr veih my pheccah? 4Ver-yms ansoor dhyt’s, as dty heshaghyn mayrt. 5Cur-my-ner ny niaughyn, as jeeagh; as cur-my-ner ny bodjallyn, ta ny syrjey na uss. 6My t’ou cur-rish peccah, cre t’ou dy yannoo n’oï? ny my ta dty ghrogh-yannoo er ny vishaghey, cre oddys oo jannoo rishyn? 7My t’ou cairagh, cre t’ou dy chur da? ny cre t’eh geddyn veih dty laue? 8Foddee dt’olkys jannoo aggair da dooinney myr t’ou hene, as foddee dty chairys ve vondeishagh da mac dooinney. 9Liorish dewilys y tranlaase ta ny tranlaasit gaccan; t’ad geam fo roih trome ny mooaralee: 10Agh cha vel unnane gra, C’raad ta Jee m’Er-croo, ta coyrt arraneyn ’syn oie; 11Ta gynsaghey shin ny smoo na maase y vagheragh, as jannoo shin ny s’creeney na eeanlee’n aer? 12Shen y raad t’ad geamagh, agh cha vel fer dy reggyrt ad, kyndagh rish mooaralys drogh gheiney. 13Son shickyrys cha jean Jee geaishtagh rish fardalys, chamoo nee’n Ooilley-niartal cur geill da. 14Ga t’ou gra nagh jean oo eshyn y akin, ny-yeih ta briwnys kiongoyrt rish; shen-y-fa cur uss dty varrant ersyn. 15Agh nish, er-yn-oyr nagh vel eh goaill kerraghey ayns e yymmoose, as nagh vel Job ayns mooadys e heaghyn er hoiggal eh; 16Shen-y-fa t’eh fosley e veeal ayns fardail: t’eh branlaadee lesh e ghoan.