CAB. XXXVI

1Hie Elihu lesh ny-sodjey, as dooyrt eh, 2Surr dou son tammylt, as soilshee-ym dhyt cre t’aym ny-sodjey dy lhiassaghey ayns lieh Yee. 3Ver-ym lhiam my hushtey veih foddey, as ver-yms cairys gys lieh my Er-croo. 4Son ayns firrinys cha bee my ghoan foalsey; ga [er-lhiat] dy vel ooilley’n cheeayll ayd hene. 5Cur-my-ner, ta Jee niartal, as cha vel eh soiaghey beg jeh unnane erbee: t’eh pooaral ayns niart as creenaght. 6Cha vel eh coadey bioys ny mee-chrauee; agh t’eh cur cairys da’n voght. 7Cha vel eh scughey e hooillyn veih’n vooinjer chairal; agh marish reeaghyn t’ad er y stoyl-reeoil; dy feer, t’eh dy hickyraghey ad son dy bragh, as t’ad er nyn yrjaghey. 8As my t’ad kianlt ayns geulaghyn, as er ny hionney lesh ny coyrdyn dy heaghyn; 9Eisht t’eh soilshaghey daue nyn obbyr, as nyn ghrogh-yannoo cre wheesh t’ad er ve. 10T’eh fosley nyn gleaysh myrgeddin gys ynsagh, as cur daue sarey dy hyndaa veih nyn mee-chairys. 11My ver ad biallys as shirveish da, nee ad baarail nyn laghyn ayns maynrys, as nyn mleeantyn ayns shee: 12Agh mannagh bee ad biallagh, nee ad cherraghtyn liorish y chliwe, as yiow ad baase ayns nyn mee-hushtey. 13Agh ta ny crauee-oalsey ayns cree cur seose jymmoose nyn gour hene; cha vel ad geamagh huggey tra t’eh cur seaghyn orroo: 14T’ad geddyn baase ayns nyn aegid, as ta nyn mioys ny mast’ ocsyn ta giarit magh. 15T’eh livrey yn voght ayns e heaghyn, as fosley nyn gleayshyn ayns nyn jennid: 16Eer myr shen veagh eh er scughey uss ass y chennid gys reamys, raad nagh row chennid erbee; as veagh gien dty voayrd jeant magh lesh slane meeaylys. 17Agh t’ou uss er n’yannoo magh slane towse briwnys ny mee-chrauee: shen-y-fa ta briwnys as cairys dy dty ghreimmey. 18Fakin dy vel jymmoose dt’oï, cur twoaie nagh bee oo goit ersooyl lesh orraghey baaish: eisht cha bee saase ayns berchys dy chur feaysley dhyt. 19Jean eshyn soiaghey jeh dty verchys? Beggan; chamoo jeh airh, ny ooilley pooaraghyn dty niart. 20Ny shir dorraghys yn oie, tra ta sleih er ny yiarey jeh ass nyn ynnyd. 21Cur twoaie, ny gow taitnys ayns mee-chairys: son shoh t’ou er reih roish seaghyn. 22Cur-my-ner, ta Jee troggal seose lesh e phooar: quoi ta gynsaghey goll-rishyn? 23Quoi t’er n’oardaghey yn raad echeysyn? ny quoi oddys gra, T’ou er n’yannoo mee-chairys? 24Cooinee dy der oo ard-voylley da son e obbraghyn, ta deiney cur-my-ner. 25Foddee dy chooilley ghooinney goaill baght jeu; foddee dooinney ad y chronnaghey foddey jeh. 26Cur-my-ner, ta Jee mooar, as cha vel enney ain er; chamoo oddys earroo ny bleeantyn echey ve er ny ronsagh magh. 27Son t’eh jannoo myn ny bineyn ushtey: t’ad deayrtey neose fliaghey rere bree yn chay t’er hroggal; 28Shen ta ny bodjallyn deayrtey as shilley neose dy palchey er cloan ny cruinney. 29Myrgeddin vod fer erbee toiggal skeayley-magh ny bodjallyn, ny feiyr e chabbane? 30Cur-my-ner, t’eh skeayley sollyssid e hendreil er-y-skyn, as t’eh dy hyndaa seose grunt ny marrey. 31Son lioroo shoh t’eh dy vriwnys ny ashoonyn; as shirveish beaghey ayns mooarane sonnys. 32Lesh bodjallyn t’eh coodaghey yn toilshey, as cur sarey da, nagh jean eh soilshean, liorish bodjal cheet eddyr ad. 33Ta’n feiyr echey fockley magh cre voish te, ta’n maase myrgeddin gennaghtyn y vree.