CAB. XXXVII

1Er shoh myrgeddin ta my chree er-creau, as er ny lhaggaghey ayns my chleeau. 2Clasht dy gyere rish sheean e choraa, as y feiyr ta goll magh ass e veeal. 3T’eh dy lhiggey magh eh harrish ooilley’n aer, as sollyssid e hendreil gys ardjyn sodjey magh y thallooin. 4Ny lurg ta coraa feiyral: t’eh taarnaghey lesh coraa e ard-ooashley; as cha jean eh ad y lhiettal tra ta e choraa er ny chlashtyn. 5Ta Jee taarnaghey dy yindyssagh lesh e choraa; s’mooar t’eh dy yannoo erskyn nyn dushtey. 6Son t’eh gra rish y sniaghtey, Bee uss er y thalloo; myrgeddin rish y fliaghey myn, as rish fliaghey trome e niart. 7T’eh kiangley seose laue dy chooilley ghooinney, dy vod cloan ny cruinney toiggal e obbraghyn. 8Eisht ta ny maase chea gys ny ooigyn, as tannaghtyn fo yn fastee. 9Ass y jiass ta cheet yn gheay-chassee; as feayraght ass y twoaie. 10Liorish ennal Yee ta’n rio er ny choyrt; as ta lheead ny ushtaghyn er ny hionney. 11Myrgeddin liorish deayrtey neose ushtey ta’n bodjal trome lheïe ersooyl; t’eh skeayley’n bodjal lesh e ghrian, 12As te er ny hyndaa mygeayrt ec e harey; daue dy chooilleeney cre-erbee t’eh dy oardagh daue er feaï-ny-cruinney. 13T’eh cur er cheet, edyr son kerraghey, son y thalloo, ny son myghin. 14Clasht rish shoh, O Yob; shass raad t’ou, as smooinee dy dowin er obbraghyn yindyssagh Yee. 15Vel fys ayd’s cre’n traa ren Jee ad y oardaghey ayns nyn goorse, as cur er soilshey e vodjal dy hoilshean? 16Vel toiggal ayd’s jeh shiaulley ny bodjallyn, ny obbraghyn yindyssagh echeysyn ta firrinagh ayns tushtey? 17Kys te dy vel chiass ayns dty choamraghyn, tra t’eh cur fea da’n thalloo liorish y gheay-jiass? 18Vel uss mârishyn er skeayley magh yn aer, ta cha lajer, as myr prash sollys? 19Cur roïn cre jir mayd rishyn; son cha vod mayd nyn gooish y ockley magh trooid dorraghys nyn dushtey. 20Bee eh er ny insh da dy vel mish er loayrt? My loayrys dooinney jeh, bee eh sluggit seose ayns yindys. 21As eer nish cha vod deiney jeeaghyn dy gyere er y sollyssid ta eddyr ny bodjallyn; agh ta’n gheay dy skeayley as dy ghlenney roue ad. 22Ta emshyr aalin cheet veih’n twoaie: agh marish Jee ta ard-ooashley erskyn-towse. 23Son yn Ooilley-niartal t’eh erskyn nyn roshtyn: t’eh erskyn ooilley ayns pooar, as ayns briwnys, as ayns cairys erskyn towse: cha jean eh seaghney [gyn oyr]. 24Shen-y-fa ta deiney goaill aggle roish: cha vel eh soiaghey jeh dooinney erbee ta creeney ayns e smooinaghtyn hene.